Sâm 92
92
Okwan-Akpee
1Nkyi kanong ńkyí badakó Óburúkpâbí asǎma.
Ô Osówo mú kyíbóng kyíbóng,
nkyi kanong ńkyí badakwán ekwan-akpee ba-kye ǒ.
2Nkyi kanong ńkyí badasét kángkáng dyicófóróng
kyi-kim ne kyijé eyên ńkyí kii*man*
ne kángkáng buchú kyi-kim ne ocím eyên eryí mú aa*bên*
3ké ane ekim nyí edanyîn
ké dyícîng ne égûm ekim.
4Biǐtí-byěm ḿbyí amu a-chi i, ǎ Óburúkpâbí,
mbyi byi-chi i mě n-kyú ké bunyîn-dyityém.
Me mu n-kwán n ké bunyîn-dyityém ké bubwô ńkyí wo aa/chi.
5Óburúkpâbí, byěm ḿbyí amu a-chi i mbyi biǐtí.
Okabe eyên o/rêe o-shwôm.
6Enyam-onet ee*nyît*
ne mgbole-onet oo*man enyît dyishí* o/fu,
7nang bambên atyém mbe ba-byí i wǎ biǐbyâa,
nang banchi byibî mbe ba-já ng byěm kanong kanong,
ba/chi ba-ju kámbé kángkáng,
8ké nǎ, wo, ǎ Óburúkpâbí,
nké a/rêe a-shwôm ne banyá.
9Be byimu byi-nyît ng byi/fu,
banet-bushwôn eyên ba/chi ba-kpú,
byi-nyît ng to byi/fu,
ba/chi ba-kpógê kángkáng bambên atyém.
10Wo aa/chi mě n-shwane wǎ kiinyinyǎm.
Wo aa/jware mě ne bunyîn-dyityém.
11Me nn/ri ké baa/kpógê banet-bushwôn ejí,
ne nn/jwo bukyû ḿbú bambên atyém mbe ba-tii ng.
12Banet ḿbé mbe ba-chi i kanong ba-nwa ng wǎ bayêp.
Mbé ba/chi ba-kán wǎ byichí ḿbyí Lebánon.
13Mbé mbe wǎ byichí ḿbyí ba/kwón ké kyise ńkyí Óburúkpâbí,
ḿbyí mbyi byi-kán n ké kyibám ńkyí Osówo eten,
14ḿbyí byi/tôong byi-zím m byirim ké bukâa
ne mbyi cîpcîp ne eshǎan kángkáng nkéré.
15Ńkyín nkyi kyi-tông ng kyi/fu,
Óburúkpâbí oo*ryí acît*.
Kyi/fu, Onet-Obâm ejí o*fí ne ébîn*.
Currently Selected:
Sâm 92: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
