Póróvep 15
15
1Ejá degere e-man n dyityém-busa, nké nyí bakân e-buu ng dyityém-busa.
2Banet ḿbé mbe ne bubong ba-chi i byinyídíng byi-kûnwa ké nkéré mbé ba-kú ba-sét ng byiraa, nké enyam-banet e-raa ng byiraa ḿbyí byi*da/byí chwǒm*.
3Óburúkpâbí mu o-ri ng ńkyí nkyi kyi-chi i ké kángkáng byikit. Nyǐ mu o-tún n bě nang byimu byi-chi i kanong nang kyibî.
4Ejá-dyityém ecángê e-kyâ dyikpen, nké nyí dyityém ebên e-ju ng onet.
5Nkyi enyam eróng ńkyí adané ńkyí ńchân o/tángê ǒ. Nkyi chwǒm-bubong â a/jwo dyishí ńdyí o/tángê ǒ.
6Esang nyí banet ḿbé mbe ba-chi i kanong e-waa ng, nké nyí bambên atyém e-tánê e ké nkéré kyibî-nkéré kii/ribi.
7Banet-bubong nké badachi byinyídíng byi-káng, *chí enyam-banet*.
8Óburúkpâbí o-kyú u ké bunyîn-dyityém ké nkéré banet ḿbé mbe ba-chi i kanong ba-kú ba-fâ nshwam, nké byifen ḿbyí bambên atyém mbe ba-chi i ba-kyâ ǎ byi-sa ng ǎ kafâ.
9Édúú nyí banet-byibî e-sa ng Óburúkpâbí kafâ, nké nyí banet ḿbé mbe ba-chi i ńkyí kyi/kwárê e-jê ng ǎ.
10Ba/chi ba-kye ǒ busông kanong kanong â wo a/chi ńkyí kii*nwa*. Wo a/chi a-kpú â wo a*da/bángê ba-tángê ǒ dyishí*.
11Nang oshê-bakúsí oo*man echi Óburúkpâbí eringe nyí oo*nyît ńkyí nkyi kyi-chi i ké mǔ*. Kyi-cen n nǎ kâng ńkyí onet odaman erôo okabe emen eringe nyí nyǐ oo*nyît*.
12Bantông byiko kii*nyîn kámbé* ńkyí banet badatángê kámbé dyishí*. Ne banyá mbé baa*bí banet ḿbé mbe ne bubong bacê*.
13Banet ba-nyet ng éjwô ké nkéré mbe ké bunyîn-dyityém, nké mbé ba-kpút ng kashú ké nkéré mú bafip.
14Banet ḿbé mbe ne bubong ba-ryuu ng byěm ekwâa, nké enyam-banet mbe ba-zût ng ne byěm ebe ḿbyí baa*nyît*.
15Dyikpen ńdyí onet-kyikpu, ányi byiko enyii kángkáng nkéré, nké banet ḿbé mbe ké bunyîn-dyityém dyikpen ebe dyi-kyú u ajî áji.
16Nkyi kanong ńkyí adakyú kyikpu a-kye Óburúkpâbí ofê kyi-shwôm ńkyí adakyú ne akpuga a-já afaníkong.
17Nkyi kanong ńkyí adaryí eshǎan-byiryíng ne banet ḿbé mbe ba-jê ng ǒ kyi-shwôm ńkyí adaryí enyam ké kyikit ńkyí busa-dyityém mbu.
18Kiikuku kyi-cen n ne okân ké dyishí, nké dyityém chee dyi-bâ ne bunyîn-dyityém.
19Â wo amu a-dare ng, a-ri ng busông nang nyá, nké â amu a-sét ng ntûntû, wo aa*ri afaníkong*.
20Wǎn mú mu ne bubong o-chi i bonchí emen o-kyú ké bunyîn-dyityém. Enyam-onet nké odashú boné emen.
21Enyam-banet mbe ké bunyîn-dyityém ne enyam ebe eróng, nké banet ḿbé mbe ne bubong ba-chi i ńkyí nkyi kanong.
22Koo kángkáng bacê ḿbé adaman ekoo ne okabe eyên o/chi o-byí ǒ dyishí. Â bacê ba*fí* wo a/chi a-róng.
23Bunyîn-dyityém mbu kô â a/já ojá mú onong mú o/tyeem ne nkéré ámu.
24Banet ḿbé mbe ne bubong ba-cen n ké bukwóp-dyikpen, *chí ké bukwóp-bukyû*.
25Óburúkpâbí o/chi o-bên byise ḿbyí bantông byiko, nké nyǐ o/chi o-ku byěm ḿbyí banyǐnkú.
26Byibî-okabe byi-sa ng Óburúkpâbí kafâ, nké byiraa ḿbyí bunyîn-dyityém byi-nyîn n ǎ.
27Â wo amu a-kan n eringe nyí adaryí mpún ké bukwóp ḿbú boo*nwa* wo a-fâ kyikû-banet eyên ké afaníkong. *Dakoo ngu* ne wo a/chi a-kpen a-tíbî.
28Banet ḿbé mbe ba-chi i kanong ba-kabe ng ne ba-faa ojá. Byibî-banet baa*kabe ne ba-faa*. Nké ńkyín kyi-cen n ne afaníkong.
29Óburúkpâbí mu o-jwo ng nshwam mú banet ḿbé mbe ba-chi i kanong, nké nyǐ mu o-né ng mú banet-byibî.
30Bashú ḿbé mbe ba-nyet ng éjwô ba-chi i ǒ a-kyú ké bunyîn-dyityém, ne bǎmpém ḿbé banong ba-chi i enyam-byiko eyên e-nyange.
31Wo amu ne bubong â amu a-tî ng atông a-jwo dyishí ńdyí ba/tángê ǒ.
32Â amu a-né ng byěm ekwâa, ányi amu a-chi i byiko eyên. Â amu a-jwo ng dyishí ńdyí ba/tángê ǒ, a-já ng bubong a-shwôm.
33Ofê mú adakye Óburúkpâbí nkyi chwǒm ekwâa kyi-kim ne bubong. A-man a-kyú degere ne a-já ofê.
Currently Selected:
Póróvep 15: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
