1 TIMƆTI 1

Yãdannɛrinɔ gbana laakarii

1Makũ Pɔlu, Kirisi Yesu zĩ̀rii lákũ Luda ó Surabari kũ Kirisi Yesu kũ ó wɛ́ dɔiio dìtɛmɛnɛ nà, 2ma takada dí kɛ̃̀nnɛ Timɔti, ma nɛ́'ina Yesu zɛ́ gũn. De Luda kũ ó Dikiri Kirisi Yesuo gbɛ̃kɛ kɛnnɛ kũ sùruuo à n gba aafiaa.

3Lákũ ma nakaramma nà gɔrɔ kũ matɛn gɛ́ Masedonia bùsun, ǹ gɔ̃ Ɛfesu ǹ o gbɛ̃kenɔnɛ òsun yã kũ àdi kɔ̃ sɛ́ kũ Luda yãoro dańnɛ doro. 4Òsun laakari dɔ gara kũ dizinɔ tɔ́ kɔ̃nɔwɛna kũ à lɛ́ vĩrooa doro. Abire dì su kũ lɛ́kpakɔ̃anaaoomɛ. Àdi tó Luda zĩ kũ àdi bo a náanikɛnaa gũn gɛ́ arɛro. 5Ma yã pìi dìtɛ de ògɔ̃ yenyĩ vĩ yãimɛ, yenyĩ kũ àdi bo nɛ̀sɛpura kũ laasunlɛna dokɔ̃nɔo kũ ludanaanikɛna manafikisarioo gũn. 6Gbɛ̃kenɔ pã̀ yã pìnɔnɛ ò gɛ̃̀ yã pãpã onan. 7Ò ye ògɔ̃ de Musa doka yãdannɛrinɔ ũ, ama ò yã kũ òtɛn o gbázɛ dɔ̃ro ke yã kũ ò zɛ̀anɔ.

8Ó dɔ̃ kũ doka pì mana, tó gbɛ̃ tɛn zĩ kɛa a zɛ́a. 9Ó dɔ̃ dɔ kũ Luda dí doka ditɛ gbɛ̃ mananɔ yãiro, séde dokadarisarinɔnɛ kũ sãgbãnadenɔ kũ ludawɛkɛrisarinɔ kũ durunnakɛrinɔ kũ ludadɔ̃risarinɔ kũ donyĩrisarinɔ kũ de kũ dao dɛ̀rinɔ kũ gbɛ̃dɛrinɔ 10kũ zinakɛrinɔ kũ pãpãbɛ̃nɛkɛrinɔ kũ lágilaginɔ kũ ɛ́kɛdenɔ kũ yãdimmarinɔ kũ gbɛ̃ kũ òdi bo yãdannɛna zɛ́de kpɛnɔo ń pínki. 11Yãzɛde pì kɔ̃ sì kũ baaru nna gakuride kũ Luda arubarikade a kpanaa nàmɛnɛ ma ɔĩo.

Lákũ Luda gbɛ̃kɛ kɛ̀ Pɔlunɛ nà

12Ma Kirisi Yesu ó Dikiri kũ à ma gba gbãna sáabu kɛ̀, zaakũ à ma náani kɛ̀ à ma sɛ mà zĩ kɛarɛ. 13Ma a tɔ́ bɛ̃̀nɛɛ sì yã, ma wɛ́ tã̀ a gbɛ̃nɔa, ma gbãna mɔ̀ńnɛ. Bee kũ abireo à sùruu kɛ̀ kũmao, zaakũ ma kɛ̀ wɛ́sirakɛnaa gũmmɛ kũ a náanikɛnasario. 14Akũ ó Dikiri gbɛ̃kɛ zɔ̃kɔ̃ɔ kɛ̀mɛnɛ, à tò ma a náani kɛ̀, akũ má yenyĩ kũ à de ó pɔ́ ũ kunna Kirisi Yesu gũn vĩ. 15Yã díkĩna bi yãpuramɛ, à kũ̀ ò sí ɔplapla. Kirisi Yesu sù andunia gũn durunnakɛrinɔ surabana yãi. Makũ, ma durunna mɛ́ à de dakenɔ pɔ́la, 16akũ Luda ma wɛ̃nda gwà, de mɛna zɔ̃kɔ̃ kũ Kirisi Yesu kɛ̀ kũ makũ durunnakɛri kàsaraao bo gupuraa, de àgɔ̃ de sèeda ũ gbɛ̃ kũ oni a náani kɛ ò wɛ̃̀ndi kũ àdi lákaro lenɔnɛ. 17Luda mɛ̀n do légelege, gɔrɔ sĩnda pínki Kína kũ àdi garo akũsɔ̃ òdi a e kũ wɛ́oro gɔ̃ bɛ̀ɛrɛ vĩ kũ gakurio gɔrɔ sĩnda pínki, aami.

18Ma nɛ́ Timɔti, lákũ ò gĩnakɛ ò annabikɛyã ò n yã musu nà, matɛn yã pì dannɛ, de ǹgɔ̃ kũna ǹ zĩ̀ mana káo 19ludanaanikɛnaa gũn kũ laakariio kpátɛna. Gbɛ̃kenɔ yã pìnɔ kpà sãkoto, akũ ń ludanaanikɛnaa dì lɛ́ kútɛ. 20Imɛnɛu kũ Alɛsandao kú ń tɛ́. Ma ń kpá Setanwa, de ògɔ̃ dɔ̃ kũ òdi dɔkɛ kũ Ludaoro.

Currently Selected:

1 TIMƆTI 1: BB2005

Highlight

Copy

Compare