EBERUNƆ 7

Sa'oriki Mɛlɛkizɛdɛki

1Mɛlɛkizɛdɛkimɛ Salɛmu kína ũ yã, Luda Musude sa'oriimɛ. Gɔrɔ kũ Ibrahĩ zĩ̀i blè kínanɔa àtɛn su, akũ Mɛlɛkizɛdɛki gɛ̀ɛ à dàalɛ, à sa mana ònɛ, 2akũ Ibrahĩ aruzɛkɛ kũ àtɛn suo pínki kuride kpàa. Mɛlɛkizɛdɛki tɔ́ pìi pì, yãzɛde kína. Abire gbɛra Salɛmu kína bire pì, aafia kína. 3À de kũ dao kũ dizinɔ vĩro, a wɛ̃̀ndi naana ke mìdɛna vĩro. À bò lán Luda Nɛ́ bàmɛ, sa'oriin a ũ gɔrɔ sĩnda pínki.

4À gwa lákũ à zɔ̃kɔ̃ nà. Ó dizi káaku Ibrahĩ aruzɛkɛ kũ à sɛ̀tɛ zĩ̀lan kuride kpàa. 5Musa doka dìtɛ Levi buri kũ ò de sa'ori ũnɔnɛ, ò pɔ́ kuride sí ń Isaraila dakenɔa, bee kũ ń Ibrahĩ burikɛo. 6Mɛlɛkizɛdɛki bi Levi burinlo. Bee kũ abireo à Ibrahĩ pɔ́nɔ kuride sì, à sa mana ò Ibrahĩ kũ Luda lɛ́ sɛ̀nɛɛnɛ. 7Sikaa sari gbɛ̃ kũ à sa mana ò gbɛ̃nɛ zɔ̃kɔ̃ de gbɛ̃ kũ à sa mana ònɛla. 8Sa'ori kũ òdi pɔ́ kuride sí pìnɔ bi gbɛ̃ kũ òdi ganɔmɛ. Mɛlɛkizɛdɛki sɔ̃, gbɛ̃ kũ ò pì àdigɔ̃ kun gɔrɔ sĩnda pínkin a ũ. 9-10Gɔrɔ kũ Mɛlɛkizɛdɛki gɛ̀ɛ à dà Ibrahĩlɛ, odi Levi i kɔ̀ro, à kú a dizi de Ibrahĩ wógbammɛ. Abire yãi oni fɔ̃ ò pi sé, gɔrɔ kũ Ibrahĩ pɔ́ kuride pìi kpà, Levi buri kũ òdi pɔ́ kuride kpáḿmanɔ mɛ́ ò kpà.

Yesu de lán Mɛlɛkizɛdɛki bà

11Levi buri sa'orii pìnɔmɛ doka kũ Musa kpà Isarailanɔa zĩni ũ. Tó oni fɔ̃ ò tó gbɛ̃nɔ gɔ̃ papana, onigɔ̃ sa'ori pãnde ni vĩ lán Mɛlɛkizɛdɛki bà doro, sé Haruna buri sa'ori gã̀a. 12Tó sa'orinɔ lìtɛ, séde doka litɛ. 13Gbɛ̃ kũ ò yã birenɔ ò a musu bi Isaraila buri kũ a gbɛ̃ke dí sa'ona zĩ kɛ zikiromɛ. 14Zaakũ ó dɔ̃ sãnsãn kũ ó Dikiri bò Yuda buri gũmmɛ. Ódi ma kũ Musa sa'ona yã ò buri pìi musuro. 15Yã kũ yã pì wɛ́ bòn dí: Sa'ori pãnde bò lán Mɛlɛkizɛdɛki bà. 16A gɔ̃na sa'ori ũ bi doka ke burikɛ yãnlo. A wɛ̃̀ndi kũ àdi lákaro gbãna yãimɛ. 17Zaakũ ò pì:

Ĩnigɔ̃ de sa'ori ũ gɔrɔ sĩnda pínki Mɛlɛkizɛdɛki gã̀n.

18Ò doka kũ à kun yã pìi kpà kpado, kũ à gbãnaro, akũsɔ̃ à kun pɔ́ke ũro. 19Zaakũ doka pì dí tó gbɛ̃ke gɔ̃̀ papanaro. Akũ tãmaa kũ à sã̀na zɛ́ bòwɛrɛ, kũ o nao Ludai.

20Abire gbɛra Luda dí abirekũ kɛ ladanaa sariro. Gbɛ̃ kparanɔ gɔ̃̀ sa'orinɔ ũ ladanaa sarimɛ, 21ama Yesu gɔ̃̀ sa'ori ũ kũ ladanaao, kũ Luda pìnɛ:

Dikiri la dà ani lɛ́ sukparo,

à pì anigɔ̃ de sa'ori ũ gɔrɔ sĩnda pínki.

22Ladanaa pì yãi Yesumɛ zɛnkpɛkɛ ũ kũ Luda bàka kunna kũńwo dufu de a zĩla. 23Abire gbɛra sa'orinɔn dasi yã, zaakũ ga dì tó ògɔ̃ kú ń zĩ gũn gɔrɔ sĩnda pínkiro. 24Ama kũ Yesu kun gɔrɔ sĩnda pínki yãi, a sa'orikɛnaa gɛ̃nɛblena vĩro. 25Abire yãi ani fɔ̃ à gbɛ̃ kũ òdi na Ludai kũ a gbãnaonɔ sura ba mámmam, zaakũ à kun gɔrɔ sĩnda pínki de àgɔ̃ kútɛ kɛńnɛ Ludanɛ.

26Sa'oriki bire taka mɛ́ à kɔ̃ sì kũoo. A kunna adona. À yã vãni ke gbãsĩ vĩro. Luda a kɛ̃̀kɔ̃a kũ durunnakɛrinɔ, à a sɛ̀ à tào musu ari a kĩnaa. 27A bàka kú kũ sa'ona lákũ gu dìgɔ̃ dɔ nào lán sa'oriki kparanɔ bàro. Gbɛ̃ pìnɔ dì sa o ń zĩda durunnanɔ yãi kũ ń gbɛ̃nɔ pɔ́nɔ dɔ. Àkãa sɔ̃, à ò gɛ̃̀n domɛ, kũ à a zĩda kpà. 28Musa doka dì gbɛ̃nɔ ká sa'orikinɔ ũ ń gbãnasarikɛ gũmmɛ, ama kũ Luda sì kũ a kunnaao doka pì ditɛnaa gbɛra, akũ à a Nɛ́ kũ à gɔ̃̀ papana ari gɔrɔ sĩnda pínki kàn.

Currently Selected:

EBERUNƆ 7: BB2005

Highlight

Copy

Compare