2 TIMƆTI 1

Pɔlu tɛ́kpana Timɔtigu

1Makũ Pɔlu, Kirisi Yesu zĩ̀rii Luda pɔyenyĩnaa gũn wɛ̃̀ndi kũ à a lɛ́ sɛ̀ Kirisi Yesu gũn yã musu, 2makũ mɛ́ ma takada dí kɛ̃̀nnɛ, ma nɛ́ yenyĩde Timɔti. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo, à n gba aafiaa.

3Ma sáabu kɛ̀ ma dizinɔ Ludanɛ kũ madì doi kũ nɛ̀sɛpurao, zaakũ n yã dìgɔ̃ dɔmagu lakanaa sari ma aduakɛna gwãani kũ fãnantɛ̃oo gũn. 4Tó wɛ́tɛ̃ kũ à bòmma yã dɔ̀magu, madì n bɛgɛ kɛmɛ, madìgɔ̃ ye ò wɛ́ sikɔ̃lɛ, de ma pɔnna kɛ zɔ̃kɔ̃. 5N ludanaanikɛna kũ nɛ̀sɛ mɛ̀n doo yã dɔmagu. N dai Loisi kũ n da Yunisio Luda náani kɛ̀ lɛ se, akũsɔ̃ má dɔ̃ sãnsãn kũ ntɛn kɛ lɛ se.

6Abire yãi matɛn dɔngu, ǹ futɛ ǹ zɛ kũ gba kũ Luda dànnɛo gɔrɔ kũ ma ɔ nàmma, 7zaakũ Nini kũ àdi ó gba gbãna kũ yenyĩo kũ zĩdakũnadɔ̃naaon Luda kpàwá, adi kɛ nini vĩnadenlo. 8Abire yãi ǹsun wé'i kũ kũ ó Dikiri yã onnɛnaaoro. Ǹsun wé'i kũ kũ ma yãoro, makũ kũ ò ma da kpɛ́siran Kirisi yãi. Ǹ wari kũ òdi kɛ a baaru nna kpana yãi kɛ kũmao kũ Luda gbãnao. 9Àkũ mɛ́ à ó sura bà, à ó sísi o gɔ̃ a pɔ́ ũ. Adi kɛ yã kũ o kɛ̀ yãinlo, a zĩda pɔyenyĩna yãimɛ kũ gbɛ̃kɛ kũ à kɛ̀wɛrɛo zaade gɔrɔ dí naaro. 10Gbɛ̃kɛ pìi bò gupuraa ó Surabari Kirisi Yesu pì sunaa gũn sà. À ga gbãna kàkatɛ, à wɛ̃̀ndi kũ mɛ̀vãnasarioo bòwɛrɛ gupuraa a baaru nna kũ òdi kpá gũn. 11Luda ma ditɛ a zĩ̀ri ũ, de mà baaruu pìi kpàkpa kɛ mà a yã dańnɛ. 12Abire yãin matɛn wari dí kɛi, ama wé'i dì ma kũro, zaakũ má gbɛ̃ kũ ma a náani kɛ̀ dɔ̃, akũsɔ̃ má dɔ̃ sãnsãn kũ ani fɔ̃ à yã kũ à nàmɛnɛ ma ɔĩ dãkpã ari a sugɔrɔ zĩ. 13Ǹgɔ̃ yã kũ n mà ma lɛ́n ari a zĩniaa pì kũna yãzɛdedannɛna ágba ũ kũ ludanaanikɛnaao kũ yenyĩ kũ ó vĩ Kirisi Yesu gũnwo. 14Ǹ yã mana kũ Luda nànnɛ n ɔĩ kũ gbãna kũ a Nini kũ à kú ó gũn gbãnao.

15Ń dɔ̃ kũ Asia bùsudenɔ ma zukũna ń pínki. Figɛlu kũ Ɛmɔgɛnɛo kú ń tɛ́. 16Dikiri wɛ̃nda dɔ̃ Ɔnɛsifɔru bedenɔnɛ! Zaakũ à sù à ma nɛ̀sɛ kpatɛnamɛnɛ lɛ́ vĩro, adi wé'i kũ kũ ma dana kpɛ́siran yãoro. 17Kũ à sù Romu gɔ̃̀nɔ, à ma wɛtɛ ari à gɛ̀ɛ à bòma. 18Dikiri wɛ̃nda dɔ̃nɛ yãkpatɛkɛgɔrɔ zĩ. Ń kpányĩ zɔ̃kɔ̃ kũ à kɛ̀mɛnɛ zaa Ɛfesu yã dɔ̃ sãnsãn.

Currently Selected:

2 TIMƆTI 1: BB2005

Highlight

Copy

Compare