MATIU 18

Tɛna Yesui lán nɛ́ bà

(Maa 9:33-48; Luk 9:46-48; 15:3-7)

1Zĩ kũ̀a Yesu ìbanɔ sù ò a là ò pì: Dí mɛ́ à deńla kpata kũ à bò Luda kĩnaa gbɛ̃nɔ tɛ́ɛ? 2Akũ Yesu nɛ́ fíti ke sìsi à a zɛ̀ ń arɛ 3à pì: Yãpuran matɛn oárɛ, tó ádi nɛ̀sɛ litɛ a gɔ̃ lán nɛ́ fíti bàro, áni gɛ̃ kpata kũ à bò Luda kĩnaa gũnlo. 4Gbɛ̃ kũ à a zĩda bùsa à gɔ̃̀ lán nɛ́ fíti díkĩna bà, ade mɛ́ à deńla kpata kũ à bò Luda kĩnaa gbɛ̃nɔ gũn. 5Gbɛ̃ kũ à nɛ́ bire taka sì ma ìbakɛ yãi, makũmɛ à ma si.

Yã kũ àdi tó ò sãtɛ

6Tó gbɛ̃ tò nɛ́ kũ à ma náani vĩ díkĩnanɔ do sã̀tɛ, anigɔ̃ sã̀na adenɛ ò wísilɔgbɛ gbɛ̃̀ntɛ̃ dɔ a wakalɛ ò a zu sɛ̀bɛ lòkoton. 7Waiyoo andunia, kũ yã kũ àdi tó ò sãtɛ kú a gũn yãi. Séde yã kũ àdi tó ò sãtɛ gɔ̃ kun, ama waiyoo gbɛ̃ kũ sãtɛna yã pìi bò a kĩnaa. 8Tó n ɔ ke n gbá mɛ́ àdi tó ǹ sãtɛ, ǹ zɔ̃ ǹ zukũna. À sã̀nannɛ ǹ gɛ̃ wɛ̃̀ndii gũn kũ ɔ kusuo ke ɛrɛ ũ de n gɔ̃ ɔ mɛ̀n pla ke gbá mɛ̀n pla vĩla ò n zu tɛ́ kũ àdi garo gũn. 9Tó n wɛ́ mɛ́ àdi tó ǹ sãtɛ, ǹ bo ǹ zukũna. À sã̀nannɛ ǹ gɛ̃ wɛ̃̀ndii gũn kũ wɛ́ doo de n gɔ̃ wɛ́ mɛ̀n pla vĩla ò n zu tɛ́ gũn gyãwãnn.

Yãlɛkɔ̃ana kũ sã sãtɛnaao

10-11À laakari kɛ dɔkɛna kũ nɛ́ díkĩnanɔ dooi, zaakũ matɛn oárɛ, ń malaikanɔn kú musu, ò kú kɔ̃ wɛ́n kũ ma De kũ à kú gweo baala'i. 12Átɛn da deramɛɛ? Tó gbɛ̃ sã vĩ mɛ̀n basɔɔro, tó a do sã̀tɛ, ani a mɛ̀n basɔɔro donsari tó sĩ̀sĩgɛrɛɛi gwe, à gɛ́ à a sã kũ à sã̀tɛ pì wɛtɛroo? 13Yãpuran matɛn oárɛ, tó à bòa, a pɔ nigɔ̃ nnaa de a mɛ̀n basɔɔro donsari kũ odi sãtɛronɔla. 14Lɛn á De kũ à kú musu ye nɛ́ dínɔ doke sãtɛ sɔ̃ro lɛ.

Sùrukɛna kũ kɔ̃o

15Tó n gbɛ̃dake taari kɛ̀, ǹ gɛ́ ǹ a le ndo, ǹ yã pì bonɛ gupuraa. Tó à n yã mà, n n gbɛ̃ pìi milɛ blè. 16Tó adi n yã ma sɔ̃ro, ǹ gbɛ̃ mɛ̀n doke gbɛ̃nɔn pla sɛ́ ǹ namma, de à yã pì sí sèedade gbɛ̃nɔn pla ke aakɔ̃ musu. 17Tó à gì ń yã mai, ǹ yã pì o sɔsi gbɛ̃nɔnɛ. Tó à gì à sɔsi gbɛ̃ pìnɔ yã mai dɔ, ǹ a ditɛ kifiri ke gbɛ̃ zĩ̀tɔ ũ.

18Yãpuran matɛn oárɛ, pɔ́ kũ a yĩ̀ zĩtɛ yĩna musu, pɔ́ kũ a pòro zĩtɛ porona musu. 19Matɛn oárɛ dɔ, tó á gbɛ̃nɔn planɔ lɛ́ kɛ̀ dokɔ̃nɔ zĩtɛ la, yã kũ a a wɛ́ kɛ̀ ma De kũ à kú musua pínki, ani kɛárɛ. 20Zaakũ gu kũ gbɛ̃nɔn pla ke gbɛ̃nɔn aakɔ̃nɔ kɔ̃ kàkaran kũ ma tɔ́o, má kú ń tɛ́.

21Abire gbɛra Pita sù à Yesu là à pì: Dikiri, gɛ̃̀n ũgban mà sùru kɛ kũ ma gbɛ̃ kũ àdigɔ̃ taari kɛmɛnɛoo? Gɛ̃̀n supplan yá? 22Yesu wèa à pì: Matɛn onnɛ, adi kɛ gɛ̃̀n supplanlo, gɛ̃̀n suppla lɛu baaakɔ̃ akurimɛ.

23Abire yãi kpata kũ à bò Luda kĩnaa de lán dí bà. Kína ke mɛ́ à ye à a ɔgɔ yã gɔ̃gɔ̃ kũ a ìbanɔ. 24Kũ à nà ɔgɔ pì yãa, akũ ò sùnɛ kũ gbɛ̃ kũ à a fĩna sɛna miliɔ̃ wàa kuriio. 25Kũ à ɔgɔ vĩ à fĩnaa pì boro, akũ a dikiri pì ò a yía kũ a nanɔo kũ a nɛ́nɔ kũ pɔ́ kũ à vĩnɔ pínki gbasa ò a kɛ̃. 26Akũ ìbaa pìi wùtɛ a dikiri arɛ, à kútɛ kɛ̀nɛ à pì: Ǹ mɛna kɛ kũmao, mani n fĩna bonnɛ pínki. 27Akũ a dikiri a wɛ̃nda gwà a a gbàrɛ, à fĩnaa pìi tònɛ. 28Kũ ìbaa pìi bò dé, à dàkarɛ kũ a ìba dake kũ a fĩna dɔa andurufu ɔgɔ mɛ̀n basɔɔroo. Akũ à a kũ̀, àtɛn ɔ tɔ̃ a kòtooa à pì: Ǹ ma fĩna bomɛnɛ. 29A gbɛ̃dake pìi wùtɛ a arɛ, à kútɛ kɛ̀nɛ à pì: Ǹ mɛnamɛnɛ, mani n fĩna bonnɛ. 30Ama adi wero. À tò ò a dà kpɛ́siran ari à a fĩna bonɛ. 31Kũ a ìba kparanɔ è lɛ, ń pɔ yàka manamana, akũ ò gɛ̀ɛ ò yã kũ à kɛ̀ɛ pìi gbã̀ ń dikiriinɛ pínki. 32Akũ dikiri pì a sìsi à pì: Ìba pãsĩ! Ma n fĩnaa tònnɛ pínki, kũ n kútɛ kɛ̀mɛnɛ yãi. 33Lákũ ma sùruu kɛ̀ kũnwo nà, de n sùru kɛ̀ kũ n gbɛ̃dakeo lɛ se. 34A dikirii pì pɔ fɛ̃̀, à tò ò a dà kpɛ́siran, ògɔ̃ wɛ́ tãa ari à gɛ́ à fĩnaa pì boo pínki. 35Akũ Yesu ɛ̀ra à pì: Tó á baadi dì sùru kɛ kũ a gbɛ̃dakeo kũ nɛ̀sɛɛo mɛ̀n doro, lɛn ma De kũ à kú musu ni kɛárɛ lɛ se.

Currently Selected:

MATIU 18: BB2005

Highlight

Copy

Compare