Sâm 116
116
Onet mú Osówo o/nyii ǎ ké Bukyû ekpú o/kye Osówo Akpee
1Óburúkpâbí mu o-jê ng mě,
ké nǎ, nyǐ mu o-jwo ng mě.
Nyǐ mu o-fwôo ng atông ké banshwam ejí.
2Nyǐ mu o-fwôo ng atông o-jwo mě
nang nkéré orá nké n/kó ǎ.
3Bukyû bu/mû bu/wâng mě kángkáng,
ne bafip ḿbé dyikun ba/mû baa/fárâng mě.
Bushî ne ofong ekédê byi/mû bii/sú mě ké dyityém.
4Me n-kó kâng Óburúkpâbí n/fu,
Óburúkpâbí nyii mě,
n/tîm ǒ arông.
5Óburúkpâbí o-chi i kanong,
ne mu o-ri ng banet bafip.
Osówo mú eten byiko byi-kpú u ǎ ne banet.
6Óburúkpâbí mu o-ku ng banet ḿbé ba*fí ne onet-ochwâp*.
Nyǐ o/nyii mě ké nkéré me m/mû ké busông.
7Dyityém ejí, kyú chee,
ké nǎ, Óburúkpâbí mu kanong ne me.
8Óburúkpâbí o/nyii mě ké bukyû.
Nyǐ o/chi batíí ba-mîng mě ebyí,
ne o*da/bángê ba-kpógê mě*.
9Ké bubwô ámbu, me mu n-cen n ne Óburúkpâbí
ké oshê mú banet bakpó.
10Me n/tî dyityém ejí ńdyí n/fé,
nang ké nkéré n/raa n/fu,
baa/shiryi mě debédebé,
11nang ké nkéré me m/mû n-shî ng ne n-raa n/fu,
onet o*fí mú badatî dyityém ne nyǐ*.
12Ebóng ńkyí me ndaman eyárê Óburúkpâbí
ké kángkáng kanong emen ne me.
13Me n/chi m-bâ ne eyáré nyí bato n-kye Óburúkpâbí,
n-kó ǎ asǎma ké onyii mú nyǐ o/nyii mě.
14Me n/chi n-kye ǎ ńkyí me n/ryí ocím
ké ncibi mú kángkáng banet emen.
15Kyi-bán n Óburúkpâbí kanong kanong
ké nkéré onet emen obónge oo/kpú.
16Óburúkpâbí, me n-chi i ḿgbán eyên.
Me mu n-chi i ńkyí wo a/sét wǎ eringe nyí boné ejí o/chi.
Wo a/nyii mě ké bukyû.
17Me n/chi n-chi kyifen-asǎma ekó n-kye ǒ,
n-kye ǒ to banshwam ejí.
18-19Me n/chi n-kye ǒ ńkyí me n/ryí ocím
ké ncibi mú kángkáng banet eyên,
ne ké kiǐtí-kyise-kyifen eyên echi ké Jerúsélem.
Kye n̂g Óburúkpâbí akpee.
Currently Selected:
Sâm 116: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
