Jeryimáya 5
5
Kyibî ńkyí Jerúsélem o/chi
1Banet ḿbé Jerúsélem, zóngê ê ba-bâ kashú,
ba-bwa ng esim ké byiká-oshê enen.
Tún n̂ achi ba-ri ben bayén.
Tún n̂ ké bǎntím-busî ba-ri
â ba/chi ba-ri onet nang obónge mú mu o-sét ng ntûntû oo*ryí acît*.
 ba/ri dyizong-onet ándyi,
Óburúkpâbí o/chi o-pwoo Jerúsélem.
2Nang ké bamu ba-sét ng ba/fu,
ben bamu ba-fâ Óburúkpâbí,
atyém enen a*fí a-chi i ńkyí bamu ba-sét ng*.
3Ké ntûntû, Óburúkpâbí mu o-kyé ng banet
ḿbé ba/fé dyityém ne nyǐ.
Nyǐ o/díp běn, nang ojá ba*da/faa*.
Nyǐ o/shiryi běn, nké ben ba*da/já dyishí*.
Ben ba/mû ba-shwane e ashí,
ba*da/mîng byibî enen*.
4Ne n-raa kâng n/fu,
ḿbén banet-byikpu mbé mbe,
ashí a*fí kámbé*
ké nǎ, mbé ba*fí ba-nyît ng kiǐfáng ńkyí Óburúkpâbí*.
Ba*fí ba-nyît ng byije ḿbyí Osówo ebe*.
5N/chi n-ca n-kâm biǐtí-banet, m-pem ne mbé,
ké nǎ, mbé mbe ba-nyît ng kiǐfáng ńkyí Óburúkpâbí.
Mbe ba-nyît ng byije ḿbyí Osówo ebe.
Nké mbé ashí kángkáng baa/né busa
ḿbú Óburúkpâbí mu ne mbú,
ba-né echi ńkyí o/sét kámbé.
6Nkyí nké ekpang nyí nyi e-fím m ké kyizinge e/chi e-ju kámbé.
Nyí nyi e-fím m ké kyikim-dyikán e/chi e-ját kámbé boǒcê boǒcê,
e-kûcen e-wáp ng ké eshê ebe.
 banet ámbe ba/byí kyíjí,
e/chi e-ját kámbé boǒcê boǒcê,
ké nǎ, byibî ebe byi/jê,
ne kángkáng nkéré mbe ba-bírî ng Osówo esim.
7Óburúkpâbí o/bí o/fu,
ebóng ńkyí ndapwoo byibî ḿbyí banet ejí.
Mbé baa/mîng mě,
ne baa/fé esówo nyí e*fí ké kafâ*.
Me n/kye banet ejí byiryíng tete ba-zût,
nké mbé ba/chi byinam,
ba-bên bankéré ebe ne banet-akpara.
8Mbé ba/mû wǎ batyép-bubyî-orá
ḿbú mbe ba-nen n kámbú kanong kanong,
ḿbú kyijé kii*kwárê kámbú*.
Onet nang orá o-kyé ng o/fu,
nyǐ o-rí i ne onyi mú orî-onet emen.
9Me nn*kye kámbé busông ké byěm ḿbyí mbe ba-chi i něen*?
Me mm*ba/chi n-só dyizong-oshê mún ewa*?
Me Óburúkpâbí nké n/raa.
10N/chi n-twóm banet-bushwôn
ba-ba-két asín-byirim-byichí nyí banet ejí,
nké baa*bên kányí kángkáng*.
N/chi n-sét kámbé n/fu,
bakét byire ebe ba-twóp,
ké nǎ, byire ámbyi byi*da mě ejá*.
11Banet ḿbé Ézerel ne ḿbé Júda baa/nîm mě kanong kanong.
Me Óburúkpâbí nké n/raa.
Óburúkpâbí o/né Ézerel
12Banet ḿbé Óburúkpâbí baa/né ǎ ba-raa ba/fu, [nyǐ oo*chi nang chwǒm*.] Kyibî-chwǒm kii*chi bě*. Byití bii*byí bě* nang esong ee*nwa bě*. 13-14Mbé baa/raa ba/fu, bamkpábé ḿbé badasét byiraa-Osówo mbe dyikáá. Ba*fí ne kyitwóm ńkyí Óburúkpâbí o/sét kámbé*. Osówo Óburúkpâbí mú o/rêe o-shwôm o/raa ne me o/fu, ké nǎ, banet ḿbén baa/raa byiraa ḿbyín, n/chi n-chi byiraa ejí ḿbyí mbyi ké ocím eyên byi-firi wǎ okwâ. Mbé ba/chi ba-firi wǎ ekwón, ne okwâ o/chi o-shí kámbé kángkáng.
15Banet ḿbé Ézerel, Óburúkpâbí mu o-bâ ne oshê mú mu tíbítíbí o-ba-kye běn bunwa. Oshê ámu oo/rí, ne mu ne busa. Oshê mú ben baa*jwo eringe nyí mbe ba-raa ng*. 16Banet ebe ḿbé mbe ba-châ abán mbe biǐtí-basúja ḿbé badaju banet bafip baa*chi kámbé*. 17Mbé ba/chi ba-ryí byíkwôn enen ne byiryíng enen. Ba/chi ba-ju bwǎn enen ne byitú enen, ba-bên byichí enen ḿbyí byidazím byirim. Basúja ebe ba/chi ba-bên eshê nyí ben badabwom ne ba-nwa byití, nyí ben ba/fé dyityém ké nyǐ.
18Óburúkpâbí o/raa o/fu, nang ké ací ányi, mm*ba/chi n-ju banet ejí kángkáng*. 19Â mbé ba/bí ba/fu, ebóng ńkyí me n/chi kángkáng byěm ḿbyín, sét kámbé, ǎ Jeryimáya a/fu, eringe nyí mbé ba/mîng mě, ba-fé esówo nyí eshê ekíri ké esí nyí ebe, éné to nké ba/chi ba-fé bacinbánet ké esí nyí e*fí nyí ebe*.
Osówo o/kuri Banet Emen Ekó
20Óburúkpâbí o/raa o/fu, sét kyikû-banet ńkyí Jekôp, sét banet ḿbé Júda a/fu, 21fwôo n̂g atông ba-jwo, ben enyam-banet nyí e*fí ne dyishí* nyí nyi ne achi, nké baa*rángê* nyi ne atông, nké baa*jwo*. 22Me n-chi i Óburúkpâbí, ebóng ba*fí ba-shî ng mě*. Ebóng ben ba*fí ba-tím m banê ké bushú ejí*. Me n/yip éshíshě n-ku baya ḿbé baryên, n-fé oro mú odawaa ne banyá, mú baa*man eshwôm*. Baya ba-man n esú, nké baa*man enyáng kámú* ba-man n enáng kámú, nké baa*man ebú kámú ba-shwôm*. 23Nké ben banet ḿbén, ben ba-shwane e ashí, ba-bwom m bunwa. Ben baa/bírî esim ba-mîng mě. 24Ben ba*da/kabe ba/fu, ba-kyâ mě ofê* nang ké mu n-twóm m bǎmú kángkáng dyije ba-chi byíkwôn enen byi-nwa*. 25Nké byibî enen bii/chi běn baa*ri to byěm ḿbyín ḿbyí byinong*.
26Byibî-banet mbyi byi-kyú u ké burwám-banet ejí. [Mbé ba/kyú mbe ba-bám m wǎ banet ḿbé ba/bi ndam ba/fu, mbé ba-kám m bunurung,] nké mbé baa/kuu boǒtám ebe ba/fu, mbé ba-kám m banet. 27Wǎ eringe nyí bunurung budasú ké kiimbam ńkyí nryuu dyikán, éné to nké byise ebe bii/sú ne byěm ḿbyí ba/wuri ké kajii. Nkyí nké kyi/chi ne mbe ne busa ne esang. 28Nkyí nké mbe ba-nen n kámbé kanong ne baa/sú baryên. Ba*fí ne nkéré mú ba/chi ba-mîng byibî-byěm echi*. Ba*fí ba-kyâ bwǎn-byibén ńkyí kyi/já kámbé* ba-két nang mpan mú baa*ryí acît* ba-kye banet ḿbé mbe ba-cít ng kámbé*.
29Nké me Óburúkpâbí n/chi n-kye kámbé busông ké bubwô-byěm ḿbyín. N/chi n-só oshê mún ewa. 30Kiǐtí-kyibî-chwǒm ńkyí kyidakaa byiko kii/chi ké esí ńnyín. 31Bamkpábé ḿbé badasét byiraa ejí ba*fí ba-sét ng chwǒm* kyi-cibi ne kyisédéng*. Banchi kyifen ejí mbe ba-tún n oshê wǎ eringe nyí bamkpábé ámbe mbe ba-kyâ kámbé busa, ne banet ejí ba*fí ba-né ng*. Nké ben ba-chi i nǎ, â nkuli kyikû o/fyi.
Currently Selected:
Jeryimáya 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
