Okwan 8
8
1Kyi/mû kyi-nyîn n mě â a/mû wǎn-boné ejí mú onyinchéng,
mú boné ejí o/kúng abî emen o-nen ǎ.
Ne â m/mû n/kâm ǒ kâng ké ótíbingé m/mû m-man n ǒ efé ocím,
onet o*fí mú odakérê*.
2Me m/mû n/chi n-kúng ǒ byi-dim ké kyise ńkyí boné ejí
ké kyikit ńkyí nda ǒ eman etángê kyi-kim ne kyijé.
Me m/mû n/chi n-kye ǒ bato ḿbé badabwóm
ne ḿbé ba/chi ké babî ḿbé byirim-kyichí ńkyí badakó pamagáránat a-jwáp.
3Bubwô-eku eyên mbu mě ké dyishí,
ne bubwô-etyebéng eyên mbu bu-tare ng mě ké byiko.
4Banyinyi-Jerúsélem, ryí n̂g mě ocím ba/fu,
ben baa*ba/chi ba-két bě kyijé eten echi*.
Ekwan Nyâchât
Ḿbé banyinyi ba/faa ba/fu,
5yeě něen mú o/fím ké kyikim-dyikán mu o-bâ,
ba-kpárê barî abwô ne ókyî emen.
Mú onyinyi o-faa o/fu,
me n/jwóbê ǒ ké kyikû-kyichí ńkyí badakó ápil
ké kyikit ńkyí ba/mû ba/fwon ǒ.
6*Dafé dyityém ké kyijé kyikíri*
kyi-cibi ne ńkyí ejí*.
*Dakpárê onet okíri abwô* kyi-cibi ne me*.
Kyijé nkyi ne busa wǎ bukyû,
ne orêm o/bên to wǎ bukyû.
Kyijé nkyi kyi-kédê ng wǎ bumang-okwâ
ne nkyi kyi-shí i byěm wǎ okwâ mú mu o-mang ng o-shwôm.
7Omu o*fí mú odaman erîp kánkyí*.
Kace ka*fí ńké kadasú ka-man ecít kánkyí*.
Nké â nang yeě o/kan o/fu,
nyǐ o-ré ng kyijé ne esang emen,
ecábé nyǐ nyi nké nyǐ odakoo.
Bwǎn-bané ḿbé banyinchéng ḿbé mú onyinyi ba-faa ba/fu,
8be byimu ne nche mú wǎn-onyinyi,
abî emen a*da/kán ne*.
Be byi-chi i ebóng byi-kye ǎ,
â onyinchéng o/bê búkyî kyikit emen.
9Â nyǐ mu ekpe,
be byi/chi byi-bi ǎ kiǐnyáám-kyise-mbâm ké syílyíba.
Nké â nyǐ mu ocím-dyifyi,
be byi/chi byi-kúng byicê-byichí ḿbyí shwaneshwane byi-ku ǎ.
Mú onyinyi o/chîfaa o/fu,
10me mu ekpe, ne abî ejí nyi wǎ biǐnyáám-byise-mbâm ḿbyí ekpe ányi.
Ókyî ejí mu o-nyît ng o/fu,
â me mu ne nyǐ me n-ri ng bunyîn-dyityém ne kii*tyú mě*.
Mú onyinchéng o-faa o/fu,
11Otu Sólómon mu ne kyifát ké kyikit ńkyí badakó Bâl-Hámon.
Bamkpang byifát mbe kô ḿbé nyǐ odayámê kámbé kánkyí.
Mkpang kyifát nang orá mu o-kyâ égot-akpuga nyí ba/chi ké syílyíba etánge.
12Mîng Otu Sólómon o-koo égot-akpuga emen etánge,
ne bamkpang byifát ba-koo ng égot-akpuga ebónge nyí e/já kámbé.
Me mu ne kyifát ńkyí ejí.
13Onet-kyijé ejí, mîng mě n-jwo ejá eyên nyí nyi e-fím m ké kyifát.
Bacín ejí mbe ba-bám m ba/fu,
mbé ba-jwo ng ejá eyên.
Mú onyinyi o/chîfaa o/fu,
14ókyî ejí, bâ a-kâm mě wǎ etong.
Bâ wǎ otyép-etong mú mu kyíbóng-eku
ké kyikit ńkyí esang-kasu nyi e-kán n.
Currently Selected:
Okwan 8: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
