BONAA 1
1
Waridɔna Isarailanɔa Misila
1Isaraila nɛ́ kũ ò tà Misila kũ ń de Yakubuo, baadi kũ a bɛ gbɛ̃nɔ tɔ́n dí: 2Rubɛni, Simɛɔ, Levi, Yuda, 3Isaka, Zɛbuluni, Biliaminu, 4Dã, Nafatali, Gada kũ Asao. 5Yakubu buri pìnɔ ń pínki gbɛ̃nɔn baaakɔ̃ akurimɛ. Yusufu sɔ̃ a gĩnakɛ à kú Misila kɔ̀. 6Akũ Yusufu gà kũ a vĩ̀ninɔ kũ gbɛ̃ kũ ò kun a gɔrɔanɔ ń pínki. 7Isarailanɔ nɛ́ ì ò kɛ̀ dasi ò kàra ò dasi kũ̀ manamana, ò dà bùsuu pìla pínki.
8Kína dufu kũ à Yusufu dɔ̃ro kpata blè Misila, 9akũ à pì a gbɛ̃nɔnɛ: À Isarailanɔ gwa, ò dasi kũ̀ ò dàóla. 10Ò gɛ́ ò ɔ̃ndɔ̃ kɛńnɛ de òsun kararo yãi. Tó zĩ̀i fùtɛ, ò na ó ibɛrɛnɔa ò zĩ̀ ká kũoo ò bɔtɛ ó bùsun.
11Akũ ò gbɛ̃nɔ dìtɛńnɛ ń dikirinɔ ũ ò wɛ́ tãḿma kũ zĩ gbãna kɛnaao. Lɛmɛ ò Pitomu kũ Ramɛsɛo kàtɛ Firi'aunanɛ a pɔ́blekatɛkianɔ ũ lɛ. 12Ama lán òtɛn wari dɔḿma nà, lɛmɛ òdigɔ̃ kara lɛ òtɛn dagula, akũ swɛ̃̀ɛ kɛ̃̀ Misilanɔgu ń yã musu. 13Akũ ò ń dá zɔ̀zĩ pãsĩn 14ò ń pɔ yàka ò ɛ̃ zĩ gbãna dàńnɛ kũ kúnkubonaao kũ bura zĩ sĩnda pínkio. Ò zĩ pìnɔ dàńnɛ pínki pãsĩpãsĩ.
15Akũ Misilanɔ kína Eberu nɛ́sɛtɛrinɔ sìsi, a do tɔ́n Sifira, a do Pua. 16À pìńnɛ: Tó áni nɛ́ i Eberu nɔgbɛ̃nɔnɛ tera sa, tó gɔ̃gbɛ̃mɛ, à a dɛ. Tó nɔgbɛ̃mɛ sɔ̃, à a tó. 17Nɔgbɛ̃ pìnɔn Luda vĩna vĩ, odi yã kũ à òńnɛ kɛro, òtɛn nɛ́gɔ̃gbɛ̃nɔ tó. 18Akũ kína pì ń sísi à ń lá à pì: À kɛ̀ dera a kɛ̀ lɛ a nɛ́gɔ̃gbɛ̃nɔ tòo? 19Ò wèa ò pì: Eberu nɔgbɛ̃nɔ de lán Misila nɔgbɛ̃nɔ bàro, ò wãna òdi nɛ́ i ari ògɔ̃ ká. 20Lɛmɛ Isarailanɔ tɛn kara lɛ òtɛn dasi kũ. Akũ Luda yã mana kɛ̀ nɛ́sɛtɛrii pìnɔnɛ 21à ń gbá nɛ́nɔ, kũ ò a vĩna vĩ yãi. 22Akũ Firi'auna yã dìtɛ a gbɛ̃nɔnɛ ń pínki à pì: À Eberu nɛ́gɔ̃gbɛ̃ kũ ò ń ínɔ ká Nili ín ń pínki, ama à nɛ́nɔgbɛ̃nɔ tó.
Currently Selected:
BONAA 1: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
