YƆSUA 1
1
Dikiri yãditɛna Yɔsuanɛ
1Dikiri zɔ̀bleri Musa ga gbɛra Dikiri yã ò Musa kpàasi Yɔsua, Nuni nɛ́nɛ à pì: 2Ma zɔ̀bleri Musa gà. Ǹ futɛ ǹ bikũ Yodaa la sà, mɔkɔ̃n kũ Isarailanɔ ń pínki, à gɛ̃ bùsu kũ ma kpàáwan. 3Gu kũ á gbá pɛ̀tɛn pínki, ma kpàáwa lákũ ma ò Musanɛ nà. 4Sɛna zaa gbárannan ari gɛna Lɛbana bùsun, sɛna zaa swa zɔ̃kɔ̃ kũ òdi pi Yuflati ari gɛna ísira kũ à kú ifãlɛtɛ kpa, Itinɔ bùsuu pì ni gɔ̃ á búsu ũ pínki. 5Ari ǹ gɛ́ gao gbɛ̃ke ni le à n gã̀ fĩro. Lákũ má kú kũ Musao nà, lɛn manigɔ̃ kú kũnwo lɛ. Mani n tónlo, mani pã kpányĩ zikiro.
6Ǹ zɛ gbãna ǹgɔ̃ wɔ́rɔgɔ vĩ, zaakũ mɔkɔ̃n mɛ́ ĩni bùsu kũ ma a la dà á dizi káakunɔnɛ ma pì mani kpáḿma sí ǹ kpá gbɛ̃ dínɔa. 7Ǹ zɛ gbãna ǹgɔ̃ wɔ́rɔgɔ vĩ dé! Ǹ laakari dɔ doka kũ ma zɔ̀bleri Musa dànnɛa ǹgɔ̃ kũna pínki. Ǹsun kɛ̃a ǹ na ɔplai ke ɔzɛiro, n tá ni kɛ nna. 8Ǹ tó Musa doka takada pì yã gɔ̃ da n lɛ́n, ǹgɔ̃ laasun lɛ́a fãnantɛ̃ kũ gwãanio. Ǹ laakari dɔ yã kũ à kú a gũnnɔa pínki ǹ zĩ kɛa, n tá nigɔ̃ nna n yã ni bo mana. 9Makũ mɛ́ ma yã dìtɛnnɛroo? Ǹ zɛ gbãna ǹgɔ̃ wɔ́rɔgɔ vĩ. Ǹsun tó vĩna n kũro, ǹsun bídi kɛro, zaakũ makũ Dikiri n Luda, manigɔ̃ kú kũnwo gu kũ ntɛn gɛ́n pínki.
10Akũ Yɔsua pì Isaraila don'arɛdenɔnɛ: 11À gɛ̃tɛ bùran à o gbɛ̃nɔnɛ ò zàna soru kɛ, zaakũ gɔrɔ aakɔ̃ gbɛra oni bikũ Yodaa la, oni gɛ́ bùsu kũ Dikiri ń Luda kpàḿma ògɔ̃ vĩ sí. 12Yɔsua pì Rubɛninɔnɛ kũ Gadanɔ kũ Manasenɔ kpadoo: 13À dɔ yã kũ Dikiri zɔ̀bleri Musa dìtɛárɛ dín, à pì Dikiri á Luda ni tó à kámmaboki le à bùsu díkĩna kpàáwa. 14Abire yãi á nɔgbɛ̃nɔ kũ á nɛ́ fítinɔ kũ á pɔ́kãdenɔ gɔ̃ bùsu kũ Musa kpàáwan Yoda bara la, á zĩ̀karinɔ do ń gbɛ̃nɔnɛ arɛ ò bikũ ń pínki, ògɔ̃ ń gɔ̃kɛbɔnɔ kũna ò kpáńyĩ 15ari Dikiri gɔ̃ tó á gbɛ̃nɔ kámmaboki le lákũ à kɛ̀árɛ nà, mɔ́kɔ̃nɔ sɔ̃ onigɔ̃ bùsu kũ Dikiri á Luda tɛn kpáḿma vĩ. Abire gbɛra áni su bùsu kũ à gɔ̃̀ á pɔ́ ũ díkĩna gũn, áni vutɛ bùsu kũ Dikiri zɔ̀bleri Musa kpàáwa Yoda bara la ifãboki kpa pìn. 16Akũ ò wèa ò pì: Yã kũ n dìtɛwɛrɛ pínki óni kɛ. Gu kũ n ó zĩn pínki óni gɛ́. 17Lákũ o zĩ kɛ̀ Musa yã nà pínki, lɛn óni zĩ kɛ n yãa lɛ se. Dikiri n Luda gɔ̃ kú kũnwo, lákũ à kú kũ Musao nà. 18Gbɛ̃ kũ à bò n yã kpɛ à gì yã kũ n dìtɛnɛ kɛi, ade gàmɛ. Ǹ zɛ gbãna ǹgɔ̃ wɔ́rɔgɔ vĩ dé!
Currently Selected:
YƆSUA 1: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
