Jeryimáya 10
10
Bakye esháng ne Ofê mú Ntûntû
1Banet ḿbé Ézerel, jwo n̂g kyiraa ńkyí Óburúkpâbí mu o-sét ng běn,
2o/fu, *da n̂g echi ba-kúng kyiká-bucen ńkyí eshê ekíri*.
Nang atyém a*dachi a-náng běn*
â ba/ri ekap kyíbóng nyí ba/mû ba*da/ri ne*
ké nǎ, eshê ányi nyi e-két ng ofong, â e/ri kányí.
3Ké nǎ, osówo mú banet ḿbén mbe ba-fâ o*da/byí chwǒm*.
Mbé ba-két ng kyichí ké kyizinge,
ba-yip boǒshwám ḿbú bansîm erím-bakye, ba-sím kánkyí,
4ba-yip syílyíba ne gûl ba-mwane ké nkyí.
Ba-yip émúrúsún ba-mán ké nkyí eringe nyí kii*myii*.
5Erím-bakye ebe ányi nyi wǎ byěm ḿbyí badachi ba-tî ké kyifát,
byi-kûfé enyam bushî.
Ee*man eraa*.
Ba-yip ng kányí oyibíng,
ké nǎ, ee*man ecen*.
*Da n̂g echi ba-shî kányí*.
Ee*man běn echi kyibî ké byiko*
nang kanong to ee*man echi e-kye běn*.
6Óburúkpâbí, onet o*fí wǎ wo*.
Wo a/rêe, ne dyizîn eyên ndyi kiǐtí
ne ndyi ne busa.
7Yeě oo*fé ǒ wo mú amu Otu mú eshê kángkáng*.
Wo a/kwárê mú bada ǒ ekye ofê.
Onet o*fí wǎ wo*
ké burwám ḿbú kángkáng banet-bubong ḿbé ké ejíí*
nang ké burwám-batu ebe*.
8Mbé kángkáng mbe enyam,
ba*fí ne bubong*.
[Ba-kwâa ng ebóng ne erím-bakye nyí ba/sím ké byichí.]
9Mbe ba-yip ng syílyíba mú o/fím Syipîn ba-mwane ké erím-bakye ebe.
Ba-mwane e to kányí gûl mú o/fím Ófaz.
Bǎmkpóngé ámbe kángkáng ḿbé banchi mpwô.
Mbe ba-yip ng byídí ḿbyí byinong byinong
ḿbyí bamman echi byídí ba-bwá ng kányí.
10Nké wo, ǎ Óburúkpâbí,
nké amu Osówo mú ntûntû.
Wo amu Osówo mú okpó ne Otu mú ne banyá.
 a-kú a-sa ng kafâ,
ejíí emúmú e-kûnáng.
Eshê ee*man ebwom kafâ esa eyên*.
[ 11Ben ba-man ba-sét kámbé ba/fu, esówo nyí e*da/chi bubóng ne esí* ee*ba/chi e-chîkyú ké kyikit-ejíí nang kyibónge*.]
Okwan mú badakye Osówo Akpee
12Óburúkpâbí nké o/chi ejíí ké busa emen,
o-chi ejíí ké bubong emen,
o-chi bubóng ké byinyídíng emen, o-paam kámbú.
13Â o/kye busa,
omu mú mu kyíbóng o-rim,
bubóng bumúmú bu-jîi,
kasabang ka-kédê ké nkéré mú omu odana.
O-twóm m to afú ké kyise emen ńkyí o/rôo kányí a-bâ.
14Â banet ba/ri ńkyín,
ba-firi enyam, baa*nyît to chwǒm*.
Nsîm erím-bakye nang orá o-firi ng ne éshwân
nyí erím-bakye emen ee/fé ǎ,
ké nǎ, erím-bakye emen nyí mu o-chi i e*fí ké kafâ*
ne e*fí ne dyikpen*.
15Erím-bakye ányi e*da/byí chwǒm*
ne e/kwárê nyí badatwóp kányí.
Óburúkpâbí o/chi o-bên kányí
ké nkéré mú oo/bê kámbé busông ekye.
16Osówo mú Jekôp o*fí wǎ erím-bakye ányi*.
Nyǐ nké o/chi kángkáng byěm,
ne oo/cá Ézerel o/fu,
bakyú banet emen.
Dyizîn emen dyi-bángê e Óburúkpâbí mú o/rêe o-shwôm.
Ba/chi ba-kám Banet-Jerúsélem ba-dim ne Mbé
17Banet ḿbé Jerúsélem, baa/wâng běn. Wuri n̂g byěm enen. 18Óburúkpâbí o/raa o/fu, me mu m-bâ m-ba-fîm běn ba-byí ké esí ńnyín. N/chi n-kye běn busông, nang onet oo*waa*.
19Banet ḿbé Jerúsélem ba/raa ba/fu,
baa/némê bě kanong kanong.
Byinêm eten bii*kpú*.
Be byi/mû byi/kabe byi/fu,
nkyi chwǒm ńkyí byidaman ecíp dyityém.
20Baa/bên bampyep eten ḿbé byi/bi ké byídí.
Baa/két erí nyí e/níbî kámbé.
Baa/dim ne bwǎn eten kpók,
ne nang onet obónge o*fí to mú odabwât bampyep eten o-bi*.
Onet o*fí mú odayip byídí ebe o-táng*.
21Me n/faa n/fu, banet-ashí eten mbe enyam.
Ba*fí ba-bí ng Óburúkpâbí ba/fu, ochwáp kámbé*.
Nkyí nké baa/róng,
ne baa/pwó banet eten byiryibyiryi.
22Fwôo n̂g atông ba-jwo.
Kyitwóm kii/bê.
Byikit mbyi byi-náng ng ké oshê mú kyicê ńkyí bushûyû.
Basúja-oshê ámu ba/chi ba-chi Júda o-bírî kyikim-dyikán,
o-bírî kyikit ńkyí enyam edakyú.
23Óburúkpâbí, onet o*fí mú odanyît dyikpen ńdyí nyǐ o/chi o-kyú*.
Onet o*fí mú mu o-níbî ng dyikpen emen*.
24Óburúkpâbí, tángê banet eyên dyishí.
Nké *da bě ekye busông chwóó*.
*Da bě ekye busông ké nkéré a-kú a-sa ng kafâ*.
 a/chi éné, be byi-kpú u.
25Bírî busa-dyityém eyên bu-kâm eshê nyí e*fí e-fâ ǒ*
ne banet to ḿbé baa/né ǒ.
Mbé baa/ju banet eyên.
Baa/ju bě kángkáng,
ba-bên oshê eten.
Currently Selected:
Jeryimáya 10: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
