1 ALITƐSALONA̍YĪKA 1

Owu̍tu

1Ami Ipɔ̍ɔli ba̍la Isa̍yi̍lāasi ba̍la Iti̍mōti ta̍ īpū nūma̍ tɛ̄rɔ̄ a̍nɛ. Alɔ tɛ̄rɔ̄ nūma̍ hu ala̍ ogrēeyī yī āchɛ yī Ɔwɔ nīi hɔ̄ la Itɛsalona̍yīka ma̍; ala̍ nīi - āchɛ yī Ɔwɔ A̍dā ba̍la Iji̍sɔ̄ɔsi Ikra̍yisi nīi - Ādādā ma̍ nɛ.

Ɔpiyɛ ba̍la ogbodɔ̍dɔ̍ ge̍ - iyī ala̍.

Ɔhɔ̄leyī ba̍la ɔtū Ode chōche yī Alitɛsalona̍yīka

2Myɛ̄grāa-myɛ̄grāa, alɔ ē da Ɔwɔ o̍be wu̍chē yī ala̍. Alɔ ē jɔhā de Ɔwɔ ma̍, alɔ ē bla ē tū ala̍ myɛ̄grāa-myɛ̄grāa. 3Wu̍chē oji̍ nɛ, alɔ lɛ ɔbɔ̄bla la eyī yī Ɔwɔ A̍dā yī alɔ lɔkɔ nīi ala̍ bī ɔtū ode chōche yī ala̍ yɛ ē ya̍ u̍ku̍rɔ̍ ma̍. Alɔ ma̍ lɔkɔ nīi ɔhɔtū yī ala̍ ya̍ nīi ala̍ yɛ ē ya̍ u̍ku̍rɔ̍ gba̍a̍ ma̍. Alɔ gba̍a ma̍ lɔkɔ nīi ala̍ deyīche Ādādā yī alɔ, Iji̍sɔ̄ɔsi Ikra̍yisi brii ma̍. 4Aɛ̍nɛ̍ yī u, alɔ jo̍ōkū hīka Ɔwɔ yɔ̍ɔhɔtū yī ala̍; hu ala̍ ohōhu de ala̍ kwɔbɔ̄ de iyī nū ke̍e̍. 5Wu̍chē oji̍ nɛ, alɔ bī Wɔ̄kā Ɔlwɔnyɛ nūma̍ wā ge̍ de ala̍ ma̍, i̍ lɛlā ɔka la oko̍o ke̍e̍ ji ni̍. Wɔhu̍ ba̍la Uhu Ɔnɛ̄ɛhɛhi yī Ɔwɔ tū abɔ̍ɔ la anu̍ a̍nɛ. Alɔ chī jo̍ōkū hwɔhi hwɔhi hīka ɛrɔ̄ nīi alɔ ē ka ma̍ - ichɛ̄ɛhi nɛ. Je̍ka aa̍ ala̍ ma̍ lɔkɔ nīi alɔ ē ya̍ ɔhɔ̄leyī yī alɔ yɛ̄grāa nīi alɔ hɔ̄ abɔ̍ɔ ba̍la ala̍ ma̍? Alɔ ē ya̍ wu̍chē yī ɔnɛ̄ɛhɛhi yī ala̍. 6Alɔ ba̍la Ādā ɔlɔjā nīi ala̍ yɛ ē mi̍yɛ̄gbla yī alɔ a̍nɛ. Ala̍ mɔ̍ɔ̄mi̍chi̍ ke̍ke̍ni̍ nyaa ma̍, ala̍ chī nāa ɛrɔ̄ ɔla̍ā la ɔwɔ̄wīyā nīi ē bū la abɔ̄ yī Uhu Ɔnɛ̄ɛhɛhi yī Ɔwɔ ma̍. 7Bū la ɛbɛ ɔla̍ā, ala̍ de pīya āchɛ nīi āchɛ yī Iji̍sɔ̄ɔsi wa̍a̍ la ajɛ yī Imɛsɛdo̍niya ba̍la Igri̍isi wa̍a̍ ge̍ē gbla ala̍ bɛ̍ɛ̄nɛ̄. 8Wu̍chē oji̍ nɛ, ɛrɔ̄ yī wɔ̄kā yī Ādā ngrāa bū abɔ̍ɔ ma̍, i̍ Alimɛsɛdo̍niya ba̍la Igri̍isi ke̍e̍ po̍ a̍ni̍. Wɔ̄kā yī ala̍ lɔkɔ nīi ala̍ de ɔtū che Ɔwɔ ma̍ mīyanya ga ɛbɛha̍ ɛbɛha̍ wa̍a̍ mɛ̍. O̍ lɛ i̍ngɔ̍ɔ ma̍, alɔ i̍ lɛ lɛlɛ̄lā nīi alɔ ge̍ē ka ni̍. 9Āchɛ ɛla̍ā wa̍a̍ yɛ ē kɛlā ku̍ ala̍ lɔkɔ nīi ala̍ nāa alɔ ba̍ ɔtū yɛ̄grāa nīi alɔ wā ge̍ ma̍ ala̍ ma̍. E̍ yɛ ē ka lɔkɔ nīi ala̍ tu̍labɔ̄ hī ɛchi̍yɛka ge̍ nāa Ɔwɔ, hɛ̄ɛbɛ ge̍ē hɔ̍chɛ̍ yī Ɔwɔ olēchi̍ lēchi̍ nīi hɔ̄leyī ma̍. 10Bɛ̍ɛ̄nɛ̄ ma̍, ala̍ yɛ ē gbēyī yī Ɔyi̍ yī Ɔwɔ nīi o̍ ge̍ē bū la ichō wā. Ɔyi̍ yī nū, Iji̍sɔ̄ɔsi nīi o̍ de ɔ̍ hye̍ēyī bū la okū nīi de alɔ wu̍ ngmɛ̍ɛchɛ hī ichi̍ ɔdwɔ̄bi̍ ɔdwɔnyɛ ɔla̍ā nīi Ɔwɔ ge̍ē hɛ̍ āchɛ lɛpɔ̄ yī nū ma̍ nɛ.

Currently Selected:

1 ALITƐSALONA̍YĪKA 1: YBASR

Highlight

Copy