1 TƐSALONIKADENƆ 5
5
1Ma gbɛ̃nɔ, yã pì kɛna ke a kɛgɔrɔ oárɛna zɛ́ vĩro, 2zaakũ á dɔ̃ sãnsãn lákũ kpãni dì su gwãani nà. Lɛn anigɔ̃ de Dikiri sugɔrɔ zĩ lɛ. 3Tó gbɛ̃nɔ tɛn pi, ó aafia, ó kun ó laakariia, kakatɛna ni suḿma kãnto lákũ nɛ́'iwãwã dì su nɔ̀sindarea nà, oni boro. 4Ákɔ̃nɔ sɔ̃ ó gbɛ̃nɔ, á kú gusiranlo, gɔrɔ pì ni suáwa lán kpãni bàro, 5zaakũ gupura gbɛ̃nɔn á ũ, fãnantɛ̃ gbɛ̃nɔn á ũ á pínki. Gwãani ke gusira gbɛ̃nɔn ó ũro. 6Abire yãi òsun i o lán dakenɔ bàro. Ò itɛ̃ kɛ ògɔ̃ kú ó laakariia. 7I'orinɔ dì i o gwãani, wɛ̃dɛrinɔ sɔ̃ òdi wɛ̃dɛ kɛ gwãani. 8Ókɔ̃nɔ sɔ̃, zaakũ fãnantɛ̃ gbɛ̃nɔn ó ũ, ògɔ̃ kú kũ laakariio, ò ludanaanikɛna kũ yenyĩo da mɔ̀ uta ũ, ò surabana tãmaa kú mɔ̀ fùra ũ. 9Zaakũ Luda dí ó ditɛ à pɔfɛ̃ kipawáro. À ó dítɛ à ó sura ba ó Dikiri Yesu Kirisi gãimɛ. 10Àkũ mɛ́ à gà ó yãi de ògɔ̃ kú kãao, tó ó bɛ̃nɛ ke o andunia tòn yá. 11Abire yãi à lɛ́ dakɔ̃a, à kɔ̃ gba gbãna, lákũ átɛn kɛ nà.
Pɔlu yãditɛna Tɛsalonikadenɔnɛ
12Ma gbɛ̃nɔ, o wɛ́ kɛ̀áwa, à bɛ̀ɛrɛ lí gbɛ̃ kũ òdi zĩ kɛ á tɛ́nɔnɛ, kũ ò iko vĩáwa Dikiri gũn, òtɛni á da zɛ́anɔ. 13À ń gakuri dɔ̃ńnɛ manamana yenyĩ gũn zĩ kũ òtɛn kɛ yãi. Àgɔ̃ nna kũ kɔ̃o. 14Ma gbɛ̃nɔ, o lɛ́ dàáwa, à fayasaridenɔ da zɛ́n, à gbɛ̃ yĩdanɔ gba swɛ̃̀ɛ, à laakari dɔ gbãnasaridenɔa, à mɛna kũ gbɛ̃ sĩnda pínkio. 15À laakari kɛ, á gbɛ̃ke sún a vãni fĩna bo kũ a vãnioro. À zɛ́ wɛtɛ àgɔ̃ a mana kɛkɔ̃nɛ kũ gbɛ̃ sĩnda pínkio gɔrɔ sĩnda pínki.
16Àgɔ̃ kú kũ pɔnnao gɔrɔ sĩnda pínki. 17Àgɔ̃ adua kɛ lakanaa sari. 18Àgɔ̃ Luda sáabu kpá yã sĩnda pínki musu. Abire mɛ́ à deárɛ a pɔyenyĩna ũ Kirisi Yesu gũn. 19Àsun Luda Nini tɛ́ kũ àdi káńgu dɛdɛro, 20àsun annabikɛyã gya boro. 21À yã sĩnda pínki tàasi ká, àgɔ̃ a mana kũna, 22à mì kɛ̃ vãnikɛna buri sĩnda pínkia.
23Luda Aafiade tó á kunna gɔ̃ kú adona yã sĩnda pínki gũn, à á nini kũ á wɛ̃̀ndiio kũ á mɛ̀ɛo dãkpãárɛ aafia taari sari ari ó Dikiri Yesu Kirisi sugɔrɔ. 24Luda kũ à á sísi à á sɛ́ náani vĩ, ani yã pì kɛárɛ.
25Ma gbɛ̃nɔ, à adua kɛwɛrɛ. 26À fɔ kpá ó gbɛ̃nɔa ń pínki kũ Luda gbɛ̃nɔ lɛ́pɛmmanaao. 27Ma naárɛ Dikirii, à takada dí kyó kɛ ó gbɛ̃nɔnɛ ń pínki. 28Ó Dikiri Yesu Kirisi gbɛ̃kɛ kɛárɛ.
Currently Selected:
1 TƐSALONIKADENƆ 5: BB2005
Highlight
Copy
Compare
Share
Want to have your highlights saved across all your devices? Sign up or sign in
Bisã Bible © SIM International, 2005.
