KƆLƆSEDENƆ 3
3
Kunna wɛ̃̀ndi dufu gũn
1Lákũ a futɛ kũ Kirisio nà, à tó ludambɛ yã doárɛ arɛ, zaakũ gwen Kirisi vutɛna Luda ɔplai. 2À tó á laasun gɔ̃ kú ludambɛ yãnɔa, àsungɔ̃ kú andunia pɔ́aro. 3Zaakũ a ga, á wɛ̃̀ndi utɛna kũ Kirisio Luda gũn.
4Lákũ Kirisi de á wɛ̃̀ndi ũ nà, tó à bò gupuraa, ákɔ̃nɔ se áni bo kãao kũ gakurio sà. 5Abire yãi à andunia yã kũ ò kú á nɛ̀sɛɛ gũnnɔ dɛ: Pãpãkɛnaa, wé'iyã, mɛ̀futɛnaa, yã vãni nidɛna kũ wãkũuo. Pɔ́ kũ gbɛ̃ dì a wãkũ kɛ gɔ̃̀nɛ a dikiri ũmɛ. 6Yã birenɔ yãin Luda ni pɔfɛ̃na kipa a yãmarisarinɔa. 7Ákɔ̃nɔ se, á kú yã pìnɔ gũn yã, ò dòárɛ arɛ. 8À ɔ gbarɛ yã dí takanɔi sà: Pɔfɛ̃naa, zukakanaa, nɛ̀sɛ pãsĩ, gbɛ̃sɔ̃sɔ̃na kũ yãpãpã'onaao. 9Àsungɔ̃ ɛ́kɛ tokɔ̃nɛro, zaakũ a á dà zĩ kũ a yãkɛnanɔ gòala, 10a a dufu sɛ̀ kũ à kɛ̀kɛ àtɛn dufu kũ de à gɔ̃ lán a Kɛ̀ri pɔ́ bà. 11Gwe Yudanɔ kũ buri pãndenɔ dokɔ̃nɔmɛ kũ tɔ̃̀zɔ̃nadenɔ kũ gyɔfɔrɔdenɔ kũ sɛ̃̀ntɛ gbɛ̃nɔ kũ wɛ́siradenɔ kũ zɔ̀nɔ kũ zĩdadenɔ. Kirisimɛ ń pínki ũ, à kú ń gũn ń pínki.
12Abire yãi, lákũ Luda á sɛ́ a gbɛ̃ yenyĩdenɔ ũ nà, dà kũ ò de à daáwanɔn dí: Wɛ̃nda, gbɛ̃kɛ, zĩdabusanaa, busɛkɛ kũ mɛnao. 13À kɔ̃ fɔ̃. Tó yãke sù à á ká kũ kɔ̃o, à sùru kɛ kũ kɔ̃o. Lákũ Dikiri sùru kɛ̀ kãáo nà, à kɛ kũ kɔ̃o lɛ se. 14A pínki musu à yenyĩ kũ àdi yã pìnɔ kakara swáswa daáwa. 15À tó aafia kũ à bò Kirisi kĩnaa kí ble á swɛ̃̀ɛ gũn, zaakũ kunna kũ kɔ̃o aafiaan Luda á sísia mɛ̀dokɔ̃nɔdenɔ ũ. Àgɔ̃ Luda sáabu kpá. 16À tó Kirisi yã vutɛki le á nɛ̀sɛn manamana. À yã dakɔ̃nɛ, à lɛ́ dakɔ̃a kũ ɔ̃ndɔ̃ sĩnda pínkio. Sáabukpanaa gũn à lɛ̀ sí Ludanɛ á swɛ̃̀ɛ gũn kũ zaburao kũ tɔ́kpanaao kũ donyĩ lɛ̀ nɔ. 17Pɔ́ kũ átɛn kɛ ke kũ átɛn o pínki, à kɛ kũ Dikiri Yesu tɔ́o, à De Luda sáabu kpá a gãi.
Luda gbɛ̃nɔ kunna kũ kɔ̃o
18Ákɔ̃nɔ nɔgbɛ̃nɔ, á baadi gɔ̃ mì natɛ a zãnɛ. Lɛn à kũ̀ à kɛ Dikiri gũn lɛ. 19Gɔ̃gbɛ̃nɔ, á baadi gɔ̃ ye a nanɔi. Àsungɔ̃ pãsĩ kũńworo. 20Nɛ́nɔ, à á de kũ á dao yã ma yã sĩnda pínki gũn, zaakũ abire mɛ́ àdi ká Dikirigu. 21Denɔ, àsun á nɛ́nɔ nɛ̀sɛ futɛ à ń pɔ yakaro. 22Zɔ̀nɔ sɔ̃ à á andunia dikirinɔ yã ma yã sĩnda pínki gũn. Àsun zĩ kɛńnɛ ń wɛ́ yãiro. À zĩ kɛńnɛ kũ nɛ̀sɛ mɛ̀n doo, zaakũ Dikiri vĩnakɛrinɔn á ũ. 23Yã kũ átɛn kɛ pínki, àgɔ̃ kɛ kũ yãpurao, lándɔ̃ Dikirin átɛn kɛnɛ bà, adi kɛ bisãsirinlo. 24Àgɔ̃ dɔ̃ kũ áni Dikiri láada le á baka ũ. Dikiri Kirisin átɛn doi. 25Yãvãnikɛri ni a vãni gbɛ̀ le. Luda dì gbɛ̃ke wɛ́ gwaro.
Currently Selected:
KƆLƆSEDENƆ 3: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
