1 ALITƐSALONA̍YĪKA 5
5
Ala̍ ti̍bi̍īyēchɛ̄ lɔ̄lā gbo̍ ɔ̄chī ɔwɔ̄wā yī Ādādā yī alɔ
1Aɛ̍nɛ̍ yī u, o̍ i̍ ngma̍ nīi n ge̍ gba̍a ta̍ īpū kɛlā ku̍ yɛ̄grāa ba̍la olo̍ nīi lɛlā nūma̍ wa̍a̍ ge̍ē ya̍ ma̍ ē de ala̍ gɛ ni̍. 2Wu̍chē oji̍ nɛ, ala̍ ɛlɛjā jo̍ōkū hwɔhi hwɔhi hīka Ɔ̄chī Ɔwɔ̄wā yī Ādā ge̍ē lɛ lɔkɔ nīi uwī wā la otu̍ ma̍. 3Yɛ̄grāa nīi āchɛ ge̍ē ka hīka ɔjāha̍ ɔjāha̍ wa̍a̍ ɔ̍lɔ hi̍ya cho̍cho̍, gbo dɔ̍dɔ̍ ke̍e̍ mɛ̍ ma̍, ɔchāajɛ ge̍ē wā la aa̍ ɔpɔ̄ɔpɛ̄. O̍ ge̍ē lɛ ke̍e̍ bāa wɔma yī ɔyi̍ nīi ɔnyā lā ma̍. Ɔ̄chɔ̄chɛ i̍ ge̍ē hɛ̍ga ē hī ɔchāajɛ ɔla̍ā mɛ ni̍. 4Aɛ̍nɛ̍ yī u, ala̍ ma̍ i̍ tū la ɛbɛ odobū ni̍ ma̍; ɔ̄chī ɔla̍ā i̍ ge̍ē bū ala̍ kpu̍u̍ bāa uwī ma̍ ni̍. 5Ala̍ wa̍a̍ - āchɛ yī ɛbɛ ɔlɛgēdēgēdē nɛ; ala̍ - āchɛ yɛnɔ gēdēgēdē nɛ. Alɔ i̍ āchɛ yī otu̍ kɛ̄ɛ ɛbɛ odobū īchāha̍ īchāha̍ ni̍. 6Wu̍chē yī ɔla̍ā, alɔ ā gbwɔlā bāa āchɛ ehēhī ma̍ ni̍; alɔ ā gboleyī myɛ̄grāa-myɛ̄grāa. Alɔ ā de wīyɔ̄jā ɔwɔ̄wīyā ni̍. 7Otu̍ nīi āchɛ ē gbwɔlā a̍nɛ; otu̍ nīi āchɛ chī gwa̍ ɔjā de ē wɔ̄wīyā a̍nɛ. 8Alɔ ma̍ - āchɛ yī yɛnɔ gēdēgēdē nɛ. O̍ lɛ i̍ngɔ̍ɔ ma̍ alɔ ā de wīyɔ̄jā ɔwɔ̄wīyā ni̍. Alɔ ā nāa ɔtū ode chōche ba̍la ɔhɔtū ru la iyē bāa a̍bi̍ije ɔlɛpatapata ɔha̍ nīi e̍ ē de ē kla̍ ɔgɛgɛ lɛwu̍ okpo̍ōkpo̍ ma̍. Ɔhɛ̍ta̍ nīi alɔ deyīche ma̍ ge̍ re̍ka okpo ɔkla̍lɛhu̍. 9Ɔwɔ i̍ hu alɔ ohōhu nīi alɔ ge̍ē chōo̍chē mi̍chi̍ yī ɔtū ngurangura yī nū ni̍. Ɔkɔkɔ ɔla̍ā, o̍ hu alɔ hɛ̄ɛbɛ nīi alɔ ge̍ē nāa ɔhɛ̍ta̍ ē bū la abɔ̄ yī Ādādā yī alɔ Iji̍sɔ̄ɔsi Ikra̍yisi. 10Iji̍sɔ̄ɔsi nūma̍ pīyaku̍ de alɔ, hɛ̄ɛbɛ nīi alɔ ge̍ē hɔ̄leyī ngmo̍tu̍chɛ̄ ba̍la anu̍, o̍ ge̍ ro̍ōre̍ka alɔ hɔ̄leyī kɛ̄ɛ ko̍ōku̍ la olo̍ nīi o̍ ge̍ē wā ma̍. 11Wu̍chē yī ɔla̍ā, ala̍ ā tū ɔ̍nyīnū yɛngrɔ̄ɔ, tū ɔ̍nyīnū wɔbɔ̄ i̍ngɔ̍ɔ lɔkɔ nīi ala̍ yɛ aa̍ ē ya̍ ma̍ kpɔ̍ɔ̍ gɛ.
Ɔna yī lɛlā ba̍la ɔma̍kpɔɔ
12Ala̍ chu̍chu̍u, aɛ̍nɛ̍ yī u! Ala̍ ā de otūlichō hwɔhi hwɔhi de āchɛ nīi yɛ ē ya̍ u̍ku̍rɔ̍ la olo̍ōlo̍ yī ala̍ ma̍. Āchɛ ɛla̍ā nīi Ādā hu wa̍ nīi ē ge̍ē deyīrɛ ala̍ ē ngū ala̍ lɛlā ma̍ nɛ. 13Ala̍ ā yɛ̍ɛ̄lā tāa aa̍ la otūlichō ɔlamu ɔlamu ba̍la ɔhɔtū wu̍chē yī u̍ku̍rɔ̍ nīi e̍ yɛ ē ya̍ ma̍. Ala̍ ā hɔ̄ la ogbodɔ̍dɔ̍ ba̍la ɔ̍nyīnū.
14Ala̍ chu̍chu̍u, aɛ̍nɛ̍ yī u! Ala̍ ā ta̍ āchɛ nīi gblāa ji nīi i̍ yɛ ē ya̍ ɔjɔ̄jā ni̍ ma̍ ɔna gɛ. Ala̍ ā tū āchɛ ɛlɛkpekpe wɔbɔ̄ nīi e̍ ge̍ lɛ brii. Ala̍ ā tū āchɛ ɛlɛkwīkwī wɔbɔ̄ nīi ala̍ ā ge̍ mlɔtū kpɔ̍ɔ̍ tāa āchɛ wa̍a̍. 15Ala̍ e̍e chɛ̄ nīi āchɛ ge̍ bī lɛlā abi̍ ɔyɔ̍ɔ̄ya̍ ku̍re̍ yī lɛlā abi̍ ni̍. Ɔkɔkɔ ɔla̍ā, ala̍ ā chɛ̄rī gba̍a̍ lɛbɛ nīi ala̍ ge̍ lɛ̍ɛhi tāa ɔ̍nyīnū ba̍la āchɛ wa̍a̍ myɛ̄grāa-myɛ̄grāa.
16Ala̍ ā wɔ̄wīyā myɛ̄grāa-myɛ̄grāa. 17Ala̍ ā jɔhā de Ɔwɔ yɛ̄grāa ɔha̍lɔha̍. 18Ala̍ ā da o̍be yī wɔga la lɛlāha̍-ɛlāha̍ wa̍a̍. Ɔjā nīi Ɔwɔ chikpo̍ la abɔ̄ yī ala̍ la ɔhɔ̄leyī nīi ala̍ lɛ la Ikra̍yisi Iji̍sɔ̄ɔsi ma̍ hɔ̄ aa̍ a̍nɛ.
19Ala̍ e̍e ku̍ Uhu Ɔnɛ̄ɛhɛhi yī Ɔwɔ chi̍yɛ ni̍. 20Ala̍ e̍e chi̍hi̍ya̍ yī ɛrɔ̄ nīi Ɔwɔ tū ma̍ ni̍. 21Ala̍ ā de ɔjāha̍ ɔjāha̍ wa̍a̍ tū la ɔmama̍ o̍bū: Ala̍ ā nāa onīi - ɔnɛ̄ɛhɛhi ma̍. 22Ala̍ gwō gbo̍o̍ hī ɔdwɔ̄bi̍ ɔha̍lɔha̍ wa̍a̍.
23Ɔwɔ nīi ē de ogbodɔ̍dɔ̍ ē de alɔ ma̍ ge̍ ya̍ nīi ala̍ ge̍ lɛ cha̍ri̍cha̍ri̍ la ɔpɔ̄pū ɔha̍lɔha̍ wa̍a̍. O̍ ge̍ de ūkpɔ̄tū ba̍la uhu ba̍la ibi̍īyē yī ala̍ wa̍a̍ gbō hwɔhi hwɔhi. O̍ ge̍ ya̍ i̍ngɔ̍ɔ hɛ̄ɛbɛ nīi lɛfiyɛ ɔha̍lɔha̍ ge̍ e̍e hɔ̄ de ala̍ la Ɔ̄chī Ɔwɔ̄wā yī Ādādā yī alɔ Iji̍sɔ̄ɔsi Ikra̍yisi ni̍. 24Anu̍ ɔlɔjā nīi hī ala̍ ɛra̍ ma̍ ge̍ē ya̍ i̍ngɔ̍ɔ, wu̍chē oji̍ nɛ, o̍ ngma̍ la ode ɔtū che ɔ̍.
25Ala̍ ā jɔhā de alɔ titi, aɛ̍nɛ̍ yī u!
26Ala̍ ā da aɛ̍nɛ̍ yī alɔ wa̍a̍ o̍be la ɔgɛnɛgɛnɛ yī lɛɛ̍nɛ̍.
27Ala̍ ā chu̍chu̍u aɛ̍nɛ̍ yī u! Bū la wɔhu̍ yī Ādādā ɔlɔjā, ala̍ ā ma̍ īpū nūma̍ ka de aɛ̍nɛ̍ yī alɔ wa̍a̍.
28Ɔpiyɛ yī Ādādā yī alɔ Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍.
Currently Selected:
1 ALITƐSALONA̍YĪKA 5: YBASR
Highlight
Share
Copy
Want to have your highlights saved across all your devices? Sign up or sign in
© 2020 Bible Society of Nigeria (second edition)
