1 TƐSALONIKADENƆ 4

Kunna lákũ Luda yei nà

1Yã kũ à gɔ̃̀n dí, ma gbɛ̃nɔ, a mà ó kĩnaa lákũ à mana á kunna ká Ludagu nà. Á kunna de lɛ kɔ̀, ama ótɛn wɛ́ kɛáwa, ótɛn kútɛ kɛárɛ ó Dikiri Yesu gũn, àgɔ̃ kun lɛ àgɔ̃ gɛ́o. 2Á yã kũ o dàárɛ kũ Dikiri Yesu tɔ́o dɔ̃. 3Luda ye á kunna gɔ̃ adona, à mì kɛ̃ pãpãkɛnaaa. 4Á baadi gɔ̃ a zĩda kũna dɔ̃ kũ bɛ̀ɛrɛɛo gbãsĩ sari, 5adi kɛ kũ dà vãni nidɛnaao lán kifiri kũ ò Luda dɔ̃ronɔ bànlo. 6Yã pìi musu gbɛ̃ke sún a gbɛ̃dake taki kɛ ke à taari kɛnɛro, zaakũ Dikiri ni wɛ́ tã yã bire taka kɛ̀rinɔ a lákũ o gĩnakɛ o òárɛ nà, o á sã gào. 7Luda dí ó sísi ògɔ̃ kú kũ gbãsĩoro, séde ó kunna gɔ̃ adona. 8Abire yãi gbɛ̃ kũ à gì yãdannɛna díi, adi kɛ bisãsirin à gìiro, Luda kũ àdi a Nini kũ à kú adona daógun à gìi.

9Óni le ò yekɔ̃ina yã oárɛro, zaakũ kũ á zĩdao Luda yekɔ̃inaa dàárɛ. 10Á kunna de lɛ kɔ̀, á ye ó gbɛ̃ kũ ò kú Masedonia bùsu gũnnɔi ń pínki. Ma gbɛ̃nɔ, o lɛ́ dàáwa, àgɔ̃ kɛ lɛ àgɔ̃ gɛ́o, 11à zɛ́ wɛtɛ àgɔ̃ kun yãkete sari, á baadi á zĩda yã kɛ à á zĩda zĩ kɛ, lákũ o dìtɛárɛ nà, 12de á kunna le à ká bàaidenɔgu, de àsun fu á zĩdaa à da gbɛ̃keiro.

Dikiri sunaa

13Ma gbɛ̃nɔ, o ye àgɔ̃ yãpura dɔ̃ gbɛ̃ kũ ò andunia tònɔ yã musu, de á pɔ súngɔ̃ sira lán gbɛ̃ kũ ò tãmaa vĩronɔ bàro yãi. 14Zaakũ o sì kũ Yesu gà à fùtɛ, lɛn dɔ Luda ni tó gbɛ̃ kũ ò andunia tò Yesu gũnnɔ ɛra ò su kãao lɛɛlɛ.

15Yã kũ ótɛn oárɛ díkĩna bi Dikiri yãdannɛnaamɛ. Ókɔ̃nɔ gbɛ̃ kpara kũ ónigɔ̃ kun ari Dikiri sugɔrɔ zĩnɔ, óni do gbɛ̃ kũ ò andunia tòo pìnɔnɛ arɛro. 16Dikiri mɛ́ ani bo ludambɛ, à kipa kũ yãditɛnnɛnaao kũ malaika gbɛ̃ zɔ̃kɔ̃ɔ kòtooo kũ Luda kãkãki ɔ́o, gbɛ̃ kũ ò gà Kirisi gũnnɔ ni vu bona gan káaku, 17abire gbɛra ókɔ̃nɔ gbɛ̃ kpara kũ ó kunnɔ, oni ó sɛ́tɛ kũńwo lɛɛlɛ ari ludambɛ lukun ò da Dikirilɛ ĩa gũn, gbasa ògɔ̃ kú kãao ari gɔrɔ sĩnda pínki. 18Abire yãi à kɔ̃ laakari kpátɛ kũ yã pìio.

Currently Selected:

1 TƐSALONIKADENƆ 4: BB2005

Highlight

Copy

Compare