MATIU 26

Lɛ́kpakũsũna Yesuii

(Maa 14:1-2; Luk 22:1-2; Yuh 11:45-53)

1Kũ Yesu yã birenɔ ò pínki à làka, akũ à pì a ìbanɔnɛ: 2Á dɔ̃ kũ Vĩnla dikpɛ gɔ̃̀ gɔrɔ pla, oni Bisãsiri Nɛ́ kpáḿma ò a pá lía.

3Abire gbɛra sa'orikinɔ kũ Yuda gbɛ̃ zɔ̃kɔ̃nɔ kɔ̃ kàkara sa'oriki zɔ̃kɔ̃ kũ òdi pi Kayafa bɛa. 4Ò yã gɔ̃̀gɔ̃ ɔ̃ndɔ̃o lákũ oni Yesu kũ ò a dɛ nà 5ò pì: Òsun kɛ dikpɛ zĩro, de gbɛ̃nɔ sún zuka káro yãi.

Nísi gbĩ nna kuna Yesu mìia

(Maa 14:3-9; Yuh 12:1-8)

6-7Kũ Yesu kú Bɛtani, Simɔ Kusu bɛa, àtɛn pɔ́ ble gɛngɛsɛkɛna, akũ nɔgbɛ̃ ke nài, à lo fítinna kũ nísi gbĩ nna ɔgɔde kú a gũn kũna, akũ à kù Yesu mìia. 8Kũ a ìbanɔ è lɛ, akũ ń pɔ fùtɛ ò pì: Bɔ́n pɔ́ lalasekɛna dí ũu? 9De ò nísi pì yìa yã kũ ɔgɔ zɔ̃kɔ̃ɔo ò kpà takasidenɔa. 10Yesu dɔ̃̀ḿma, akũ à pìńnɛ: Bɔ́yãi átɛn wari dɔ nɔgbɛ̃ pìiaa? À zĩ mana kɛ̀mɛnɛmɛ. 11Takasidenɔn kú kãáo gɔrɔ sĩnda pínki, makũ sɔ̃ manigɔ̃ kú kãáo gɔrɔ sĩnda pínkiro. 12Kũ à nísi pìi kù ma mɛ̀ɛa, à kɛ̀ lɛ de à ma gɛ̀ kɛomɛ. 13Yãpuran matɛn oárɛ, gu kũ òtɛni ma baaru nna waazi kɛn andunia gũn pínki, onigɔ̃ yã kũ nɔgbɛ̃ pìi kɛ̀ o a dɔngu yãi.

Yudasi bona Yesu kpɛ

(Maa 14:10-11; Luk 22:3-6)

14Abire gbɛra gbɛ̃nɔn kuri awɛɛplanɔ do kũ òdi pinɛ Yudasi Isikariɔti gɛ̀ɛ sa'orikinɔ kĩnaa 15à pì: Tó ma Yesu kpàáwa, bɔ́n á ye à kpámaa? Akũ ò andurufu ɔgɔ mɛ̀n baraakurii nàro ò kpàa. 16Zaa gɔrɔ birean àtɛn zɛ́ wɛtɛ à Yesu kpáḿma.

Vĩnla pɔ́blenaa

(Maa 14:12-21; Luk 22:7-14; Yuh 13:21-38)

17Burodi Futɛnasari dikpɛ gɔrɔ káaku zĩ Yesu ìbanɔ sù ò a là ò pì: Mán ń ye ò gɛ́ kɛkɛnnɛ ǹ Vĩnla pɔ́ blenn? 18À wèḿma à pì: À gɛ́ wɛ̃tɛn gɔ̃gbɛ̃ ke kĩnaa à pinɛ, Dannɛri pì a gɔrɔ kà kãni. A bɛan áni Vĩnla pɔ́ blen kũ a ìbanɔ. 19Yesu ìbanɔ kɛ̀ lákũ à dàńnɛ nà, ò Vĩnla pɔ́bleyã kɛ̀kɛ. 20Kũ ɔkɔsi kɛ̀, Yesu gɛngɛsɛkɛna teburuui kũ a gbɛ̃nɔn kuri awɛɛpla pìnɔ. 21Gɔrɔ kũ òtɛn pɔ́ ble à pì: Yãpuran matɛn oárɛ, á gbɛ̃ mɛ̀n do ni ma kpáḿma. 22Ń nɛ̀sɛɛ yàka manamana, akũ òtɛni a la dodo: Asa makũmɛroo, Dikiri? 23Yesu wèḿma à pì: Gbɛ̃ kũ ótɛn ɔ kakara ta gũn lɛɛlɛ mɛ́ ani ma kpáḿma. 24Bisãsiri Nɛ́ ni kpágui lákũ à kɛ̃na a yã musu nà, ama waiyoo gbɛ̃ kũ ani Bisãsiri Nɛ́ kpáḿma pìi. Ani kɛ sã̀na adenɛ tó odi a i yãro. 25Akũ Yudasi kũ ani a kpáḿma pì pì: Asa makũmɛroo, Rabi? Yesu pìnɛ: Mɔkɔ̃mmɛ n ò gwe.

Dikiri pɔ́ble

(Maa 14:22-26; Luk 22:14-20; 1Kɔ 11:23-25)

26Kũ òtɛn pɔ́ ble, Yesu burodii sɛ̀, à arubarikaa dàn, akũ à lìkɔ̃rɛ à kpà a ìbanɔa à pì: À sí à só, ma mɛ̀ɛn dí. 27Akũ à toko sɛ̀ dɔ à arubarikaa dàn, à kpàḿma à pì: À mi á pínki. 28Ma arun dí, Luda bàka kunna kũ gbɛ̃ dasinɔ aru ũ, kũ ani bɔtɛma ń durunnanɔ kɛ̃mmana yãi. 29Matɛn oárɛ, zaa gbãra mani geepi'i dí mi doro ari kpata kũ à bò ma De kĩnaa gɛ́ boo gupuraa, gbasa mà a dufu mi kãáo sà. 30Kũ ò lɛ̀ɛ sì, akũ ò bɔ̀tɛ ò gɛ̀ɛ Kùkpɛ sĩ̀sĩgɛrɛɛi.

Yesu gĩnakɛ à dɔ̃ yã kũ Pita ni kɛ

(Maa 14:27-31; Luk 22:31-34; Yuh 13:36-38)

31Akũ Yesu pìńnɛ: Á pínki áni fuma gwãaniala, zaakũ ò kɛ̃̀ Luda yãn ò pì: Mani sãdãri lɛ́, sãnɔ ni fãkɔ̃a. 32Ama ma vunaa gbɛra mani doárɛ arɛ gɛna Galili. 33Akũ Pita pìnɛ: Bee tó ò fùmma ń pínki, mani fumma zikiro. 34Akũ Yesu pìnɛ: Yãpuran matɛn onnɛ, gwãaniala ari ko gɔ̃ gɛ́ lɛ́ zu, ĩni ledi kpámai gɛ̃̀n aakɔ̃. 35Pita pìnɛ: Bee tó mani sù mà ga kũnwo, mani ledi kpányĩ zikiro. Akũ a ìbanɔ ò lɛ se ń pínki.

Yesu aduakɛna zaa Gɛtɛsɛmani

(Maa 14:32-42; Luk 22:39-46)

36Akũ Yesu kũ a ìbanɔ kà gu kũ òdi pi Gɛtɛsɛmani, akũ à pìńnɛ: À vutɛ la ari mà gɛ́ adua kɛ zã̀ dire. 37À Pita kũ Zebedi nɛ́ gbɛ̃nɔn planɔ sɛ̀ à gɛ̀ɛ kũńwo. A pɔ sira kũ̀ à nɛ̀sɛyɔkɔ sì. 38Akũ à pìńnɛ: Ma pɔ sira kũ̀ manamana ari ga lɛ́i. À zɛ la à itɛ̃ kɛ kũmao. 39Kũ à gɛ̀ɛ arɛ fíti, akũ à kùtɛ zĩtɛ à adua kɛ̀ à pì: Baa, tó ani sí kɛ, ǹ tó toko'i díkĩna gɛ̃tɛmala. Ama adi kɛ lákũ má yei nàro, séde lákũ ń yei nà. 40Akũ a ɛ̀ra à sù à a ìbanɔ lè, òtɛn i o. Akũ à pì Pitanɛ: Lɛn yá? Ádi fɔ̃ a itɛ̃ kɛ̀ kũmao bee awa doroo? 41À itɛ̃ kɛ àgɔ̃ adua kɛ de àsun fu yɔ̃ogwanaaaro yãi. Nini yei, ama mɛ̀ɛ busɛ. 42À kɛ̃̀ḿma a gɛ̃̀n plade, à adua kɛ̀ à pì: Baa, tó toko díkĩna ni gɛ̃tɛmala a í minaa sariro, ǹ tó n pɔyenyĩna kɛ. 43Kũ à ɛ̀ra à sù à ń lé, òtɛn i o dɔ, zaakũ òtɛn idekũ dɛdɛ. 44Akũ à ń tón dɔ, à gɛ̀ɛ à wɛ́ kɛ̀ a gɛ̃̀n aakɔ̃de, à yã dokɔ̃nɔ pìi ò dɔ. 45Akũ à ɛ̀ra à sù a ìbanɔ kĩnaa à pìńnɛ: Átɛn i o, átɛn kámma bo ari teran yá? À gwa! Gɔrɔ kà kãni. Ò Bisãsiri Nɛ́ kpà durunnakɛrinɔa. 46À futɛ ò tá. Gbɛ̃ kũ à ma nańnɛ ń ɔĩ tɛn su.

Yesu kũnaa

(Maa 14:43-50; Luk 22:47-53; Yuh 18:3-12)

47Kũ à kpɛ́ àtɛn yã pì o, akũ Yudasi, a ìba gbɛ̃nɔn kuri awɛɛplanɔ doke sù kũ pario, ò fɛ̃nɛdanɔ kũna kũ gònɔ, ò bò sa'orikinɔ kũ Yuda gbɛ̃ zɔ̃kɔ̃nɔ kĩnaa. 48Bonkpɛde pì sɔ̃, à sèedaa òńnɛ à pì: Gbɛ̃ kũ mani lɛ́ pɛ́a, àkũmɛ gwe. À a kũ. 49Akũ à mìi dɔ̀ Yesua gɔ̃̀nɔ à pì: Fɔɔ, Rabi! Akũ à lɛ́ pɛ̀a. 50Yesu pìnɛ: Ma gbɛ̃, ǹ n kɛna kɛ! Akũ ò sù ò ɔ pɛ̀tɛ Yesua ò a kũ̀. 51Akũ Yesu gbɛ̃nɔ do a fɛ̃nɛda wòto, à sa'oriki zɔ̃kɔ̃ zĩ̀rii lɛ̀o à a sã gò. 52Akũ Yesu pìnɛ: Ǹ n fɛ̃nɛda sɔtɔ a plɛn. Zaakũ gbɛ̃ kũ à zɛ̀ kũ fɛ̃nɛdao, fɛ̃nɛda mɛ́ ani a dɛ. 53Tó má ye ma De malaika zĩ̀karinɔ gbarɛmɛnɛ gɔ̃̀nɔ de gã̀ kuri awɛɛplanɔla, ń dɔ̃ mani fua mà a wɛ́ kɛan yá? 54Tó ma kɛ̀ lɛ sɔ̃, deran yã kũ ò kɛ̃̀ Luda yãn ò pì ani kɛ lɛ ni kɛɛ? 55Akũ Yesu pì parinɛ: Kpãni wɛ́dewɛn ma ũ kũ a su à ma kũ kũ fɛ̃nɛdanɔ kũ gònɔo yá? Madìgɔ̃ vutɛ Luda ɔnn lákũ gu dìgɔ̃ dɔ nà madìgɔ̃ yã daárɛ, ádi ma kũro. 56Ama yã pìi kɛ̀ pínki, de yã kũ annabinɔ kɛ̃̀ Luda yãn kɛ yãi. Akũ a ìbanɔ bàa lɛ̀ ń pínki ò a tòn.

Yuda gbãnadenɔ yãkpatɛkɛna kũ Yesuo

(Maa 14:53-65; Luk 22:54-55, 63-71; Yuh 18:13-14, 19-24)

57Gbɛ̃ kũ ò Yesu kũ̀nɔ gɛ̀ɛ kãao sa'oriki zɔ̃kɔ̃ Kayafa bɛa. Ludayãdannɛrinɔ kũ gbɛ̃ zɔ̃kɔ̃nɔ kakarana gwe. 58Pita tɛ́ a kpɛ zã̀ dire ari sa'oriki zɔ̃kɔ̃ɔ pìi bɛa. À gɛ̃̀ ɔnn, à vùtɛ kũ dogarinɔ de à yã pìi mìdɛna e. 59Sa'orikinɔ kũ Yuda yãkpatɛkɛrinɔ ń pínki tɛn sèeda wɛtɛ Yesua ò a dɛ. 60Bee kũ gbɛ̃nɔ sù ò ɛ́kɛyãnɔ dìdia dasi, adi kɛro. Kpɛkpɛ gbɛ̃nɔn pla kenɔ sù 61ò pì: Gbɛ̃ pìi pì, áni fɔ̃ à Luda kpɛ́ wí, áni ɛra à bo gɔrɔ aakɔ̃ dagura sɛ́! 62Akũ sa'oriki zɔ̃kɔ̃ɔ fùtɛ à zɛ̀ à pì Yesunɛ: Ń yãke vĩ ǹ weḿmaroo? Yã kũ òtɛn didimma dí de deraa? 63Yesu yĩtɛ kpɛ̃n, akũ sa'oriki zɔ̃kɔ̃ɔ pìi pìnɛ: Ma nannɛ Luda Wɛ̃̀ndidei, ǹ owɛrɛ tó Luda Nɛ́ Arumasihumɛ n ũ. 64Yesu wèa à pì: Lɛn n ò lɛ. Makũ sɔ̃, matɛn oárɛ, zaa gbãra áni Bisãsiri Nɛ́ e vutɛna Gbãnasĩndapinkide ɔplai, akũsɔ̃ áni a suna e ludambɛ lukun. 65Akũ sa'oriki zɔ̃kɔ̃ɔ pì a utanɔ gà à kɛ̃̀ à pì: A dɔkɛ̀ kũ Ludao! À kɛ̀ dera ótɛn sèedade pãnde kenɔ wɛtɛ dɔɔ? A mà lákũ à dɔkɛ̀ kũ Ludao nà. 66Yã kpaten a zɛo teraa? Akũ ò wèa ò pì: A taari kà ò a dɛ. 67Akũ ò lɛ́'i sù a ãnnwa, ò a lɛ̀lɛ kũ okũo. Gbɛ̃kenɔ a sãn kɛ̀kɛ 68ò pì: Arumasihu, ǹ annabikɛyã o ǹ gbɛ̃ kũ à n lɛ owɛrɛ.

Pita ledikpana Yesui

(Maa 14:66-72; Luk 22:56-62; Yuh 18:15-18, 25-27)

69Pita vutɛna ɔnn, akũ zɔ̀nɔkpare ke sù à pìnɛ: Mɔkɔ̃n sɔ̃ ndìgɔ̃ kú lɛɛlɛ kũ Galili gbɛ̃ Yesu pìiomɛ. 70Akũ à ledi kpà ń pínki wára à pì: Mádi yã kũ ntɛn o dɔ̀rɔ dɔ̃ro. 71Akũ à fùtɛ à gɛ̃̀ gãnun. Nɔgbɛ̃ pãnde a è, akũ à pì gbɛ̃ kũ ò kú gwenɔnɛ: Gbɛ̃ díkĩna lɛɛlɛ kũ Yesu Nazɛraomɛ. 72Pita ɛ̀ra à ledi kpà à la dà à pì: Má gbɛ̃ pì dɔ̃ro. 73Kũ à kɛ̀ saa fíti, gbɛ̃ kũ ò zɛna gwenɔ nà Pitai ò pì: Yãpuramɛ, ń gbɛ̃ domɛ n ũ, zaakũ ó n dɔ̃ n yã'onaaamɛ. 74Akũ à fùtɛ à a zĩda kà à la dà à pì: Má gbɛ̃ pì dɔ̃ro. Zaa gwe gɔ̃̀nɔn ko lɛ́ zù. 75Akũ yã kũ Yesu òo dɔ̀ Pitagu kũ à pì, ari ko gɔ̃ gɛ́ lɛ́ zu, ani ledi kpáai gɛ̃̀n aakɔ̃. Akũ Pita bò bàai à pɔsira ɔ́ɔ dɔ̀.

Currently Selected:

MATIU 26: BB2005

Highlight

Copy

Compare