MATIU 27
27
Yudasi ganaa
(Zĩr 1:18-19)
1Kũ gu dɔ̀ kɔnkɔkɔnkɔ sa'orikinɔ kũ Yuda gbɛ̃ zɔ̃kɔ̃nɔ ń pínki yã gɔ̃̀gɔ̃ Yesui de ò a dɛ. 2Ò a yĩ̀, akũ ò gɛ̀ɛ ò a nà bùsu gbɛ̃ zɔ̃kɔ̃ Pilatinɛ a ɔ̃i.
3Kũ Yudasi kũ à bò a kpɛ è yã dàala, à gɔ̃̀ díndɔ̃mɛnɛ gũn, akũ à gɛ̀ɛ andurufu ɔgɔ mɛ̀n baraakurii pì ɛra sa'orikinɔnɛ kũ gbɛ̃ zɔ̃kɔ̃nɔ 4à pìńnɛ: Ma durunna kɛ̀, ma taarisaride kpà gai. Akũ ò pìnɛ: Ó bàka ũgbaa? N yãn gwe. 5Akũ Yudasi ɔgɔ pìi zù Luda kpɛ́n, akũ à tà à gɛ̀ɛ à a zĩda lòko. 6Akũ sa'orikinɔ ɔgɔ pìi sɛ̀tɛ ò pì: Ɔgɔ pì kana Luda kpɛ́ ɔgɔdaki gũn zɛ́ vĩro, zaakũ gbɛ̃dɛ'ɔgɔmɛ. 7Kũ ò yã gɔ̃̀gɔ̃, akũ ò orobori gbĩ̀dãki lù kũ ɔgɔ pìio nibɔnɔ vĩki ũ. 8Abire yãi ari kũ a gbãrao òdi pi zĩtɛ pìinɛ Zĩtɛ Arude. 9Akũ yã kũ annabi Ilimia òo kɛ̀ à pì: Ò andurufu ɔgɔ mɛ̀n baraakurii pìi sɛ̀tɛ, ɔgɔ kũ Isarailanɔ zɛ̀o ò kpà a yã musu pìi, 10akũ ò orobori gbĩ̀dãki lùo, lákũ Dikiri dìtɛmɛnɛ nà.
Pilati yãkpatɛkɛna kũ Yesuo
(Maa 15:2-5; Luk 23:3-5; Yuh 18:33-38)
11Yesu zɛna bùsu gbɛ̃ zɔ̃kɔ̃ arɛ. Akũ gbɛ̃ zɔ̃kɔ̃ɔ pì a là à pì: Mɔkɔ̃n Yudanɔ kína ũ yá? Yesu wèa à pì: Lɛn n ò lɛ. 12Gɔrɔ kũ sa'orikinɔ kũ gbɛ̃ zɔ̃kɔ̃nɔ tɛn yã didia, adi yãke weḿmaro. 13Akũ Pilati pìnɛ: Ńdi yã dasi kũ òtɛn didimma maroo? 14Ama Yesu dí yãke o yã pìnɔ doke musuro, akũ yã pìi bò bùsu gbɛ̃ zɔ̃kɔ̃ɔ pìi sarɛ manamana.
Yãdana Yesula
(Maa 15:6-15; Luk 23:13-25; Yuh 18:39-19:16)
15Vĩnla dikpɛ zĩ pínki bùsu gbɛ̃ zɔ̃kɔ̃ɔ pìi dì purusunanɔ do kũ gbɛ̃nɔn yei gbarɛńnɛ. 16Gɔrɔ kũ̀a sɔ̃ purusuna tɔ́de kú gwe òdi pi Baraba. 17Kũ pari kàkara, akũ Pilati ń lá à pì: Dín á ye mà gbarɛárɛɛ? Baraban yá, ke Yesu kũ òdi pi Arumasihu? 18Zaakũ à dɔ̃ kũ nɛ̀sɛgɔ̃ba vĩna kũ Yesuo yãin ò a kpàawa.
19Gɔrɔ kũ Pilati vutɛna a gbĩ̀gbaaa, a nanɔ gbɛ̃ zĩ̀a à pì: Ǹsun yãke kɛ gbɛ̃ mana pìinɛro, zaakũ nana kũ ma ò a yã musu gĩa gwãani wari dɔ̀ma manamana.
20Sa'orikinɔ kũ gbɛ̃ zɔ̃kɔ̃nɔ nàkara gbɛ̃nɔa ò Baraba gbɛka, ò pi ò Yesu dɛ. 21Akũ bùsu gbɛ̃ zɔ̃kɔ̃ɔ pìi ń lá à pì: Gbɛ̃nɔn pla pìnɔ gũn, dín á ye mà gbarɛárɛɛ? Akũ ò pì, Barabamɛ. 22Akũ Pilati ń lá à pì: Bɔ́n mani kɛ kũ Yesu kũ òdi pi Arumasihuoo? Gbɛ̃ sĩnda pínki pì: Ǹ a pá lía. 23Akũ à ń lá à pì: Bɔ́ dàan à kɛ̀ɛ? Akũ ò wiki lɛ̀ ò kàra ò pì: Ǹ a pá lía. 24Kũ Pilati è áni fɔ̃ à yãke kɛro, zuka tɛn kara, akũ à í dã̀, à a ɔ pìpi gbɛ̃nɔ wára à pì: Ma ɔ bɔ̀tɛ gbɛ̃ pì gana yãn. Á yãmɛ. 25Akũ gbɛ̃ pìnɔ pì: A dɛna yã wí ó musu kũ ó nɛ́nɔ. 26Akũ à Baraba gbàrɛńnɛ, à pì ò Yesu gbɛ̃ kũ flã̀ao ò a pá lía.
Sozanɔ Yesu fobonaa
(Maa 15:16-20; Yuh 19:2-3)
27Akũ Pilati sozanɔ gɛ̃̀ kũ Yesuo bùsu gbɛ̃ zɔ̃kɔ̃ɔ pì bɛa, akũ ò ń gã̀ kàkara pínki ò lìkai. 28Ò a pɔ́nɔ bɔ̀tɛa ò arukĩmba tɛ̃ra dànɛ, 29akũ ò lɛ̀ fùraa tã̀ ò kùnɛ, ò leba nànɛ a ɔplan gò ũ. Akũ òtɛn kútɛkutɛnɛ, òtɛni a fobo òtɛn pi: Fɔɔ, Yudanɔ kína! 30Ò lɛ́'i sùa, ò leba pìi sɛ̀ ò a lɛ̀o a mìia. 31Kũ ò a fobò ò làka, akũ ò arukĩmba pìi gòala ò a zĩda pɔ́kasanɔ dànɛ, akũ òtɛn gɛ́ a pá lía.
Yesu pana lía
(Maa 15:21-32; Luk 23:26-43; Yuh 19:17-27)
32Kũ ò bɔ̀tɛ òtɛn gɛ́, ò dàkarɛ kũ Sirɛni gbɛ̃ kũ òdi pi Simɔo, akũ ò gã nàa à Yesu lígbãndurukpana sɛ́. 33Akũ ò kà gu kũ òdi pi Gɔgɔta kũ à pì mìtokoki. 34Akũ ò sèwɛ̃ kũ ò yã̀katɛ kũ ɛzɛo dɔ̀nɛ à mi. Kũ à í kɛ̀, akũ à gì mii. 35Kũ ò a pà lía, akũ ò kàpaa kpà ò a pɔ́kasanɔ kpàatɛkɔ̃nɛ. 36Akũ ò vùtɛ òtɛni a dãkpã gwe. 37Ò yã kũ ò dìaa kɛ̃̀ ò nà a mìla ò pì:
Yudanɔ kína Yesun dí.
38Akũ ò kpãni wɛ́dewɛnɔ pà lía a sarɛ gbɛ̃nɔn pla, gbɛ̃ do a ɔplai, gbɛ̃ do a ɔzɛi. 39Gbɛ̃ kũ òtɛn gɛ̃ zɛ́la gwenɔ tɛni ń mì kɛ dékũdekũ, òtɛni a sɔ̃sɔ̃ 40ò pì: Mɔkɔ̃n kũ n pì ĩni Luda kpɛ́ wí ǹ ɛra ǹ bo gɔrɔ aakɔ̃ daguran gweroo? Tó mɔkɔ̃mmɛ Luda Nɛ́ ũ, ǹ n zĩda sura ba ǹ kipa lía. 41Lɛmɛ dɔ sa'orikinɔ kũ ludayãdannɛrinɔ kũ gbɛ̃ zɔ̃kɔ̃nɔ tɛni a fobo lɛ ò pì: 42À gbɛ̃ pãndenɔ sura bà, ama ani fɔ̃ à a zĩda sura baro. Isarailanɔ kínanloo? À kipa lía tera, óni a náani kɛ. 43À Luda náani vĩ. Tó Luda yei, à a bo sà, zaakũ à pì akãamɛ Luda Nɛ́ ũ. 44Bee kpãni kũ ò ń pá lía lɛɛlɛnɔ tɛni a sɔ̃sɔ̃ lɛ dɔ.
Yesu ganaa
(Maa 15:33-41; Luk 23:44-49; Yuh 19:28-30)
45Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mɔ̀ aakɔ̃. 46Fãnantɛ̃ mɔ̀ aakɔ̃n Yesu wiki lɛ̀ gbãnagbãna à pì: Ɛloi, Ɛloi, lɛma sabatani! Abirekũ pì, ma Luda, ma Luda, à kɛ̀ dera n ma tonn? 47Kũ gbɛ̃ kũ ò zɛna gwe kenɔ yã pìi mà, akũ ò pì: Dake tɛn Iliasu sísi. 48Zaa gwe gɔ̃̀nɔ ń gbɛ̃ do bàa lɛ̀ à gɛ̀ɛ à sako sɛ̀ à dà sèwɛ̃ kpã̀kpãa gũn, à fĩ̀fĩ lebaa, akũ à dɔ̀ Yesunɛ à mi. 49Akũ gbɛ̃ kparanɔ pì: À zɛ gĩa ò gwa tó Iliasu ni su à a sura ba. 50Yesu ɛ̀ra à wiki gbãna lɛ̀ dɔ, akũ à a wɛ̃̀ndii gbàrɛ.
51Akũ Luda kpɛ́ lábure kɛ̃̀kɔ̃a pla bona musu suna zĩtɛ. Zĩtɛ yĩ̀gãyĩgã, gbɛ̀nɔ pàrapara, 52miranɔ wɛ̃̀wɛ̃, akũ Luda gbɛ̃nɔ fùtɛ bona gan dasi. 53Yesu vuna gan gbɛra ò bɔ̀tɛ miran, ò gɛ̃̀ Luda wɛ̃tɛn, gbɛ̃nɔ ń é dasi. 54Kũ sozanɔ gbɛ̃ zɔ̃kɔ̃ kũ a gbɛ̃ kũ òtɛn Yesu dãkpãnɔ zĩtɛ yĩgãyĩgãnaa pìi è kũ yã kũ ò kɛ̀nɔ pínki, vĩna ń kũ manamana ò pì: Yãpuramɛ Luda Nɛ́n gbɛ̃ dí ũ. 55Nɔgbɛ̃nɔn kú gwe dasi, òtɛn gu gwa zã̀ dire. Ò tɛ́ Yesui bona Galilimɛ, òdigɔ̃ pɔ́ble kɛnɛ. 56Ń tɛ́n Mariama Magadalɛni kun kũ Mariamao Yamisi kũ Yusufuo da kũ Zebedi nɛ́nɔ dao.
Yesu vĩnaa
(Maa 15:42-47; Luk 23:50-56; Yuh 19:38-42)
57Kũ ɔkɔsi kɛ̀, Arimatea gbɛ̃ ɔgɔde kũ òdi pinɛ Yusufu sù. Yesu ìbaamɛ dɔ. 58À gɛ̀ɛ à Yesu gɛ̀ɛ gbɛ̀ka Pilatia, akũ Pilati pì ò kpáa. 59Kũ Yusufu gɛ̀ɛ pìi sɛ̀, a táaru biza dufu fĩ̀fĩa, 60à a dà a zĩda gbɛ̀wɛɛ kũ ò sɔ̀ mira ũ gũn. Akũ à gbɛ̀ gbɛ̃̀ntɛ̃ɛ gbigiri kɛ̀ à tà wɛ̀ɛ pìlɛ à tà. 61Mariama Magadalɛni kũ Mariama pãnde pìio vutɛna gwe, ò arɛdɔna miraa.
62Kũ gɔrɔ lìtɛ, kámmabogɔrɔ zĩ kà, akũ sa'orikinɔ kũ Farisinɔ gɛ̀ɛ Pilati kĩnaa lɛɛlɛ 63ò pì: Yã kũ gbɛ̃kɛkɛrii pìi ò a bɛ̃nɛ zĩ dɔógu à pì, gɔrɔ aakɔ̃ gbɛra áni vu. 64Ǹ tó ògɔ̃ mira pì dãkpã ari a gɔrɔ aakɔ̃de zĩ. Tó lɛnlo, a ìbanɔ ni su ò a gɛ̀ sɛ́ kpãni, oni o gbɛ̃nɔnɛ à fùtɛ bona gan. Ɛ́kɛ kpɛ bire nigɔ̃ de a káakupɔla. 65Akũ Pilati pìńnɛ: À sozanɔ sí à gɛ́ à mira pì dãkpã lákũ áni fɔ̃ nà. 66Akũ ò gɛ̀ɛ ò sèedaa kɛ̀ miragbɛɛa, ò sozanɔ tò gwe ògɔ̃ dãkpã.
Currently Selected:
MATIU 27: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.