DOKAGBƐSISINAA 31
31
Yɔsua ditɛna Musa gɛ̃nɛ ũ
1Kũ Musa yã dínɔ ò Isarailanɔnɛ à làka, 2à pì: Tera dí bà ma ka wɛ̃̀ basuddo, mani fɔ̃ mà doárɛ arɛ doro. Dikiri pìmɛnɛ mani bikũ Yodaaro. 3Dikiri á Luda mɛ́ ani doárɛ arɛ à bikũ. Ani buri kũ ò kú gwenɔ kakatɛárɛ de à ń bùsu sí. Yɔsua mɛ́ anigɔ̃ doárɛ arɛ sà lákũ Dikiri ò nà. 4Dikiri ni kɛ buri pìnɔnɛ lákũ à kɛ̀ Amɔrinɔ kínanɔnɛ nà Siɔ̃ kũ Oguo kũ ń bùsuuo kũ à ń kákatɛ. 5Dikiri ni ń naárɛ á ɔĩ áni kɛńnɛ lákũ ma dìtɛárɛ nà pínki. 6À á laakari kpátɛ àgɔ̃ wɔ́rɔgɔ vĩ! Àsun tó vĩna á kũro, àsun tó swɛ̃̀ kɛ̃águ ń yãiro, zaakũ Dikiri á Luda mɛ́ àtɛn gɛ́ kãáo. Ani á tónlo ani pã kpááiro.
7Akũ Musa Yɔsua sìsi Isarailanɔ wára ń pínki à pìnɛ: Ǹ zɛ gbãna ǹgɔ̃ wɔ́rɔgɔ vĩ, zaakũ mɔkɔ̃n mɛ́ ĩni gɛ́ kũ gbɛ̃ dínɔ bùsu kũ Dikiri la dà ń dizi káakunɔnɛ à pì áni kpáḿma gũn. Mɔkɔ̃n mɛ́ ĩni bùsuu pìi kpaatɛtɛńnɛ. 8Dikiri mɛ́ ani donnɛ arɛ. Àkũ mɛ́ anigɔ̃ kú kũnwo, ani n tónlo ani pã kpányĩ zikiro. Ǹsun tó vĩna n kũro ǹsun bídi kɛro.
9Musa doka pìi kɛ̃̀ takada gũn à kpà sa'ori Levi buri kũ òdigɔ̃ Dikiri bàka kunna kũńwo àkpati sɛnanɔa kũ Isaraila gbɛ̃ zɔ̃kɔ̃nɔ ń pínki. 10Musa yã dìtɛńnɛ à pì: Wɛ̃̀ supplapla gbɛra, wɛ̃̀ kũ òdi fĩnadenɔ kɛ̃ Kutadɔna dikpɛgɔrɔa, 11tó Isarailanɔ sù ò ń zĩda mɔ̀ Dikiri ń Ludanɛ ń pínki gu kũ ani sɛ́ gũn, àgɔ̃ doka takada díkĩna kyó kɛńnɛ ò ma. 12Àgɔ̃ ń kakara, gɔ̃gbɛ̃nɔ kũ nɔgbɛ̃nɔ kũ nɛ́ fítinɔ kũ bòasu kũ ò kú á wɛ̃tɛnnɔ, de ò ma ò dada, ò le ògɔ̃ Dikiri á Luda vĩna vĩ, ògɔ̃ dokayã pìnɔ kũna pínki ògɔ̃ zĩ kɛa. 13Ń nɛ́ kũ ò yã pì dɔ̃ronɔ ni ma, onigɔ̃ vĩnakɛna Dikiri á Ludanɛ dada gɔrɔ kũ á kú bùsu kũ átɛn bikũ Yodaa à gɛ́ sí pìi gũn.
Dikiri gĩnakɛ à Isarailanɔ bona a kpɛ yã ò
14Dikiri pì Musanɛ: N gagɔrɔ kà kĩni. Ǹ Yɔsua sísi à gɛ́ zɛ dakarɛkia, mani zĩ nanɛ a ɔĩ. Akũ Musa kũ Yɔsuao gɛ̀ɛ ò zɛ̀ dakarɛkia. 15Dikiri bò à sùḿma gwe tɛ́luku kũ à zɛna kuta pì kpɛ́lɛlɛaa gũn. 16Akũ Dikiri pì Musanɛ: Tó n ka n dizinɔla, gbɛ̃ pìnɔ ni futɛ ò pãpã kɛ ò do bùsu kũ òtɛn gɛ̃n tãnanɔi. Oni pã kpámai ò ma bàka kunna kũńwo yã gboro. 17Zĩ pìia mani pɔ fɛ̃ńyĩ mà pã kpáńyĩ, mani kpɛ lińnɛ ò ń kakatɛ. Kisianɔ ni wí ń musu dasi ò wari kɛ. Zĩ pìia oni pi: Kisira pìnɔ wì ó musu kũ ó Luda kú kũooro yãinloo? 18Zĩ pìian mani kpɛ lińnɛ yã vãni kũ ò kɛ̀ yãi, ò arɛ dɔ̀ tãnanɔa.
19Ǹ lɛ̀ díkĩna kɛ̃ takadan sà ǹ dada Isarailanɔnɛ ò sí, de àgɔ̃ demɛnɛ ń bona ma kpɛ sèeda ũ. 20Tó ma gɛ kũńwo bùsu kũ ma la dà ń dizi káakunɔnɛ gũn, bùsu kũ vĩ kũ zɔ́'io din pìi, tó ò kã̀ ò mɛ̀ɛ kpà, oni arɛ dɔ tãnanɔamɛ ò ń gbagba. Oni pã kpámai ò ma bàka kunna kũńwo yã gboro. 21Tó kisira pìnɔ ń lé dasi òtɛn wari kɛ, lɛ̀ɛ pì mɛ́ ani ń yã vãni káńnɛ ń ɔĩ, zaakũ a yã ni sã ń burinɔguro. Má yã kũ à kú ń nɛ̀sɛn gbãra dɔ̃ ari màgɔ̃ gɛ́ kũńwo bùsu kũ ma la dàńnɛ gũn. 22Musa lɛ̀ɛ pìi kɛ̃̀ takadan zĩ pìia, akũ à dà Isarailanɔnɛ.
23Dikiri yã dìtɛ Nuni nɛ́ Yɔsuanɛ à pì: Ǹ laakari kpátɛ ǹgɔ̃ wɔ́rɔgɔ vĩ! Mɔkɔ̃n mɛ́ ĩni gɛ́ kũ Isarailanɔ bùsu kũ ma la dàńnɛ gũn, akũsɔ̃ makũ manigɔ̃ kú kũnwo.
24Kũ Musa dokayã pìnɔ kɛ̃̀ takadan à làka pínki, 25à yã dìtɛ Levi buri kũ òdigɔ̃ Dikiri bàka kunna kũńwo àkpati sɛnanɔnɛ à pì: 26À doka takada díkĩna sí à ditɛ Dikiri á Luda bàka kunna kãáo àkpatii sarɛ, àgɔ̃ kú gwe á bona Dikiri kpɛ sèeda ũ. 27Zaakũ má á sãgbãna dɔ̃, lákũ adì gí yãi nà. Zaa gɔrɔ kũ má kú kãáo adìgɔ̃ bo Dikiri yã kpɛmɛ ari kũ a terao. Oni ma ga gbɛra pɔ́ o dɔ yá? 28À á buri gbɛ̃ zɔ̃kɔ̃nɔ kũ á don'arɛdenɔ kakaramɛnɛ, de mà yã dínɔ dańnɛ ń sãn, ludambɛ kũ zĩtɛo nigɔ̃ de ma sèedadenɔ ũ á yã musu. 29Zaakũ má dɔ̃ kũ áni á zĩda yaka ma ga gbɛra, áni kɛ̃ zɛ́ kũ ma mɔ̀árɛa. Abire gbɛra kisira ni á le, zaakũ áni yã kũ à vãni Dikirinɛ kɛ, ani pɔ fɛ̃ái tãna kũ a kɛ̀nɔ yãi.
30Akũ Musa lɛ̀ɛ pì yã dà Isaraila kũ ò kakarananɔnɛ ń sãn mámmam.
Currently Selected:
DOKAGBƐSISINAA 31: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
