Póróvep 31
31
Bacê ḿbé badasét Otu
1Nyín byiraa ḿbyí boné-Otu Lémwel o/raa ne Otu Lémwel o/fu, 2wo a-chi i wǎn ejí mú dyityém, mú Osówo o/kye mě ké nshwam ejí mú o/faa. Me n-sét ng ǒ ebóng. 3*Dabên akpuga eyên kángkáng ké banyinyi* ne *dabên busa eyên ké karíng erí ne mbé*. Mbé baa/chi batu ba-róng. 4Otu Lémwel, fwôo atông a-jwo. Batu ba*dajwáp bato* ba-kyú nang ne omiríng ké byěm ḿbyí byidabwóm*. 5Mbé ba-ráp ng byije ké nkéré mbé baa/jwáp bato ne ba-né ng byěm ḿbyí byi/já banet ḿbé ba*fí ne chwǒm*. 6Bato ḿbé badabwóm ba/já banet ḿbé ba-kú ba-kpú u ne banet ḿbé mbe ké bafip. 7Mbé ba-jwáp ng ba-ráp kyikpu ebe ne bafip ebe. 8Raa a-kye banet ḿbé baa*man eraa ba-kye byiko ebe*. *Damîng ba-koo banet-kyikpu byěm*. 9Raa ké bubwô ebe, a-két mpan ké bukwóp ḿbú bunong. Bwom ké esim-byěm ḿbyí byi/já banet-kyikpu ne banet ḿbé ba*fí ne chwǒm*.
Onyi mú odaman echi Byěm
10Kyi-sóng ng kanong kanong ne a-ri onyi mú odaman echi byěm. Nyǐ o-nwa ng o-shwôm nang byibwáng-gûl.
11Otyép emen o-fâ dyityém ne nyǐ, ne kyikpu kii*róng otyép emen ne banyá*.
12O-chi i otyép emen kanong. Kyibî oo*chi ǎ tete o-kpú*.
13Nyǐ o-chi i bǎmkpóngé kángkáng nkéré, o-chi i byídí-eríp-etám-ebû ne byídí ḿbyí okpówo.
14Nyǐ mu o-fím m ne byiryíng tíbítíbí o-bâ ne mbyí ké byise wǎ eringe bancen kasî mbe ba-bâ ne mbyí ké bǎnsukyíkang ebe.
15Nyǐ mu o-jwóbê ng pirípirí o-chi byiryíng o-kye kyikû-banet emen, ne mu o-sét ng bǎmgbán emen ḿbé bwǎn-banyinyi ńkyí badachi.
16Nyǐ o-kpúrî ng esí ne o-ré kányí, ne mu o-yip ng akpuga emen nyí o/já o-kpang kyifát.
17Nyǐ mu ne busa ne mu o-fâ busa ké bǎmkpóngé.
18Nyǐ mu o-nyît ng mpún mú mu ké chwǒm nang kyirá ńkyí nyǐ mu o-chi i, ne mu o-chi i bǎmkpóngé tete kyirê kyi-kán.
19Nyǐ mu o-chi i bacat nyǐ oyén o-chi byídí ḿbyí emen.
20Nyǐ mu o-cángê e dyityém ne banet-kyikpu ne banet ḿbé chwǒm kyi*fí kámbé*.
21Nyǐ oo*kédê ofong ké nkéré kyibî-dyibyi* ké nǎ, kyikû-banet emen mbe ne byídí-dyibyi.
22Nyǐ mu o-chi i byídí-karíng, ne mu o-bwá ng byídí ḿbyí byinong byinong ne ḿbyí okpówo.
23Banet ba-nyît ng otyép emen kanong kanong, ne mu ké burwám-biǐtí-banet ḿbé oshê emen.
24Nyǐ mu o-chi i byídí ne emâp o-shee ng bancen busî.
25Nyǐ mu ne busa, ne mbe ba-kyâ ǎ ofê, ne o*fí o-shî ng ńkyí kyi/chi kyi-chi ké nkéré mú mu o-bâ*.
26Nyǐ o-raa ng kyiraa degere ne bubong.
27Nyǐ mu o-chi i chwǒm kángkáng nkéré, ne mu o-ri ng o/fu, kyikû-banet bajá ńkyí mbé mbe ba-ryuu ng.
28Bwǎn emen mbe ba-tông ng kyijé ebe ne nyǐ, ne otyép emen mu o-kpee ng ǎ.
29Otyép emen o/fu, banyinyi chwóó ba-chi i banyi ḿbé banong, nké wo a/nwa a-shwôm kámbé kángkáng.
30Bunong ḿbú onyinyi bu-nîm m onet ne bu-rím m to, nké onyinyi mú mu o-kyâ Óburúkpâbí ofê nké bada ǎ ekpee.
31Kye n̂g ǎ akpee ké kángkáng byěm ḿbyí nyǐ mu o-chi i. Nyǐ o/kwárê mú nang yeě nang yeě oda ǎ ekye ofê.
Currently Selected:
Póróvep 31: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
