1 ITI̍MŌTI 3
3
Alɛhu̍ yī Ogrēeyī yī āchɛ yī Ɔwɔ
1Lēchi̍ nīi e̍ ka a̍nɛ: Ɔ̄chɛ ge̍ yɛ ē chikpo̍ ge̍ wɛ ɔlɛhu̍ yī ogrēeyī yī āchɛ yī Ɔwɔ, u̍ku̍rɔ̍ ɔlamu-ɔlamu nīi o̍ yɛ ē chikpo̍ a̍nɛ. 2Ɔ̄chɛ nīi - ɔlɛhu̍ yī ogrēeyī yī āchɛ yī Ɔwɔ ma̍, ɔ̄chɛ nīi i̍ tū ābī ɔha̍lɔha̍ ni̍ ma̍ nɛ. Ɔlɔjā ge̍ē wu̍ ɔnyā ūkpo̍he kpo̍kpo̍. O̍ ge̍ē lɛ mlɛ̍ɛ̍. O̍ ge̍ē ku̍ iyī nū bī mɛ. O̍ ge̍ē yɛ̍ɛ̄lā ɔgɔgu. O̍ ge̍ē bī āchɔga ē ga wɔlɛ̍. O̍ ge̍ē ngū āchɛ lɛlā mɛ. 3O̍ ge̍ e̍e re̍ka ɔ̄chɛ ɔgwɔ̍ɔ̄jā ka̍ka̍ wɔ̄wīyā kɛ̄ɛ ɔ̄chɛ ɔya̍ āchɛ ɔjā wɔhu̍ wɔhu̍ ni̍. O̍ ge̍ē lɛ du̍mɔ̍ ē ya̍ nīi ɛbɛ ē gbo dɔ̍dɔ̍. O̍ ge̍ e̍e ywɔ̍ɔnyɛ yī okpo ni̍. 4Ɔlɔjā ge̍ē bī wɔlɛ̍ yī anu̍ ɔlɔjā yɛ̍yɛ̍ ē mɛ. O̍ ge̍ē ya̍ nīi aɛ̍pɛ̄ yī nū pɔ̍ɔkɔ yī nū la otūlichō odōde de ɔ̍. 5Wu̍chē oji̍ nɛ, ɔ̄chɛ i̍ ge̍ bī wɔlɛ̍ yī anu̍ ɔlɔjā mɛ ni̍, kana̍ nīi o̍ ge̍ē deyīrɛ ogrēeyī yī āchɛ yī Ɔwɔ ē mɛ ma̍? 6I̍ ɔ̄chɛ nīi - e̍e chɔ̄chɛ̄ ku Ɔwɔ īpīpɛ̄ ma̍ ge̍ē re̍ka ɔlɛhu̍ i̍ngɔ̍ɔ a̍ni̍. Nɛ̄ni̍ o̍ ge̍ē nū pwɛ̄lɛ̄ la ɛba̍achɛ ɔjɔ̄jɛ̄ nīi Ɔwɔ ē hɛ̍ ɔ̄ lɛpɔ̄ ɔdwɔ̄bi̍ bāa Ɔngūwɛ̄gā ma̍. 7Ɔ̄chɛ nīi āchɛ ɛha̍ ji nīi i̍ alogrēeyī yī āchɛ yī Ɔwɔ ni̍ ē tū ɔ̄ la ichō ma̍ ge̍ē re̍ka ɔlɛhu̍ a̍nɛ. Bū la ɛbɛ ɔla̍ā, e̍ i̍ ge̍ē de liwēyī de ɔ̍ ni̍; o̍ i̍ chī ge̍ē ngma̍ ē ta̍tū la ocho̍ōrī yī Ɔngūwɛ̄gā mɛ ni̍.
Āchɛ ɔtwɔ̄bɔ̄ la Ogrēeyī yī āchɛ yī Ɔwɔ
8Āchɛ nīi - āchɛ ɔtwɔ̄bɔ̄ la u̍ku̍rɔ̍ yī ogrēeyī yī āchɛ yī Ɔwɔ ma̍, aa̍ titi ge̍ ya̍ abɔ̄lɛ̄lā ɔnɛ̄ɛhɛhi ba̍la olēchi̍ lēchi̍. E̍ ge̍ e̍e gwa̍ ɛ̍mwɔ̄ ɔ̄kɔ̄kū kɛ̄ɛ ya̍ ānyānyi ni̍. 9E̍ ge̍ ta̍ābɔ̄ ku̍ lɛlā olēchi̍ lēchi̍ yī ɔtū ode chōche nūma̍ nīi e̍ de hi̍yɛchɛ ma̍ brii. E̍ ge̍ ya̍ i̍ngɔ̍ɔ la ɛri̍ya̍ yī ūkpɔ̄tū ɔlɛchra̍da̍da̍ yī wā. 10E̍ ge̍ ma āchɛ eli̍ngɔ̍ɔ ɛla̍ā ma̍ o̍bū; e̍ ge̍ ga la ɔmama̍ ɔla̍ā mɛ̍, o̍bū nīi e̍ ge̍ē ya̍ u̍ku̍rɔ̍ a̍nɛ. 11Anyā yī wā titi ge̍ lɛ abɔ̄lɛ̄lā ɛnɛ̄ɛhɛhi. E̍ ge̍ e̍e ka la āchɛ ni̍. E̍ ge̍ lɛ mlɛ̍ɛ̍. E̍ ge̍ yɛ̍ɛ̄lā lɛbɛ nīi āchɛ ge̍ de ɔtū che wa̍ la ɔjāha̍ ɔjāha̍ wa̍a̍. 12Ɔ̄chɛ ɔtwɔ̄bɔ̄ la u̍ku̍rɔ̍ yī ogrēeyī yī āchɛ yī Ɔwɔ ge̍ wu̍ ɔnyā ūkpo̍he i̍ngi̍ngɔ̍ɔ. O̍ ge̍ bī ayi̍ yī nū ba̍la alwɔlɛ̍ yī nū yɛ̍yɛ̍ i̍ngi̍ngɔ̍ɔ. 13Āchɛ nīi ē ya̍ u̍ku̍rɔ̍ ɔnɛ̄ɛhɛhi ma̍ ē de pīya āchɛ nīi āchɛ yɛ̄mɛ̄mɛ̄ ē tū wā lichō. Āchɛ eli̍ngɔ̍ɔ ē jɔ̍ɔkɔ ē kɛlā bāa ɔ̄chɛ nīi āchɛ ē darɔ̄ku lɛlā yī nū ma̍. O̍ ē lɛ i̍ngɔ̍ɔ nīi o̍ ge̍ re̍ka e̍ yɛ ē kɛlā yī ɔtū nīi alɔ wa̍a̍ de che la Ikra̍yisi Iji̍sɔ̄ɔsi ma̍.
Lɛlā ɔtrɛ̍ba ɔnɔ̄kɔ̄kū ɔha̍
14N yɛ ē ta̍ īpū nūma̍ ē tɛ̄rɔ̄ hu wɔ ma̍, n deyīche ɔwā ge̍ ma̍ wɔ la ɔ̄chī ɛpɛpa nūma̍. 15N ge̍ chī de ya̍ irwɛ, īpū nūma̍ ge̍ē chabɔ̄ hu̍ wɔ lɔkɔ nīi alɔ ge̍ē ya̍ la ogrēeyī yī āchɛ yī Ɔwɔ ma̍. Ogrēeyī nūma̍ - ogrēeyī yī wɔlɛ̍ yī Ɔwɔ nīi - Ɔwɔ ɔhɔ̄leyī ma̍ nɛ. Anu̍ ku̍ lɛlā olēchi̍ lēchi̍ bī bɔ̄ɔkɔ nīi ogblo̍ ɔlwɔhɔ̍hu̍ ɔha̍ ē ku̍ u̍nu̍ ē bī ma̍ a̍nɛ. 16Lɔkɔ nīi lɛlā ɔtrɛ̍ba yī ɔgulɛ̄lā yī Ɔwɔ yī alɔ lɔ̄kɔ̄kū ke̍ke̍ni̍ ma̍, ɔ̄chɔ̄chɛ i̍ ge̍ē ta̍ahu̍ yī nū mɛ ni̍.
Ikra̍yisi wā la yɛchɛ tū ibi̍īyē bāa ɔ̄chɛ̄ɛchɛ ma̍.
Uhu yī Ɔwɔ de chabɔ̄ hīka ɔ̍lɔ lɛ kpakpa gɔ̄grāa.
Ayɛ̍ɛ̄chɛ̄rɔ̄ yī Ɔwɔ chī ma̍ ɔ̄.
E̍ bī lɛlā yī nū ge̍ ka de ɔchamɔcha wa̍a̍.
Āchɛ de ɔtū che ɔ̍ amu la ajɛyɛ̄ɛchɛ.
Ɔwɔ de ɔ̍ nāa pīya ga ichō.
Currently Selected:
1 ITI̍MŌTI 3: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
