Póróvep 11
11
1Kyi-sa ng Óburúkpâbí ne banet ḿbé mbe ba-yip ng byibî-érúmá ba-kan n byěm. Byěm ḿbyí badakan ntûntû nké byida ǎ enyîn.
2Kaa*rí to ne ba-wuri banet ḿbé mbe ba-tông ng byiko éshwân*. Onet mú mu degere mu ne bubong.
3Â wo amu kanong, ányi ntûntû nké mu o-tông ng ǒ bukwóp. Byisédéng ḿbyí bannîm banet nké mbyi byi-cen n kámbé ne bukyû.
4Esang ee*chwáp ǒ ké dyicí-bukyû* nké ntûntû o-nyii ng dyikpen eyên.
5Ntûntû o-chi i onet mú mu o-chi i kanong oo*ri busông ké dyikpen emen* nké mbên dyityém o-róng ng ké dyityém emen ebên nyǐ oyén.
6Kanong echi ka-nyii ng onet mú mu o-sét ng ntûntû. Nké byěm ḿbyí nnîm banet mu o-shwam m byi-cen n ǎ ne bukyû.
7Â mbên dyityém o/kpú, okabe emen o-kpú u ne nyǐ. Dyityém etî ké esang dyi*da/byí chwǒm*.
8Óburúkpâbí mu o-ku ng banet ḿbé mbe ba-chi i kanong, nké afaníkong a-bwa ng a-kâm bambên atyém.
9Byiraa ḿbyí banet ḿbé baa*nyît Osówo* byi-man n ǒ eju, nké bubong ḿbú banet ḿbé mbe ba-chi i kanong bu-man n ǒ enyii.
10Oshê o-kyú u ké bunyîn-dyityém ké nkéré banet ḿbé mbe ba-chi i kanong mbe ba-kyú u kanong, ne banet ba-wonge e ké bunyîn-dyityém ké nkéré mbên dyityém oo/kpú.
11Oshê o-firi ng kiǐtí ké nkéré banet ḿbé mbe ba-chi i kanong mbe ba-kyâ kámú ojware, nké oshê o-bên n ké byiraa-bambên atyém.
12Onet mú mu o-tún n barî-banet fúú o*fí ne bubong* nké onet mú mu ne bubong o-cíbî ng pyêp.
13Onet mú odaram banet baa*sét ǎ byiraa-eju* nké onet mú mu ne dyityém ńdyí dyinong ba-fâ dyityém ne nyǐ.
14Oshê o-róng ng â o*fí ne banet ḿbé badatún kámú*. Â banet-bacê mbe chwóó, ányi kyi/byí, bushî bu*fí*.
15Wo a/chi a-chi ájângmé â a/ryí ocím a/fu, wo a-ré ng dyifwá ńdyí ocinónet. Kyi-kyú u ǒ kanong â a*da/fé abwô ké nkyí*.
16Onyinyi mú o/nwa bunong ba-kyâ ǎ ofê, [nké onyinyi mú oo*nwa dyityém* mu chwǒm-éshwân.
Onet-dyidare oo*já akpuga*] nké onet-bakân o-já ng akpuga.
17Onet mú o/cángê dyityém mu o-chi i kanong o-kye byiko emen, nké mbên dyityém mu o-chi i kyibî o-kye byiko emen.
18Bambên atyém ba*fí ne mpún ké chwǒm nang kyibónge* nké â wo amu a-chi i ńkyí nkyi kanong, wo a/chi a-já eyáré ké ntûntû.
19Nang yeě nké o/tî dyityém ké kanong echi o/chi o-kpen, nké nang yeě nké mu o-fâ busa ké byibî-byěm echi o/chi o-kpú.
20Óburúkpâbí o-sa ng kafâ ne banet ḿbé okabe ebe mu ké byibî echi, nké banet ḿbé mbe ba-chi i ńkyí nkyi kanong ba-jê ng ǎ.
21Ké ntûntû, Óburúkpâbí o/chi o-kye banet ḿbé mbe ba-chi i byibî-byěm busông, nké banet ḿbé mbe ba-chi i kanong ba/chi ba-fem.
22Bunong ḿbú onyinyi mú o*fí o-nyît ng ńkyí odachi* mbu wǎ ókpâl-gûl mú mu ké ozóng-ekorók.
23Okabe mú banet ḿbé mbe ba-chi i kanong kángkáng nkéré o-byí i chwǒm ńkyí kyinong. [Nang yeě o-sa ng dyityém] ké nkéré bambên atyém baa/já ńkyí mbe ba-ryuu ng.
24Banet bakíri ḿbé mbe ba-yárê ng akpuga ebe chwóó mbe ba-chî ng ejá ojáng akpuga. Bakíri ba-lák ng akpuga ebe ba-bwa ba-róng oróng kyikpu.
25Yárê byěm chwóó ne kanong ka/chi ka-bâ ka-kâm ǒ. Chwáp barî-banet ne Óburúkpâbí o/chi o-chwáp ǒ.
26Banet ba-shú u onet mú mu o-rôo ng byiryíng, o-bám m ké nkéré kasî kaa/yú, nké ba-kpee ng onet mú mu o-shee ng ḿbyí emen.
27Ba-kyâ ǒ ofê â okabe eyên mu kanong, nké â amu a-kyé ng afaníkong nyǐ nké a/chi a-ri.
28Banet ḿbé ba/jêem esim ké esang ebe ba/chi ba-róng wǎ eshǎan-burwom, nké banet ḿbé mbe ba-chi i kanong ba/chi ba-kyú kanong wǎ eshǎan-kyifang.
29Onet mú mu o-kyâ kyikû-banet emen afaníkong oo*já chwǒm ké nkuli kyikû*. Enyam-banet kángkáng nkéré e-kyú u bǎmgbán ḿbé banet ḿbé mbe ne bubong.
[ 30Kanong echi] ka-kyâ dyikpen, nké [anwa] a-tánê e kándyí.
31Banet ḿbé mbe ba-chi i kanong ba-koo ng eyáré ké ejíí ńnyín. Ké bubwô ámbu, nyît a/fu, Óburúkpâbí o/chi o-kye bambên atyém ne banchi byibî busông.
Currently Selected:
Póróvep 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
