Jeryimáya 9
9
1Kyi/mû kyi/chi kyi-nyîn mě,
â dyishí ejí dyi/mû wǎ dyijwáng,
achi ejí a-kyú wǎ katí-batíí,
eringe nyí ndaman etii buchú ne esû
ké dyishí-banet ejí ḿbé baa/ju.
2Kyi/mû kyi/chi kyi-nyîn mě,
â m/mû ne kyikit ké kyikim-dyikán
ńkyí ndaman edim n-jâ ké nkyí,
m-mîng banet ejí.
Ké nǎ, mbé kángkáng ba-chi i banchi byinam,
ne banet ḿbé badanam barî-banet dyiju.
3Mbé ba-fút ng bubyíbabang ebe wǎ báre.
Byisédéng esét bii/koo esí ńnyín,
ntûntû o*fí to*.
Ké nǎ, mbé mbe ba-fím m ké kyibî kyibónge ba-nung ké kyikíri,
ne ba*fí ba-nyît ng mě wǎ Osówo ebe*.
Óburúkpâbí nké o/raa.
4Nang yeě obám byiko emen kyi-kim ne orî-onet emen.
Onet o*dachi o-fé dyityém ne wǎn-boné emen*.
Ké nǎ, wǎn-boné nang orá o/firi nnîm banet wǎ Jekôp,
ne orî-onet nang orá o/firi nram banet.
5Nang yeě o-kú o-nîm m orî-onet emen,
onet nang obónge o*fí to o-sét ng ntûntû*.
Baa/tángê bubyíbabang ebe eringe nyí budakûsét kyisédéng.
Mbé mbe ba-chi i byibî,
ne ba*fí ba-man n esaa byiko ba-mîng kámbyí*.
6Mbé mbe ba-cít ng banet ba-nye ng ba-fâ,
ba-nîm m banet to ba-nye ng ba-fâ.
Óburúkpâbí o/raa o/fu, banet emen baa/né ǎ.
7Ké bubwô ḿbún, Óburúkpâbí mú o/rêe o-shwôm o/raa o/fu,
n/chi m-bwât banet ejí n-chi
wǎ eringe nyí nree bure odabwât kiǐré,
n-kan kámbé n-ri.
Banet ejí baa/chi kyibî.
Me n-chî ng echi ebóng ne mbé.
8Bubyíbabang ebe mbu wǎ byibî-abán.
Mbé ba-sét ng byisédéng kángkáng nkéré.
Nang yeě mu o-raa ng kanong ké ejá ne orî-onet emen,
nké ké ntûntû, mu o-kuu ng kaǎtám o-tî ǎ.
9Me mm*ba/chi n-kye kámbé busông ké byěm ḿbyín*?
Me mm*ba/chi n-só dyizong-oshê ńdyín ewa*?
Me Óburúkpâbí nké n/raa.
Bafip ḿbé ba/chi Jeryimáya ké Dyishí-Banet Emen
10Me Jeryimáya n/raa n/fu,
n/chi n-ta dyikán ké dyishí-eku,
n-tii bukyû ké dyishí-byifát,
ké nǎ, bii/jwóm, ne onet o*fí to o-cen n ké mbyí*.
Kyicoge ńkyí bampong kyi*fí to*.
Bunurung ne enyam kángkáng bii/chêe.
11Óburúkpâbí o-raa o/fu,
n/chi n-chi Jerúsélem o-firi wǎ dyizu-biǐbyém ńdyí enyam edakyú.
Eshê nyí Júda e/chi e-bírî kyikim-dyikán ńdyí onet nang obónge oo*kyú to ké ndyí*.
12Me m/bí Óburúkpâbí n/fu, ebóng esí ee/waa éné dyikáá e-jwóm wǎ kyikim-dyikán ńkyí onet o*fí to o-man n ecen ké nkyí*. Yeě mu ne bubong ḿbú odanyît eringe nyí ńkyín kyi/byí. Yeě wo a/sét ǎ eringe nyí kyi/byí eringe nyí odasét banet bakíri.
13Óburúkpâbí o-faa o/fu, ńkyín kii/chi, ké nǎ, banet ejí baa/mîng echi ńkyí me n/tángê kámbé. Ba*da/chi ńkyí me n/sét kámbé*. 14Nké ba/bwa ba-firi banshwane ashí, ne baa/kye erím-bakye nyí Bâl ofê wǎ eringe nyí banchí ebe ba/tángê kámbé ba/fu, bachi. 15Kántîk kâng, fwôo atông a-jwo ńkyí me Osówo Óburúkpâbí mú Ézerel mú o/rêe o-shwôm n/chi n-chi. N/chi n-kye banet ejí byichí ḿbyí byidaruu ba-ryí, n-kye kámbé bukye ḿbú badakpú ba-jwáp. 16N/chi n-chi kámbé ba-pwôo byiryibyiryi ké eshê nyí nang mbé nang banchí ebe ḿbé kpákpá ba*da/jwo ne kyi-kim ne nyǐ* ne n/chi n-twóm basúja ba-nwa byití ne mbé tete n-ju kámbé kángkáng.
Banet ḿbé Jerúsélem ba/tii ba-kó Osówo ba/fu, ochwáp Kámbé
17Óburúkpâbí mú o/rêe o-shwôm o/raa o/fu,
kabe kyi-kim ne ńkyí nkyi kyi-chi i.
Kó bamman eta dyikán ba-bâ,
a-kó banyinyi ḿbé badanyîn ejá-bukyû ba-bâ.
18Banet ḿbé Jerúsélem ba-raa ba/fu,
kó kámbé ba-bâ babap ba-ba-fé okwan-bukyû ba-fé bě
tete batíí ba-sú bě ké achi,
bushú bu-cok ké bukyû etii.
19Fwôo atông a-jwo ejá-bukyû nyí nyi ké Záyon.
Be bii/kpú.
Be byi/firi ne kiǐtí-éshwân.
Byi-man byi-dim byi-mîng esí eten.
Baa/bú bě byise.
20Me Jeryimáya n-raa ne mbé n/fu,
fwôo n̂g atông, ǎ banyinyi, ba-jwo Óburúkpâbí,
ba-jwo byiraa ḿbyí mu o-sét ng běn.
Tángê ê bwǎn-banyinyi enen eringe nyí badata dyikán,
ba-tángê bacín enen eringe nyí badafé ochwan-bukyû.
21Bukyû boo/cen ké bawíndu eten bu-nung ké byibám-butu eten.
Boo/ju boǒbwásíng ké étíbingé,
bu-ju byisat ké bǎntím-busî.
22Byikwóm-banet byi/firi byiryibyiryi
wǎ byíkwôn ḿbyí badapwó ké byifát,
wǎ nkurung mú bambûn nkurung badabún ba-pwó kyísí,
mú onet o*fí mú odabwóp*.
Ńkyín nké Óburúkpâbí o/sét mě o/fu, me nsét.
23Óburúkpâbí o/raa o/fu,
banet-bubong ba*dachi ba-kûtông byiko kyi-kim ne bubong ebe*
nang banet-busa kyi-kim ne busa ebe*
nang banet-esang kyi-kim ne efang ebe*.
24Nang yeě nké o/fu, nyǐ o-tông ng byiko,
onet ámu otông byiko o/fu, nyǐ o-nyît ng mě kanong kanong,
ké nǎ, kyijé ejí kyi-waa ng eringe ebónge
ne n-chi i ńkyí nkyi ntûntû ne ké bukwóp.
Byěm ḿbyín nké byida mě enyîn.
Me Óburúkpâbí nké n/raa.
25-26Óburúkpâbí o/raa o/fu, nkéré mu o-bâ mú n/chi n-kye banet ḿbé Éjip ne ḿbé Júda ne ḿbé Édom ne ḿbé Ámon ne ḿbé Mówep ne ḿbé ké kyikim-dyikán ḿbé mbe ba-két ng eji ebe busông. Kángkáng banet ḿbén ba/cên, nké ba*da/tî ocím mú ba/ryí ba-sem dyizîn ejí* kyi-kim ne dyicên ándyi*. Nang onet o*fí ké burwám-banet ḿbén* nang onet to o*fí ké burwám-banet ḿbé Ézerel* mú oo/tî ocím mú n/ryí ne mbé ne n-sem byiko ejí*.
Currently Selected:
Jeryimáya 9: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
