EBERUNƆ 6

1Abire yãi ò Kirisi yãdannɛna káakupɔnɔ kpá kpɛ, ò gɛ́ arɛ ari ò gɔ̃ gbɛ̃ pɛkɛrɛnanɔ ũ. Adi kɛ óni ɛra ògɔ̃ yãtãkpatɛna dínɔ gbɛ̀ sísi dɔnlo: Kpɛlina yã gɛ̀nɔnɛɛ, ludanaanikɛnaa, 2da'itɛ yãdadanaa, ɔnammanaa, gɛ̀nɔ vuna ke zia yãkpatɛkɛnaa. 3Tó Luda wè, óni yã birenɔ kpá kpado ò gɛ́ arɛ. 4Zaakũ tó gbɛ̃ wɛ́ kɛ̃̀, à Luda gba lè, a baka kú Luda Nini gũmmɛ, 5tó à Luda yã kũ andunia kũ àtɛn su gbãnao í kɛ̀, à a nna dɔ̃̀ 6tó à fùa, zɛ́ kun kũ à ɛra à nɛ̀sɛ litɛ doro, zaakũ àtɛn Luda Nɛ́ pá lía dɔmɛ, àtɛn wé'i daa gupuraamɛ. 7Tó legũ tɛn ma zĩtɛ gɛ̃̀n baaakɔ̃ àtɛn mɔtɔ le, akũ à pɔ́ kũ à àre vĩ búbarinɔnɛ bùtɛ, Luda dì arubarika dan. 8Tó à lɛ̀ kũ lɛ̀karaaoo bùtɛ sɔ̃, à ginaamɛ, à zã̀ kũ lɛ́kɛnnɛnaaoro. Ani mì dɛ kũ tɛ́omɛ.

9Ákɔ̃nɔ sɔ̃ ma gbɛ̃ yenyĩdenɔ, bee kũ o ò lɛ, ó laakari kpatɛna á yã musu kũ á kú kũ yã mana kũ ò bò surabana zɛ́ gũnnɔ. 10Luda dì yã kɛ a zɛ́a, á yãkɛnanɔ kũ yenyĩ kũ á vĩ kãaoo ni sãaguro, zaakũ a kpányĩ kɛ̀ a gbɛ̃nɔnɛ, akũsɔ̃ á kpɛ́ átɛn kɛ. 11Ó ye á baadi gɔ̃ ania vĩ lɛ ari a lɛ́a, de ásun sika kɛ pɔ́ kũ á wɛ́ dɔi yã musuro. 12Ásun ma'ã kɛro. À gbɛ̃ kũ òtɛn Luda náani kɛ kũ mɛnao òtɛn pɔ́ kũ Luda a lɛ́ sɛ̀ lenɔ ágba sɛ́.

Lɛ́ kũ Luda sɛ̀ sika vĩro

13Gɔrɔ kũ Luda tɛn lɛ́ sɛ́ Ibrahĩnɛ, kũ gbɛ̃ke kun deala à sí kãaoro, a yãin à sì kũ a kunnaao 14à pìnɛ, áni arubarika daagu yãpura à tó a buri karanɛ. 15Ibrahĩ mɛna fɔ̃̀, akũ à pɔ́ kũ Luda a lɛ́ sɛ̀nɛɛ lè. 16Òdi la da kũ gbɛ̃ kũ à deńla tɔ́omɛ. Ladana mɛ́ àdi tó ò yã yãpura dɔ̃, akũsɔ̃ àdi lɛ́kpakɔ̃ana kɛ̃kɔ̃ańnɛ. 17Luda ye à mɔ́ gbɛ̃ kũ a lɛ́sɛna ni gɔ̃ ń pɔ́ ũnɔnɛ swáswa kũ a lɛ́ litɛna vĩro, akũ à sì kũ a kunnaao. 18Lɛmɛ yã mɛ̀n pla kun kũ à litɛna vĩro, Luda ni fɔ̃ à ɛ́kɛ to a musuro. Yã pìnɔ tɛni ókɔ̃nɔ kũ o nainɔ gba swɛ̃̀ manamana, de ò tãmaa kũ ó wɛ́ dɔi kɛ sikaa sari. 19Ó tãmaa bire vĩ ó wɛ̃̀ndibadɔbɔ ũ. À náani vĩ, akũsɔ̃ à gbãna, àdi gɛ̃ kũoo Luda kúkia lábure kpɛ, 20gu kũ Yesu gĩnakɛ à gɛ̃̀n ó yãi, à gɔ̃̀ sa'oriki ũ ari gɔrɔ sĩnda pínki lán Mɛlɛkizɛdɛki bà.

Currently Selected:

EBERUNƆ 6: BB2005

Highlight

Copy

Compare