1 ALITƐSALONA̍YĪKA 2

U̍ku̍rɔ̍ nīi Ipɔ̍ɔli ya̍ la Itɛsalona̍yīka ma̍

1Aɛ̍nɛ̍ yī u, je̍ka aa̍ ala̍ jo̍ōkū hwɔhi hwɔhi hīka ɔwɔ̄wā nīi alɔ wā dikpo̍ba̍ ala̍ ma̍ i̍ ta̍anū ni̍ mɛ̍? 2Je̍ka aa̍ ala̍ jo̍ōkū lɔkɔ nīi e̍ ya̍ alɔ ichi̍ ji̍gījigī, pra̍a alɔ ɛcha̍ ɛbɛ̍bɛ̍ abɔ̍ɔ la Ifili̍pāyi o̍bū nīi alɔ wā dikpo̍ba̍ ala̍ abɔ̍ɔ la Itɛsalona̍yīka ma̍? Āchɛ ɛha̍ chɔ̄chɛ̄ de alɔ ni̍ nyaa ma̍, Ɔwɔ yī alɔ chī tū alɔ yɛngrɔ̄ɔ nīi alɔ kā Wɔ̄kā Ɔlwɔnyɛ nīi bū la abɔ̄ yī nū ma̍ kpɔ̍ɔ̍ de ala̍. 3Ɔna yī lɛlā nīi alɔ wā ge̍ ta̍ ala̍ ma̍, alɔ i̍ ka la oko̍o ɔgbɔ̄gbla, kɛ̄ɛ ūkpɔ̄tū ɔdwɔ̄bi̍, kɛ̄ɛ chikpo̍ ge̍ē ya̍ ala̍ a̍chālā ni̍. 4Ɔkɔkɔ ɔ̍lɔma̍, lɔkɔ nīi Ɔwɔ chikpo̍ ke̍e̍ ma̍ nīi alɔ ka de ala̍ a̍nɛ. Wu̍chē oji̍ nɛ, o̍ nāa alɔ hwɔhi hwɔhi ma̍ nīi o̍ de Wɔ̄kā Ɔlwɔnyɛ nūma̍ tū alɔ la abɔ̄ a̍nɛ. I̍ ɔjā nīi lɛ āchɛ̄ɛchɛ wɔnyɛ ma̍ nīi alɔ ē ya̍ a̍ni̍; onīi lɛ Ɔwɔ ɔlɔjā wɔnyɛ ma̍ nīi alɔ ē ya̍ a̍nɛ. Ɔwɔ nūma̍ ē ma ūkpɔ̄tū yī alɔ ē ma̍ a̍nɛ. 5Je̍ka aa̍ ala̍ jo̍ōkū hwɔhi hwɔhi hīka alɔ wā ma̍, alɔ i̍ chī bī oko̍o yī lɛlā ɔlɛgɛnɛgɛnɛ yī yɛ̍gra̍ ni̍. Alɔ i̍ chī gba̍a bī oko̍o yī lɛlā ita nīi ge̍ē tu̍ ānyānyi yī alɔ ē trɛ̍ba ma̍ kɛlā de ala̍ ni̍. Ɔwɔ ɔlɔjā - itɛ̍ɛhi̍yɛ̍ yī alɔ nɛ. 6Alɔ i̍ ya̍ hɛ̄ɛbɛ hīka āchɛ ge̍ kā alɔ ɔkɔ̄kā ni̍. Alɔ i̍ u̍tu chōchikpo̍ i̍ngɔ̍ɔ bū la abɔ̄ yī ala̍ o̍bo̍bū ge̍ē hwabɔ̄ yī āchɛ ɛha̍ ni̍. 7Bāa alɛrɔ̄ yī Ikra̍yisi ma̍, alɔ ke̍ ge̍ chikpo̍ yī ɔjā la abɔ̄ yī ala̍ mɛ. Alɔ hɔ̄ abɔ̍ɔ tāa ala̍ ma̍, alɔ chī lɛ mlɛ̍ɛ̍ kpɛ̍ɛ bɔ̄ɔkɔ nīi ɛ̍nɛ̍ ɔlɔyi̍ ē deyīrɛ ayi̍ yī nū ma̍. 8Wu̍chē yī ɔhɔtū nīi alɔ lɛ de ala̍ gba̍a̍ ma̍, alɔ chikpo̍ nīi ala̍ ge̍ bɔ̍ɔ̄ba̍ nāa Wɔ̄kā Ɔlwɔnyɛ yī Ɔwɔ nūma̍ tāa alɔ. O̍ gba̍a - ɔla̍ā ke̍e̍ ni̍, alɔ ge̍ē de ɔhɔ̄leyī yī alɔ ē lā de ala̍ i̍ngi̍ngɔ̍ɔ. Ala̍ hi alɔ ɔtū gba̍a lēchi̍ lēchi̍. 9Aɛ̍nɛ̍ yī u! Je̍ka aa̍ ala̍ bla hwɔhi hwɔhi lɔkɔ nīi alɔ ya̍ u̍ku̍rɔ̍ gba̍a̍ abɔ̍ɔ ma̍! Alɔ ē ya̍ la yɛnɔ ē ya̍ la otu̍. Alɔ yɛ ē ya̍ i̍ngɔ̍ɔ hɛ̄ɛbɛ nīi alɔ i̍ ge̍ē de ē pīya ɔkpalɛ̄kā de ala̍ la olo̍ nīi alɔ yɛ ē kā Wɔ̄kā Ɔlwɔnyɛ nīi bū la abɔ̄ yī Ɔwɔ ma̍ ni̍.

10Ala̍ ɛlɛjā - itɛ̍ɛhi̍yɛ̍ yī alɔ nɛ; Ɔwɔ titi - itɛ̍ɛhi̍yɛ̍ yī alɔ i̍ngi̍ngɔ̍ɔ nɛ. Lɛlā nīi alɔ ē ya̍ pīyeyīta̍ ala̍ āchɛ nīi de ɔtū che Ɔwɔ ma̍ lɛ cha̍ri̍cha̍ri̍; o̍ gba̍a̍ lɛ kpakpa, o̍ i̍ tū ābī ɔha̍lɔha̍ ni̍. 11Je̍ka aa̍ ala̍ jo̍ōkū hīka alɔ ē yɛ̍ɛ̄lā tū ɔ̄chɛmɔ̄chɛ yī ala̍ i̍ngɔ̍ɔ ke̍e̍ lɔkɔ nīi a̍dā ē ya̍ tāa ayi̍ yī anu̍ ɔlɔjā ma̍! 12Alɔ ē tū ala̍ yɛngrɔ̄ɔ; alɔ ē ya̍ nīi ūkpɔ̄tū lɛ ala̍ yaya; alɔ ē ra̍ābɔ̄ i̍ngi̍ngɔ̍ɔ ē de ala̍ hīka ala̍ ge̍ ya̍ ɔhɔ̄leyī nīi lɛ Ɔwɔ wɔnyɛ ma̍. Wu̍chē oji̍ nɛ, anu̍ hī ala̍ ɛra̍ wā ge̍ē nāa ɔpiyɛ yī Ɔchwɔ̄lɛ̍ Oro̍ōre̍ yī nū ba̍la rīgā yī nū a̍nɛ.

13Wu̍chē yī lɛlā nūma̍ i̍ngi̍ngɔ̍ɔ, alɔ yɛ amu ē da Ɔwɔ o̍be myɛ̄grāa-myɛ̄grāa. Yɛ̄grāa ɔla̍ā nīi alɔ bī ɛrɔ̄ yī Ɔwɔ wā ge̍ de ala̍ ma̍. Ala̍ i̍ nāa anu̍ bāa ɛrɔ̄ yī ɔ̄chɛ̄ɛchɛ ɔlamu ma̍ ni̍. Lēchi̍, ɛrɔ̄ yī Ɔwɔ i̍ngɔ̍ɔ ichɛ̄ɛhi nɛ. Wu̍chē oji̍ nɛ, Ɔwɔ ɔlɔjā yɛ ē ya̍ u̍ku̍rɔ̍ la ibi̍īyē yī ala̍ āchɛ nīi de ɔtū che ɔ̍ ma̍ a̍nɛ. 14Aɛ̍nɛ̍ yī u! Ita yī lɛlā nīi ya̍ ogrēeyī yī āchɛ yī Ɔwɔ abɔ̍ɔ la ajɛ yī Ijudi̍ya ma̍ ya̍ ala̍ titi mɛ̍. Aa̍ āchɛ ɛla̍ā nīi - āchɛ yī Ikra̍yisi Iji̍sɔ̄ɔsi abɔ̍ɔ ma̍ nɛ. Alɔcha yī ala̍ ɛlɛjā ya̍ ala̍ ichi̍ dwɔ̄bi̍ dwɔ̄bi̍ lɔkɔkɔ nīi 15Iju̍u ɛla̍ā ngmo̍ Ādā Iji̍sɔ̄ɔsi ba̍la āchɛ ɔkɛrɔ̄ yī Ɔwɔ, o̍bū gba̍a ya̍ alɔ nūma̍ ichi̍ dwɔ̄bi̍ dwɔ̄bi̍ ma̍. E̍ i̍ yɛ ē yɛ̍ɛ̄lā nīi lɛ Ɔwɔ wɔnyɛ ma̍ ni̍ lachi̍lachi̍. U̍hu̍ ke̍e̍ nīi e̍ gba̍a yɛ ē ya̍ āchɛ̄ɛchɛ a̍nɛ. 16E̍ gba̍a nōnuni̍ chikpo̍ ge̍ ya̍ nīi alɔ pi̍ye̍mā la ɛrɔ̄ yī Ɔwɔ la ɔkɔ̄ka de Ɛchɛkɔcha, ɛrɔ̄ nīi ge̍ē bī ɔhɛ̍ta̍ ge̍ē de wa̍ ma̍! Ɔgɔ̄grāa yī lɛlā ɔdwɔ̄bi̍ yī wā wa̍a̍ chlɛhu̍ hɔ̄ aa̍ a̍nɛ. U̍ma̍ama, Ɔwɔ hɛ̍ wā lɛpɔ̄ nīi e̍ ge̍ē mi̍chi̍ ɔdwɔ̄bi̍ ɔdwɔnyɛ bɛ̍ɛ̄nɛ̄.

O̍ hla̍ Ipɔ̍ɔli la ɔgba̍a ku̍chē ga Itɛsalona̍yīka

17Aɛ̍nɛ̍ yī u! Alɔ ge̍ hɛ̍ hwɛ̍ɛ hī ala̍ yɛ̄grāa pi̍nyɛ̍ ji mɛ̍, eyī yī ala̍ ē bīya alɔ kpɛ̍ɛ; alɔ ē chikpo̍ oge̍ gba̍a ma̍ ala̍. I̍ ɔhɛ̍ hwɛ̍ɛ hī ala̍ la ūkpɔ̄tū ni̍, iyī ibi̍īyē ji nɛ. 18Alɔ yɛ ē chikpo̍ ge̍ ku̍chē wā dikpo̍ba̍ ala̍. Ami Ipɔ̍ɔli pi̍i̍ ma̍ chikpo̍ ge̍ wā abɔ̍ɔ gbajɛ la igbɛmɛ̍ɛmla̍a mɛ̍; Isa̍tan i̍ chɛ̄ de alɔ ni̍ a̍nɛ. 19Ala̍ je̍ma̍, oji̍ - ɔjā obī wɔ̄wīyā ba̍la odeyīche yī alɔ ma̍? Ala̍ ke̍e̍ nɛ, i̍ ɔ̄chɔ̄chɛ ni̍. Ala̍ - ohu̍ nīi alɔ ge̍ē rɛ la iyɔ̄bū yī Ādādā yī alɔ Iji̍sɔ̄ɔsi Ikra̍yisi ē bī yɛngrɔ̄ɔ nīi alɔ ya̍ ma̍ ē gbogū la ɔ̄chī ɔla̍ā nīi o̍ ge̍ē wā ma̍ a̍nɛ. 20Lēchi̍, ala̍ re̍ka ɛba̍achɛ yī alɔ ba̍la ɔwɔ̄wīyā yī alɔ a̍nɛ.

Currently Selected:

1 ALITƐSALONA̍YĪKA 2: YBASR

Highlight

Copy