ALIFILI̍PĀYI 4

Ɔna yī lɛlā

1Aɛ̍nɛ̍ yī u lēchi̍ lēchi̍ gba̍a̍! Ala̍ kpɛ̍ɛ - āchɛ ɛya̍ nīi ūkpɔ̄tū lɛ u yaya a̍nɛ! Ala̍ kpɛ̍ɛ - āchɛ obī wɔ̄wīyā yī u gba̍a̍ a̍nɛ. Eyī yī ala̍ yɛ amu ē bīya ami kpa̍a! Aɛ̍nɛ̍ yī u lēchi̍ lēchi̍ be̍e! Ala̍ chu̍chu̍u, ala̍ ā yarɛ brii i̍ngɔ̍ɔ abɔ̍ɔ la ɔhɔ̄leyī yī ala̍ nīi ala̍ lɛ la Ādā Iji̍sɔ̄ɔsi ma̍ gɛ.

2Iyo̍diya ba̍la Isinti̍ke be̍e! Ala̍ chu̍chu̍u, ala̍ ā lɛ oko̍o ɔgɔ̄grāa bāa aɛ̍nɛ̍ anānyā nīi tū ba̍la Ādā Iji̍sɔ̄ɔsi ma̍ gɛ. 3Awɔ titi nīi - olikpɛ̍ɛ yī u nīi n de ɔtū che wɔ ma̍, chu̍chu̍u n chikpo̍ nīi a ge̍ē tū anyā ɛla̍ā wɔbɔ̄. E̍ ya̍ u̍ku̍rɔ̍ gba̍a̍ ba̍la ami la Wɔ̄kā Ɔlwɔnyɛ yī Ɔwɔ obī mīyanya. Aa̍ ba̍la Iklɛ̍mɛ̄ɛnti ba̍la āchɛ ehēhī wa̍a̍ nīi - alu̍ku̍rɔ̍ i̍ngɔ̍ɔ ba̍la ami ma̍ nɛ. Riyī yī wā wa̍a̍ tū abɔ̍ɔ lipu̍ yī īpū yī ɔhɔ̄leyī nīi Ɔwɔ lɛ lā abɔ̍ɔ ma̍.

4Ɔwɔ̄wīyā ge̍ hɔ̄ de ala̍ myɛ̄grāa-myɛ̄grāa la ɔhɔ̄leyī yī ala̍ nīi hɔ̄ ba̍la Ādā ma̍. N ge̍ē gba̍a ē ka i̍ngɔ̍ɔ, ala̍ ā wɔ̄wīyā.

5Ala̍ ā bī abɔ̄lɛ̄lā ɔlɛmlɛ̍ɛ̍ pīyeyīta̍ āchɛ wa̍a̍. Ādā ɔlɔjā yɛ amu yewā ɔpɔ̄ɔpɛ̄. 6Ala̍ e̍e hi̍yɛ̄ngura yī lɛlɛ̄lā ni̍. La ɔhā wa̍a̍ nīi ala̍ ge̍ē ji ma̍, ala̍ ā che Ɔwɔ ikpo̍ yī ɔjā nīi ku̍ ala̍ ɔkɔ ma̍. Ala̍ ā che ɔ̍ ikpo̍ i̍ngɔ̍ɔ da ɔ̍ o̍be yī u̍ku̍rɔ̍ la ūkpɔ̄tū ɔlɛgbadagbada myɛ̄grāa-myɛ̄grāa. 7Bū la ɛbɛ ɔla̍ā, ogbodɔ̍dɔ̍ yī Ɔwɔ nīi ɔ̄chɛ̄ɛchɛ ɔlamu i̍ ē je̍ ochi̍chi̍ yī nū mɛ ni̍ ma̍ ge̍ē de ūkpɔ̄tū yī ala̍ ba̍la ɛri̍ya̍ ogbōgbo yī ala̍ ē gbōgbō hwɔhi hwɔhi la otū ngmo̍tu̍chɛ̄ ba̍la Ikra̍yisi Iji̍sɔ̄ɔsi.

8Ɔchlɛhu̍ yī lɛlā! Aɛ̍nɛ̍ yī u, ɛri̍ya̍ ogbōgbo yī ala̍ ge̍ mōmu la ɛjā nīi hwɔhi hwɔhi ngma̍ la ɔkɔ̄kā ma̍: Ɛjā nīi - olēchi̍ lēchi̍ ma̍, ɛjā nīi - ɛjā ɔlɛkɛ̍tɛ̍kɛ̍tɛ̍ ma̍, ɛjā nīi lɛ kpakpa ke̍e̍ ma̍, ɛjā nīi lɛ cha̍ri̍cha̍ri̍ ma̍, ɛjā nīi li̍hi̍hi̍ hwɔhi hwɔhi ma̍, ba̍la ɛjā nīi lɛ otūlichō ma̍. 9Lɛlā ɔla̍ā wa̍a̍ nīi ala̍ ngū ma̍, ba̍la onīi ami ngū ala̍ bū la lɛlā ɔkɔ̄ka yī u ba̍la lɛlā ɔyɔ̍ɔ̄ya̍ yī u ma̍, ala̍ bī āā ya̍ u̍ku̍rɔ̍ gɛ. Bū la ɛbɛ ɔla̍ā, Ɔwɔ nīi ē de ogbodɔ̍dɔ̍ ē de alɔ ma̍ ge̍ē hɔ̄ ba̍la ala̍.

O̍be yī Wɔga

10A̍hōhi nīi n lɛ la ɔhɔ̄leyī yī u nīi n hɔ̄ la Ādā Iji̍sɔ̄ɔsi ma̍ lɔ̄kū kpa̍a! O̍ ligbo̍ i̍ngɛ̍ɛ̄nɛ̄ ɔ̄kū ma̍, o̍ re̍ka ala̍ gba̍a lɛ yɛ̄grāa yɛ ē chabɔ̄ hīka ala̍ ɔ̍lɔ yɛ ē gbɛri̍ya̍ ē tū amɔ̍lɔ we̍? N i̍ yɛ ē kɔ̄ka hīka ala̍ pi̍ye̍mā la ɔgbɛri̍ya̍ tū u mɛ̍ ni̍. Yɛ̄grāa ji nīi ala̍ i̍ lɛ ya̍ i̍ngɔ̍ɔ ni̍ a̍nɛ. 11I̍ lɛgba yī ɔchɔ̍ɔnyɛ nīi n yɛ ē dɔ̄dɛ̄ a̍ni̍. Ɔjāmɔjā nīi n ge̍ lɛ ma̍ ē jɛ̄ um eyī. Wu̍chē oji̍ nɛ, n ngōngū nīi o̍ de ba̍ um eyī mɛ̍. 12N je̍ lɔkɔ nīi yeklo̍ ogbōgbo lɛ ma̍; n chī je̍ lɔkɔ nīi wɔdu ogbōgbo lɛ ma̍. Ami ma̍, n de lɛlā ɔtrɛ̍ba nūma̍ je̍ mɛ̍. Wu̍chē yī ɔla̍ā, ɛbɛha̍ ɛbɛha̍ kɛ̄ɛ yɛ̄grāa ɔha̍lɔha̍, n ge̍ nōnlīpu̍ kɛ̄ɛ ku̍ lɛmiyɛ oo, n ge̍ lɔ̄lɛ ɛjā mwɛbɛ ke̍ke̍ni̍ kɛ̄ɛ pi̍nyɛ̍ oo, o̍ ē jɛ̄ um eyī. 13N lwɔhu̍ ge̍ē yarɛ brii lipu̍ yī ita yī lɛlā ɔha̍lɔha̍ bū la wɔhu̍ nīi Ikra̍yisi de de u ma̍ ē mɛ.

14Ala̍ ya̍ hwɔhi kpɛ̍ɛji wu̍chē yī wɔbɔ̄ otōtū nīi ala̍ tū u hɔ̄ ma̍ yɛ̄grāa yī akanya nīi n tū ma̍ ma̍. 15Ala̍ Alifili̍pāyi ɛlɛjā jo̍ōkū hwɔhi hwɔhi hīka īchāha̍ ɔla̍ā nīi n pīya hī ɔcha yī Imɛsɛdo̍niya lɛɛ ɔrāarāa yī Wɔ̄kā Ɔlwɔnyɛ yī Ɔwɔ obī ge̍ kɔ̄ka ma̍, ogrēeyī yī āchɛ yī Ɔwɔ yī ɛbɛ yī ala̍ tū u wɔbɔ̄ i̍ngɔ̍ɔ lōri̍īwā a̍nɛ. Ala̍ lōra̍ala̍ re̍ka āchɛ nīi wu̍ ɛpiyabuna kɛ̄ɛ de ɛjā bo̍ōbi̍ ba̍la ami ma̍ a̍nɛ. 16Yɛ̄grāa nīi n hɔ̄ la Itɛsalona̍yīka ma̍, ala̍ de ɔjā nīi ku̍ um ɔkɔ gba̍a̍ ma̍ tɛ̄rɔ̄ hu u gla ugbo̍he ta̍. 17I̍ ɔjā ode tɛ̄rɔ̄ hu u i̍ngɔ̍ɔ nīi n chī chikpo̍ ka̍ka̍ a̍ni̍. Ɔma̍ hīka ɛpiyabuna hɔ̄ chɔba la anu̍ de ala̍ nīi n chikpo̍ a̍nɛ. 18Ɔjā nīi ge̍ē chabɔ̄ hīka amɔ̍lɔ nāa ɔjā wa̍a̍ nīi ala̍ de ma̍ hɔ̄ ma̍. Ɔjā nīi ala̍ de ma̍ de ya̍ ɔ̄kɔ̄kū! Ɛjā nīi ala̍ de wa̍a̍ nīi Ɛpafroda̍yītusi bī wā hɔ̄ ma̍ ma̍ ge̍ē jɛ̄ u lɛmiyɛ gblɛ̍ɛgblɛ̍ɛ. Ɛjā nīi ala̍ de de u ma̍ lɛ i̍ngɔ̍ɔ ke̍e̍ bāa ɛjā oni̍pī kwɛ̍kwɛ̍ nīi e̍ ē de ē de Ɔwɔ ma̍. O̍ lɛ bāa ɔjā nīi e̍ ē de ē pā Ɔwɔ nīi ē lɛ ɔ̍ wɔnyɛ nīi o̍ ē nāa ma̍. 19Bū la ɛbɛ ɔla̍ā, Ɔwɔ yī u nīi gbwɔdu mwɛbɛ mwɛbɛ la Ikra̍yisi Iji̍sɔ̄ɔsi ma̍ ge̍ē de ɔjā wa̍a̍ nīi ku̍ ala̍ ɔkɔ ma̍ ē de ala̍. 20Rīgā ɔnɔ̄kɔ̄kū ge̍ - iyī Ɔwɔ A̍dā yī alɔ i̍ngɔ̍ɔ kpɛɛ ku yɛ̄grāa ɔha̍lɔha̍! O̍ ge̍ lɛ i̍ngɔ̍ɔ.

Ɔma̍kpɔɔ

21N da ala̍ o̍be wa̍a̍, ala̍ āchɛ yī Ɔwɔ nīi - āchɛ yī Ikra̍yisi Iji̍sɔ̄ɔsi ma̍. Aɛ̍nɛ̍ yī alɔ wa̍a̍ nīi gblāa amu ba̍la ami ma̍ tɛ̄rɔ̄ yī ɔma̍kpɔɔ hu ala̍. 22Āchɛ yī Ɔwɔ nīi gbla̍a amu wa̍a̍ ma̍ tɛ̄rɔ̄ yī ɔma̍kpɔɔ hu ala̍ titi. Alipwɔ̍ɔ̄nū yī Isi̍sa pi̍i̍ tɛ̄rɔ̄ a̍nɛ.

23Ɔpiyɛ yī Ādā Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍.

Currently Selected:

ALIFILI̍PĀYI 4: YBASR

Highlight

Copy