KƆLƆSEDENƆ 4

1Ákɔ̃nɔ dikirinɔ, à á zɔ̀nɔ gwa a zɛ́a súsu. Àgɔ̃ dɔ̃ kũ ákɔ̃nɔ se á Dikiri vĩ musu.

2À á zĩda kpá aduakɛnaaa kũ itɛ̃kɛnaao kũ sáabukpanaao. 3À wɛ́ kɛwɛrɛ Ludaa dɔ, à zɛ́ bowɛrɛ ò a yã waazi kɛ, ò Kirisi asiriyã ońnɛ. Abire yãin ò ma dai kpɛ́siran. 4À wɛ́ kɛmɛnɛ mà yã pì o swáswa, lákũ à kũ̀ mà o nà. 5Àgɔ̃ á zĩda kũna dɔ̃ Yesusaridenɔ tɛ́ kũ ɔ̃ndɔ̃o. Àgɔ̃ yã kũ Luda a zɛ́ bòárɛ kɛ a gɔrɔa. 6À tó á lɛ́gbɛ gɔ̃ nna àgɔ̃ karana vĩ, de àgɔ̃ dɔ̃ lákũ áni yã lí baadia nà.

Lɛ́zammanaa

7Ó gbɛ̃ yenyĩde Tikiku ni ma baaru kpáárɛ pínki. Àkũmɛ zĩkɛri náanide ũ, ó zɔ̀bleri dakemɛ Dikiri zĩ gũn. 8Abire yãimɛ matɛni a zĩáwa de à ó kunna oárɛ, à laakari le à kpátɛ.

9Á gbɛ̃ndo Ɔnɛsimu, ó gbɛ̃ yenyĩde náanide tɛn su kãao. Oni pɔ́ kũ ó kú a gũn gu dia oárɛ pínki. 10Arisitaku kũ ó kú lɛɛlɛ kpɛ́siran fɔ kpàáwa kũ Baanaba dakũna Maakuo. Ò Maaku yã òárɛ kɔ̀. Tó à sù á kĩnaa, à gbãnakɛ kpánɛ. 11Yesu kũ òdi pinɛ Yusutu fɔ kpàáwa dɔ. Yuda kũ ótɛn kpata kũ à bò Luda kĩnaa zĩ kɛ lɛɛlɛnɔ lɛ́n gwe. Ma laakari kpatɛna kũńwo. 12Á gbɛ̃ndo Ɛpafara, Kirisi Yesu zɔ̀bleri fɔ kpàáwa. Àdigɔ̃ ania kɛ kũ aduakɛnaárɛo gɔrɔ sĩnda pínki, de à le à kàsara kú àgɔ̃ papana Luda pɔyenyĩnaa gũn. 13Mani fɔ̃ mà a sèeda kɛ kũ àtɛn zĩ kɛárɛ manamana, ákɔ̃nɔ kũ Laodiseadenɔ kũ Iɛrapɔlidenɔ. 14Ó likita yenyĩde Luku kũ Demasio fɔ kpàáwa. 15À fɔ kpá ó gbɛ̃ kũ ò kú Laodiseanɔa kũ Nimfao kũ sɔsi gbɛ̃ kũ òdi kɔ̃ kakara a bɛanɔ. 16Tó a takada dí kyó kɛ̀, à kpá Laodisea sɔsi gbɛ̃nɔa ò a kyó kɛ, gbasa à ń pɔ́ kyó kɛ se. 17À o Akipunɛ, à laakari dɔ Dikiri zĩ kũ ò dànɛɛa, à a mì dɛ. 18Makũ Pɔlu makũ mɛ́ ma yã dí kɛ̃̀ kũ ma zĩda ɔo, ma fɔ kpàáwa. À tó ma kunna kpɛ́siran yã gɔ̃ dɔágu. Luda gbɛ̃kɛ kɛárɛ.

Currently Selected:

KƆLƆSEDENƆ 4: BB2005

Highlight

Copy

Compare