Jeryimáya 31
31
Banet-Ézerel ba/chi ba-fyi Dyijê
1Óburúkpâbí o/raa o/fu, nkéré mu o-bâ mú n/chi n-kyú Osówo mú kángkáng byikû-banet ḿbyí Ézerel, ne mbé ba/chi ba-kyú banet ejí. 2Ké kyikim-dyikán, n/ri banet ḿbé ba/fem bukyû bafip. Ké nkéré banet-Ézerel ba/mû ba-kyé ng dyijâng, 3me n/fím tíbítíbí, m-byí n-kâm [kámbé.] Banet-Ézerel, ben kángkáng nkéré bamu ba-jê ng mě, ne ké bubwô ḿbún, me mu n-tông ng běn kyijé ejí n-câ kashú. 4Me n/chi n-chî běn ebwât m-bi. Ben ba/chi ba-chîyip ekam enen ba-ne ane ké bunyîn-dyityém. 5Ben ba/chi ba-chîkwón byichí ké eku nyí Samérya, ne banet ḿbé ba/chi ba-kwón kámbyí ba/chi ba-ryí byirim emen. 6Ké ntûntû, nkéré mu o-bâ mú bambâm byikit ba/chi ba-bwom ké eku nyí Éferem ba-kó ba/fu, bâ n̂g byi-dim Záyon byi-kâm Osówo Óburúkpâbí eten.
7Óburúkpâbí o/raa o/fu,
kwán n̂ ekwan ne bunyîn-dyityém ba-kye Ézerel,
oshê mú o/rêe o-shwôm eshê kángkáng.
Kwán n̂ ekwan enen nyí akpee,
ké nǎ, [Óburúkpâbí oo/nyii banet emen.]
Nyǐ oo/nyii kángkáng banet ḿbé ba/mû ba/waa.
8N/chi n-fím ne mbé ké kyicê ńkyí bushûyû
ne n/chi n-fím ne mbé ké byicê-ejíí byimúmú
m-kpaa kámbé n-tî kyikit kyibónge.
Bansêe achi ne bankwa ba/chi ba-bâ ne mbé ké kyikû,
cibicibi ne banet-afít ne banet ḿbé ba-kú ba-bâ efwon.
Mbé ba/chi ba-bwa esim ba-firi kiǐtí-oshê.
9Banet ejí ba/chi ba-fyi, ba-tii ng ba-bâ,
ba-fâ nshwam ké nkéré n-kú n-sí ng kámbé
ba-bwa ng esim ba-bâ.
N/chi n-tông kámbé kiǐfáng ba-ribi ké buce,
ké bukwóp ḿbú mbu gogégogé,
ḿbú baa*kpán dyícíring*.
Me mu wǎ bonchí mú Ézerel,
ne Éferem o-chi i ókpá-wǎn ejí mú onyinchéng.
10Óburúkpâbí o/raa o/fu,
ejíí, fwôo n̂g atông ba-jwo mě,
ba-bwom ké eshê nyí tíbítíbí ba-sét byiraa ejí.
Me m/pwó banet ejí byiryibyiryi,
nké n/chi m-kpaa kámbé,
m-bám kámbé wǎ eringe nyí mbâm ebû odabám ebû emen.
11Me nn/chi banet-Ézerel ba-firi ké byiko ebe,
ne nn/nyii kámbé ké abwô nyí kiǐtí-oshê.
12Mbé ba/chi ba-bâ ba-ba-kwán ekwan-bunyîn-dyityém
ké kaku ńké Záyon,
ne eyáré ejí e/chi e-nyîn kámbé.
Eyáré nyí byiryíng ne bato ne bakút,
eyáré nyí ebû ne bampong.
Mbé ba/chi ba-kyú wǎ kyifát-byíkwôn
ńkyí nkyi kyi-já ng omu kángkáng nkéré.
Mbé ba/chi ba-já kángkáng byěm ḿbyí mbe ba-ryuu ng.
13Ne ḿbé bwǎsíng-banyinyi kâng ba/chi ba-ne ane,
ba-kyú ké bunyîn-dyityém,
ne ḿbé banyinchéng, bakâa ne byisat ba/chi ba-jêe.
Me n/chi n-fé kámbé dyityém,
m-bírî bukyû ebe bu-firi bunyîn-dyityém,
m-bírî bafip ebe ba-firi ojêe.
14N/chi n-kye banchi kyifen ejí byiryíng ḿbyí byi/nwa byi-shwôm
ne n-kye banet ejí ńkyí mbe ba-ryuu ng.
Me Óburúkpâbí nké n/raa.
15Óburúkpâbí o/raa o/fu,
banet ba/jwo ejá ké oshê mú badakó Ríma,
ejá nyí bukyû etii ḿbú boo*nwa eri*.
Ríchel mu o-tii ng bwǎn emen ḿbé baa/kpû,
ne o*fí o-nwa ng dyityém efé*.
16Mîng bukyû eyên etii, a-shî batíí.
Kángkáng byěm ḿbyí aa/chi bwǎn eyên bii*ba/chi byi-waa kyísí dyikáá*.
Mbé ba/chi ba-fím ké esí nyí banet-bushwôn ba-fyi.
17Kyi/chi kyi-kyú kanong ne wo
ké nkéré mú mu o-bâ ké kashú.
Bwǎn eyên ba/chi ba-bwa esim dyijê.
Me Óburúkpâbí nké n/raa.
18Me n/jwo banet ḿbé Ézerel ké mbe ba-raa ng ké bafip ba/fu,
Óburúkpâbí, be byi/mû wǎ enyam-dyikán,
nké wo a/tángê bě eringe byidachi ńkyí wo ada bě esét.
Bwa ne be esim.
Be bii/kpá byiko ḿbyí byidabwa esim byi-kâm ǒ wo
mú amu Osówo Óburúkpâbí eten.
19Be byi/bírî ǒ esim,
nké ka*da/rí* byi-kpet eryuu byi/fu, byi-bwa ng esim.
Ké nkéré mú wo a/kye bě busông,
be byi/tíngê ashí eten kyísí ké bafip.
Byi-firi bashú kyísí ne éshwân,
ké nǎ, be byi/chi kyibî ké nkéré byi/tôong bwǎsíng.
20Ézerel, wo a-chi i wǎn ejí mú dyityém,
wǎn mú oda mě ejang ejê.
Nang nkéré orá nké [n/zîim dyizîn eyên,
n-kabe ng] kyi-kim ne wo ne kyijé.
Dyityém ejí dii/jé dyi-kâm ǒ.
N/chi n-ri ǒ bafip.
21Tî n̂g ekap, ba-kan bukwóp.
Chi n̂g ekyé bukwóp ḿbú ben ba/cen ne ba-dim.
Bwa n̂g esim, ǎ banet-Ézerel.
Bwa n̂g esim ké eshê nyí ba/dim ba-mîng.
22Ben banet ḿbé ba*da/fé dyityém ne me*
ka-rí i nǎ ne ba-mîng ekyú ne atyém afee.
Me nn/chi chwǒm ńkyí kyifyîfî ńkyí kyi/yángê,
ńkyí kyi/yángê [wǎ onyinyi mú mu o-ku ng onyinchéng o/fu, chwǒm kyi*da ǎ eta*.]
Kanong ńké Banet-Osówo, ńké nke ka-bâ ké Nkéré mú ké Kashú
23Osówo Óburúkpâbí mú Ézerel mú o/rêe o-shwôm, o/raa o/fu, ké nkéré mm/bwa ne banet ejí esim ké esí ebe, mbé ba/chi ba-chîraa ké esí nyí Júda ne ké eshê emen ba/fu, kyi/bát Óburúkpâbí ojware kaku-ociring ké Jerúsélem, kyikit-ociring ńkyí nyǐ mu o-kyú u. 24Banet ba/chi ba-kyú ké Júda ne ké kángkáng eshê emen, ne bamkpang kyifát ba/chi ba-firi, ne bambâm ebû to ne ebû ba/chi ba-firi. 25Me n/chi n-chi banet ḿbé baa/kyee ba-firi shwaneshwane, ne n/chi n-kye nang yeě mú oo/jwâa esong byiryíng. [ 26Ké bubwô ámbu kâng, banet ba/chi ba-kûraa ba/fu, me n-dim m n-da-rí sáre, n-jwóbê shwaneshwane.]
27Me Óburúkpâbí mu n-raa ng n/fu, nkéré mu o-bâ mú n/chi n-chi esí nyí Ézerel ne Júda e-sú banet ne enyam. 28Ne wǎ eringe nyí me n/kúng nkéré mú n/tut kámbé n-zú n-twóp kyísí, m-kpógê kámbé, m-bên kámbé, eringe ányi to ebónge nké n/chi n-kúng nkéré m-bwât n-kwón kámbé, m-bi kámbé ba-bwom cip. 29Ké nkéré mú nkéré ámu oo/fyi, banet baa*raa to ba/fu, banchí ebe ba/ryí byirim-byichí ḿbyí bii/fwoo* nké bwǎn ebe ba/jwo buruu*. 30Nké nang yeě nké o/ryí byirim-byichí ḿbyí bii/fwoo, asháng a/chi a-kpú ǎ ryigiryigi, ne nang yeě o/chi o-kpú ké bubwô ḿbú kyibî ńkyí emen nyǐ oyén.
31Óburúkpâbí o/raa o/fu, nkéré mu o-bâ mú n/chi n-ryí ocím mú ofyîfî ne banet ḿbé Ézerel ne Júda n-sem byiko ejí. 32Oo*ba/chi o-chi wǎ mú kpákpá mú n/ryí ne banchí ebe ḿbé kpákpá* ké nkéré mú n/níbî kámbé ké bubwô* n-fîm kámbé ba-byí ké Éjip*. Nang ké m/mû kámbé wǎ otyép, mbé ba*da/tî ocím ámu mú n/ryí ne mbé*. 33Ocím mú ofyîfî mú n/chi n-ryí ne banet-Ézerel mu něen. N/chi n-fé kámbé byije ejí ké byiko ebe, n-sáng kámbé kámbyí ké atyém ebe. Me n/chi n-kyú Osówo ebe, ne mbé ba/chi ba-kyú banet ejí. 34Onet o*fí ké burwám ebe mú o/chi o-tángê otángé onet-oshê emen eringe nyí odanyît Óburúkpâbí* ké nǎ, kángkáng ba/chi ba-nyît mě kyi-fím ké onet mú mu kyísí kyísí tete kyi-ribi ké mú mu kiǐtí o-shwôm kángkáng. N/chi n-pwoo kámbé byibî ebe ne mm*ba/chi n-chîzîim byibî ebe*. Me Óburúkpâbí nké n/raa.
35Óburúkpâbí mu o-tî ng óbyísû o/fu,
okye kiinwángé ne esû,
o-tî otukáku ne ékpére o/fu, esan ne buchú.
Nyǐ mu o-náng ng baya ḿbé baryên
o-chi i kámbé ba-kpet erime.
Dyizîn emen dyi-bángê e Óburúkpâbí mú o/rêe o-shwôm.
36Nyǐ o/ryí ocím o/fu,
eringe nyí byěm ḿbyí nyǐ oo/chi byi/chi byi-rí,
éné to nké oshê mú Ézerel o/chi o-rí.
37Dyicí ńdyí onet o/chi o-man ekan bubóng,
o-kyé to o-ri ńkyí nkyi ké kafâ-ejíí,
dyicí ándyi kâng nké nyǐ o/chi o-né banet-Ézerel,
ké bubwô ḿbú kángkáng byěm ḿbyí baa/chi.
Óburúkpâbí nké o/raa.
38Óburúkpâbí o/raa o/fu, nkéré mu o-bâ mú ba/chi ba-bwât Jerúsélem ba-bi wǎ oshê emen kyi-fím ké kiǐnyáám-kyikit-mbâm ńkyí badakó Hánánel kyi-ribi ké dyifyi ńdyí badakó Dyímongé. 39Ne buti bu/chi bu-fím ányi tete bu-jâ ké kyicê ńkyí esû nyi e-ríbî ng bu-ribi ké kaku ńké badakó Gárep, bu-wáp Gówa bu-fé ké kafâ. 40Owo omúmú mú mbe ba-ryii ng banet, ba-pwó ng biǐbyém, ne kángkáng dyikán ńdyí ndyi ké bukô-kace ńké badakó Kyídoron, tete kyi-ribi ké dyifyi ńdyí badakó Kabyî-orá, ké kyicê ńkyí esû nyi e-byí i, byi/chi byi-firi byikit-ociring ḿbyí byi/já mě. Banet baa*ba/chi ba-chîman ebú oshê ámu* ba-bên kámú*.
Currently Selected:
Jeryimáya 31: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
