MATIU 17

Yesu linaa

(Maa 8:34-9:13; Luk 9:23-36)

1Gɔrɔ suddo gbɛra Yesu Pita kũ Yamisio kũ a dakũna Yuhanao sɛ̀tɛ à gɛ̀ɛ kũńwo kpi leia ńtɛ̃nɛ. 2Akũ à lì ń wára. A ãn tɛn tɛ́ kɛ lán ifãntɛ̃ bà, a pɔ́kasanɔ gɔ̃̀ pú táitai lán legũpinaa bà. 3Akũ Musa kũ Iliasuo bò ò sùḿma, òtɛn yã o kũ Yesuo. 4Akũ Pita pì Yesunɛ: Dikiri, à mana kũ ó kú la. Tó ń yei, mani kuta dɔ mɛ̀n aakɔ̃, n pɔ́ mɛ̀n do, Musa pɔ́ mɛ̀n do, Iliasu pɔ́ mɛ̀n do. 5Gɔrɔ kũ àtɛn yã o, ludambɛ luku tɛ́kɛnaa dàńla, akũ ò kòtoo mà a gũn à pì: Àkũmɛ ma Nɛ́ mɛ̀n do légelege yenyĩde ũ, a yã dì kámagu. À a yã ma. 6Kũ a ìbaa pìnɔ kòtoo pìi mà, vĩna ń kũ manamana, ò wùtɛ ń gbɛrɛa. 7Akũ Yesu nàńyĩ, à ɔ nàḿma à pì: À futɛ, àsun vĩna kɛro. 8Kũ ò wɛ́ sɛ̀ musu, odi gbɛ̃ke ero, sé Yesu ado.

9Kũ òtɛn kipa kpi pìia, Yesu dìtɛńnɛ à pì: Àsun wɛ́gupu kũ a è yã o gbɛ̃ke maro ari Bisãsiri Nɛ́ vu bona gan. 10Akũ a ìbanɔ a là ò pì: Bɔ́yãin ludayãdannɛrinɔ dì pi Iliasu mɛ́ ani su káakuu? 11Akũ à wèḿma à pì: Iliasu ni su yãpuramɛ, ani yã sĩnda pínki kɛkɛ a gbɛ̀n. 12Ama matɛn oárɛ, Iliasu sù kɔ̀, akũ odi a dɔ̃ro, akũ ò ń pɔyeinaa kɛ̀nɛ. Lɛn ò wɛ́ tã Bisãsiri Nɛ́a lɛ dɔ. 13Akũ a ìbanɔ dɔ̃̀ kũ Yahaya Da'itɛkɛri à tɛ́a.

Yesu nɛ́gɔ̃gbɛ̃ tãnade werekɔ̃anaa

(Maa 9:14-29; Luk 9:37-42)

14Kũ ò kà pari gũn, gɔ̃gbɛ̃ ke sù à kùtɛ Yesunɛ 15à pì: Dikiri, ǹ ma nɛ́ wɛ̃nda gwa, zaakũ gasindademɛ. Àdi wari kɛ manamana, àdigɔ̃ lɛ́tɛ tɛ́n ke ín baala'i. 16Ma su kãao n ìbanɔnɛ, odi fɔ̃ ò a wèrekɔ̃aro. 17Akũ Yesu pì: Gbãragbɛ̃ yakana ludanaanikɛrisarinɔ! Manigɔ̃ kú kãáo ari bɔrɛmɛɛ? Manigɔ̃ mɛna kãáo ari bɔrɛmɛɛ? À mɔmɛnɛ kũ nɛ́ pìio la. 18Yesu gì tãnanɛ, akũ à gò nɛ́ pìia, à wèrekɔ̃a gwe gɔ̃̀nɔ.

19Abire gbɛra Yesu ìbanɔ nài ńtɛ̃nɛ, ò a là ò pì: À kɛ̀ dera ódi fɔ̃ o pɛ́ tãna pìia à bòroo? 20À wèḿma à pì: Kũ á Luda náani vĩ zɔ̃kɔ̃ro yãimɛ. Yãpuran matɛn oárɛ: Tó á Luda náani vĩ fíti lán ɛfɔ wɛ́ bà, áni o kpi díkĩnanɛ à go la à gɛ́ zãa, ani kɛ lɛ. Yãke ni á furo. 21Tãna dí taka dì sí boro, sé kũ aduakɛnaao kũ lɛ́yĩnaao.

Yesu ɛra à a ga kũ a vunaao yã'onaa

(Maa 9:30-32; Luk 9:43-45)

22Gɔrɔ kũ à kú kũ a ìbanɔ lɛɛlɛ Galili, à pìńnɛ: Oni Bisãsiri Nɛ́ nańnɛ ń ɔĩ, 23oni a dɛ, a gɔrɔ aakɔ̃de zĩ ani vu. Akũ ń pɔ yàka manamana.

Luda ɔn ɔgɔ fĩnabonaa

24Kũ ò kà Kapɛnamu, Luda ɔn ɔgɔsirinɔ sù ò Pita là ò pì: Á dannɛrii dì Luda ɔn ɔgɔ kpároo? 25Pita wèḿma à pì: Àdi kpá. Kũ Pita tɛn gɛ̃ bɛ, Yesu gĩnakɛ à pìnɛ gɔ̃̀nɔ: Simɔ, dínɔn andunia dí kínanɔ dì bɛ'ɔgɔ ke ɛtɛ'ɔgɔ síḿmaa? Ń nɛ́nɔn yá ke gbɛ̃ pãndenɔmɛ? N yã pìi è deraa? 26Pita pì: Gbɛ̃ pãndenɔmɛ. Yesu pìnɛ: Tó lɛmɛ, ń nɛ́nɔ bàka kunlo. 27Ama de ó yã sún ũḿmaro yãi, ǹ gɛ́ ǹ daburu da sɛ̀bɛɛ gũn. Kpɔ̀ kũ ĩni kũ káaku, ǹ a lɛ́ wɛ̃, ĩni ɔgɔ le a gũn. Ǹ abirekũ sɛ́ ǹ kpáḿma, makũ kũ mɔkɔ̃nwo pɔ́ ũ.

Currently Selected:

MATIU 17: BB2005

Highlight

Copy

Compare