MAAKU 10

Yìgidɛna yã

(Mat 19:1-12)

1Akũ Yesu bò gwe à gɛ̀ɛ Yudea bùsun ari Yoda bara. Pari ɛ̀ra ò kàkarai gwe, akũ à yã dàńnɛ lákũ àdi kɛ nà. 2Farisi kenɔ sù ò a yɔ̃ ò gwa, akũ ò a là ò pì: Gɔ̃gbɛ̃ zɛ́ vĩ à yìgi dɛ yá? 3À wèḿma à pì: Musa dàárɛ deraa? 4Ò pì: Musa gɔ̃gbɛ̃ gbà zɛ́ à yìgidɛtakada kɛ̃ à a nanɔ gbarɛo. 5Akũ Yesu pìńnɛ: Á sãgbãna yã mɛ́ à tò Musa doka birekũ dàárɛ. 6Zaa káaku kũ Luda andunia kɛ̀, à gɔ̃gbɛ̃ kɛ̀ kũ nɔgbɛ̃omɛ. 7Abire yãi gɔ̃gbɛ̃ ni a de kũ a dao tó, ò nakɔ̃a kũ a nanɔo, 8ń gbɛ̃nɔn pla oni gɔ̃ mɛ̀ do ũ. Ò kun pla doro, sé do. 9A yã mɛ́ à tò gbɛ̃ kũ Luda ń nakɔ̃anɔ, bisãsiri sún ń kɛ̃kɔ̃aro. 10Kũ Yesu tà bɛ, a ìbanɔ a là yã pìi mìii. 11Akũ à pìńnɛ: Gbɛ̃ kũ à yìgii dɛ̀ kũ a nanɔo à nɔ pãnde sɛ̀, ade zina kɛ̀ a nɔ káakunɛ. 12Nɔgbɛ̃ kũ à yìgii dɛ̀ kũ a zão à gɔ̃ pãnde sɛ̀ sɔ̃, à zina kɛ̀ɛn gwe.

Yesu arubarikadana nɛ́nɔn

(Mat 19:13-15; Luk 18:15-17)

13Òtɛn su Yesunɛ kũ nɛ́nɔ de à ɔ naḿma, akũ a ìbanɔ gìńnɛ. 14Kũ Yesu è lɛ, à pɔ fɛ̃̀ à pìńnɛ: À tó nɛ́nɔ mɔ́ ma kĩnaa, àsun gíńnɛro, zaakũ kpata kũ à bò Luda kĩnaa mɛ́ à ń takanɔ pɔ́ ũ. 15Yãpuran matɛn oárɛ, gbɛ̃ kũ adi kpata kũ à bò Luda kĩnaa sí lán nɛ́ fíti bàro ni gɛ̃nlo. 16Akũ à nɛ́nɔ sɛ̀ à ń kpákpa a kùla, à ɔ nànaḿma à arubarikaa dàńgu.

Aruzɛkɛde

(Mat 19:16-30; Luk 18:18-30)

17Kũ Yesu dà zɛ́n àtɛn gɛ́, akũ gɔ̃gbɛ̃ ke bàa lɛ̀ à sù à kùtɛ a arɛ à a là à pì: Dannɛri mana, deran mani kɛ nà mà wɛ̃̀ndi kũ àdi lákaro lee? 18Akũ Yesu pìnɛ: À kɛ̀ dera n pì má manaa? Gbɛ̃ke manaro, sé Luda ado. 19Ń dokanɔ dɔ̃: Ǹsun gbɛ̃ dɛro, ǹsun zina kɛro, ǹsun kpãni oro, ǹsun yã di n gbɛ̃dakearo, ǹsun gbɛ̃ blero, ǹgɔ̃ bɛ̀ɛrɛ lí n de kũ n daoonɛ. 20Akũ à pì: Dannɛri, zaa ma nɛ́ fiti gɔrɔan má yã birenɔ kũna pínki. 21Akũ Yesu a gwà kũ yenyĩ wɛ́o à pìnɛ: Yã mɛ̀n do mɛ́ à gɔ̃̀nnɛ. Ǹ gɛ́ ǹ pɔ́ kũ ń vĩnɔ yía pínki ǹ a ɔgɔ kpá takasidenɔa, ǹ mɔ́ ǹ tɛ́mai, ĩnigɔ̃ aruzɛkɛ vĩ ludambɛ. 22Akũ gɔ̃gbɛ̃ pì ãnn sìsi yã pì yãi, à tà kũ pɔsirao kũ à aruzɛkɛnɔ vĩ zɔ̃kɔ̃ yãi. 23Akũ Yesu a ìbanɔ gwàgwa à pìńnɛ: À zĩ'ũ manamana aruzɛkɛdenɛ à gɛ̃ kpata kũ à bò Luda kĩnaa gũn. 24A yã pìi bò a ìbanɔ sarɛ, akũ Yesu ɛ̀ra à pìńnɛ: Gbɛ̃nɔ, à zĩ'ũ gbɛ̃nɛ manamana à gɛ̃ kpata kũ à bò Luda kĩnaa gũn! 25Lakumi gɛ̃na pɔrɔwɛɛn araga de aruzɛkɛde gɛ̃na kpata kũ à bò Luda kĩnaa gũnla. 26Akũ yã pìi bò a ìbanɔ sarɛ manamana, ò pìkɔ̃nɛ: Dí mɛ́ ani fɔ̃ à surabana lee? 27Yesu ń gwá à pì: Bisãsiri ni fɔ̃ro, sé Luda. Luda kĩnaa bee pɔ́ sĩnda pínki dì sí kɛ.

28Akũ Pita pìnɛ: O bee pɔ́ sĩnda pínki tò o tɛnyĩ. 29Yesu pì: Yãpuran matɛn oárɛ, gbɛ̃ kũ à a bɛ tò ke a vĩ̀ninɔ ke a dakũnanɔ ke a da ke a de ke a nɛ́nɔ ke a bura ma yãi kũ ma baarukpannɛna yão, 30ade ni ɛra à bɛnɔ kũ vĩ̀ninɔ kũ dakũnanɔ kũ danɔ kũ nɛ́nɔ kũ buranɔ e lɛu basɔɔro andunia dí gũn, ama kũ wɛ́tãmmaomɛ, ani wɛ̃̀ndi kũ àdi lákaro le andunia kũ àtɛn su gũn. 31Gbɛ̃ káakunɔ nigɔ̃ gbɛ̃ kpɛdenɔ ũ dasi, gbɛ̃ kpɛdenɔ nigɔ̃ gbɛ̃ káakunɔ ũ.

Yesu ɛra à a ga kũ a vunaao yã'onaa

(Mat 20:17-19; Luk 18:31-34)

32Ò ɛ̀ra ò dà zɛ́n òtɛn gɛ́ Yurusalɛmu. Yesu do a ìbanɔnɛ arɛ, akũ yã pìi bò ń sarɛ, vĩna gbɛ̃ kũ ò tɛ́ a kpɛnɔ kũ̀. Akũ Yesu a gbɛ̃nɔn kuri awɛɛplanɔ sɛ̀tɛ ń dona, à ɛ̀ra à yã kũ oni kɛarɛ òńnɛ dɔ 33à pì: À ma! Ótɛn gɛ́ Yurusalɛmumɛ. Oni Bisãsiri Nɛ́ kpá sa'orikinɔ kũ ludayãdannɛrinɔa, oni yã daala à ga, oni a kpá kifirinɔa. 34Oni a lalandi kɛ oni lɛ́'i káa oni a gbɛ̃ kũ flã̀ao oni a dɛ, a gɔrɔ aakɔ̃de zĩ ani futɛ.

Yamisi kũ Yuhanao wɛ́kɛnaa

(Mat 20:20-28)

35Akũ Zebedi nɛ́nɔ Yamisi kũ Yuhanao nà Yesui ò pìnɛ: Dannɛri, ó ye ǹ yã kũ ótɛn wɛ́ kɛmma kɛwɛrɛ. 36Akũ à ń lá à pì: Bɔ́n á ye mà kɛárɛɛ? 37Ò wèa ò pì: Ǹ tó ò vutɛ kũnwo n kpata gũn, gbɛ̃ do n ɔplai gbɛ̃ do ɔzɛi. 38Yesu pìńnɛ: Á yã kũ átɛni a wɛ́ kɛma dɔ̃ro. Toko'i kũ mani mi, áni fɔ̃ à mi yá? Wɛ́tãmma kũ mani gɛ̃n áni fɔ̃ à gɛ̃ a gũn yá? 39Ò wèa ò pì: Óni fɔ̃. Akũ Yesu pìńnɛ: Toko'i kũ mani mi áni mi, wɛ́tãmma kũ mani gɛ̃n áni gɛ̃n, 40ama vutɛna ma ɔplai ke ma ɔzɛi bi ma yãnlo. Gbɛ̃ kũ Luda kɛ̀kɛńnɛnɔ pɔ́mɛ.

41Kũ a ìba gbɛ̃nɔn kuri kparanɔ yã pìi mà, ń pɔ fɛ̃̀ Yamisi kũ Yuhanaooi. 42Akũ Yesu ń kákara à pìńnɛ: Á dɔ̃ kũ gbɛ̃ kũ òtɛni ń gwa buri pãnde kínanɔ ũnɔ dì gbãna ble ń gbɛ̃nɔa, gbãnadenɔ sɔ̃ òdi iko mɔńnɛ, 43ama à de lɛ á kĩnaaro. Á tɛ́ gbɛ̃ kũ à ye à gɔ̃ gbɛ̃ zɔ̃kɔ̃ ũ, sé ade kɛ á zĩ̀ri ũ. 44Lɛmɛ dɔ gbɛ̃ kũ à ye à gɔ̃ gbɛ̃ káaku ũ, sé ade kɛ á sĩnda pínki zɔ̀ ũ. 45Zaakũ Bisãsiri Nɛ́ dí su de ò zĩ kɛnɛro, à sù de à zĩ kɛńnɛmɛ à a zĩda wɛ̃̀ndi kpá de à gbɛ̃nɔ bo dasi yãi.

Batimɛu wɛ́wɛ̃naa

(Mat 20:29-34; Luk 18:35-43)

46Ò kà Yɛriko. Kũ Yesu tɛn bo gwe kũ a ìbanɔ kũ pario, vĩ̀na Timɛu nɛ́ Batimɛu vutɛna zɛ́ lɛ́a, àtɛn bara kɛ. 47Kũ à mà ò pì Yesu Nazɛra mɛ́ àtɛn gɛ̃tɛ, akũ à nà lɛ́ gbãna zunaa à pì: Yesu, Dauda Buri, ǹ ma wɛ̃nda gwa! 48Akũ pari tɛn gínɛ òtɛn pi à yĩtɛ. Akũ a lɛ́ gbãna zunaa kàra àtɛn pi: Dauda Buri, ǹ ma wɛ̃nda gwa. 49Yesu zɛ̀ à pì: À a sísi. Akũ ò vĩ̀naa pìi sìsi ò pìnɛ: Ǹ laakari kpátɛ ǹ futɛ. Àtɛni n sísi. 50Akũ vĩ̀naa pì a uta bò à vĩ̀ à fùtɛ à sù Yesu kĩnaa. 51Akũ Yesu a là à pì: Bɔ́n ń ye mà kɛnnɛɛ? Vĩ̀naa pìi wèa à pì: Rabi, má ye ma wɛ́ gu emɛ. 52Akũ Yesu pìnɛ: Ǹ gɛ́, ma náani kũ n kɛ̀ mɛ́ à n werekɔ̃a. Zaa gwe gɔ̃̀nɔ a wɛ́ gu è, akũ à dà kãao zɛ́n.

Currently Selected:

MAAKU 10: BB2005

Highlight

Copy

Compare