Jeryimáya 30
30
Ocím mú Óburúkpâbí o/ryí Banet Emen
1Osówo Óburúkpâbí mú Ézerel 2o/raa ne me o/fu, sáng kángkáng byěm ḿbyí me nn/sét ǒ ké nwet, 3ké nǎ, nkéré mu o-bâ mú n/chi m-bwa ne banet ejí ḿbé Ézerel ne Júda esim. Me n/chi m-bwa ne mbé esim ké esí nyí m/mû n/kye banchí ebe ḿbé kpákpá, ne e/chi e-chîkyú nyí ebe. Me Óburúkpâbí nké n/raa.
4Óburúkpâbí o/raa ne banet ḿbé Ézerel ne Júda o/fu,
5me n/jwo ejá-bukyû nyí chwǒm-bushî,
ejá-bukyû nyí bushî,
*chí nyí bunyîn-dyityém*.
6Kabe kpá, onyinchéng o-man n ekoo dyifít o-fwon wǎn?
Ebóng kâng ńkyí me mu n-ri ng onyinchéng nang orá ne abwô ké osín
wǎ onyinyi mú bufwon mbu bu-nwa ng ǎ.
Ebóng bushú nang burá bu/firi dábe.
7Dyicí ándyi ńdyí ndyi dyi-bâ dyi/bên dyi-shwôm,
dyikíri dyi*fí to wǎ ndyí*.
Ndyi nkéré-bafip mú banet ejí,
nké mbé ba/chi ba-fem ké ndyí.
8Óburúkpâbí mú o/rêe o-shwôm o/raa o/fu, â dyicí ándyi dyi/fyi, n/chi n-sé biǐré ḿbyí mbyi kámbé ké byitông, m-pii kámbé bamgbokobá, ne mbé baa*kyú to básóng ḿbé bacinbánet*. 9Nké mbé ba/chi ba-kyú bǎmgbán ejí, me mú mu Osówo Óburúkpâbí ebe, ne ḿbé onet-kyikû-banet ńkyí Otu Dívit, mú me n/chi n-kúng ǎ butu.
10Banet ejí, *da n̂g eshî*.
Banet ḿbé Ézerel, *da n̂g eshî*.
N/chi n-fîm běn ké esí ányi nyí tíbítíbí,
ké esí nyí ben bamu básóng.
Ben ba/chi ba-bwa esim dyijê,
ba-ba-kyú ké bunyîn-dyityém.
Me n/chi n-ku běn,
ne onet o*fí mú o/chi o-chi běn ba-shî*.
11Me n/chi m-bâ n-kâm běn m-ba-nyii běn.
N/chi m-bên kángkáng eshê nyí mm/pwó běn ké nyǐ byiryibyiryi,
nké mm*ba/chi n-ju běn*.
Mm*ba/chi m-mîng běn busông ekye*
nké ké nkéré nn/kye běn busông,
n-kyâ běn ḿbú bu/kwárê ne ben.
Me Óburúkpâbí nké n/raa.
12Óburúkpâbí o/raa ne banet emen o/fu,
byibáp enen bii*kpú*
baa*soo byinêm enen byi-kpú*.
13Onet o*fí mú oda běn etún*.
Bukye bu*fí ké byibáp enen*
okabe o*fí mú ben badanyange*.
14Kángkáng banet-kyijé enen baa/ráp běn.
Ba*fí to ba-kérê ng kyi-kim ne ben*.
Me nn/kye běn bunwa wǎ onet-bushwôn.
Busông ḿbú n/kye běn bu/rêe,
ké nǎ, byibî enen byi/jê,
ne dyityém enen ńdyí ba/bên dyi/jê kanong kanong.
15*Da n̂g echîkye byiko enen afaníkong kyi-kim ne byinêm enen*.
Bukye bu*fí ḿbú badachi kámbyí byi-kpú*.
Me n/kye běn busông ḿbún,
ké nǎ, byibî enen byi/jê,
ne dyityém enen ńdyí ba/bên dyi/jê kanong kanong.
16Nké kántîk, nang yeě mú o/ju běn,
ba-ju ng ǎ to,
ne ba/chi ba-kúng kángkáng banet-bushwôn enen
ba-dim ne mbé wǎ bamgbokobá.
Nang yeě mú mu o-cít ng běn,
ba/chi ba-cít ǎ to,
ne nang yeě mú mu o-nam m běn dyiju,
ba/chi ba-ju ǎ to.
17N/chi n-chî běn echi ba-nyange.
N/chi n-chi byinêm enen byi-kpú,
nang ké banet-bushwôn enen mbe ba-raa ng ba/fu,
Záyon o*fí to ké chwǒm*.
Onet o*fí mú mu o-tún n kámú*.
Me Óburúkpâbí nké n/raa.
18Óburúkpâbí o/raa o/fu,
me n/chi m-bwa ne banet ejí esim ké esí ebe,
n-ri kyikû-banet nang kyirá bafip.
Ba/chi ba-bwât Jerúsélem,
ba-bwât kyibám-butu emen.
19Banet ḿbé mbe ba-kyú u ányi ba/chi ba-kwán ekwan-akpee.
Ba/chi ba-wonge ké bunyîn-dyityém.
Ké ojware ejí, mbé ba/chi ba-jê ba-ca kasú.
Ojware ejí o/chi o-bâ kámbé ne ofê.
20N/chi m-bwa ne busa ḿbú oshê ḿbú kpákpá esim,
n-chi kámbú bu-chîshwane wǎ eringe nyí bu/mû.
Nang yeě mú o/cít kámbé n/chi n-kye ǎ busông.
21-22Otu ebe o/chi o-fím ké oshê mú ebe mbé bayén.
Wǎn-otu o/chi o-fím ké burwám ḿbú banet ebe.
Nyǐ o/chi o-bâ o-kâm mě ké nkéré nn/kó ǎ,
ké nǎ, onet o*fí mú odaman ebê*
â n*da ǎ ekó*.
Mbé ba/chi ba-kyú banet ejí,
ne me n/chi n-kyú Osówo ebe.
Me Óburúkpâbí nké n/raa.
23-24Busa-dyityém ḿbú Óburúkpâbí mbu afú nyí aryên, afú nyí aryên aryên nyí adatugi byibî-banet ké byiko. Boo*ba/chi bu-man* tete bu-chi ńkyí bu/kabe bu/fu, mbú bu-chi i. Ké ací nyí nyi a-bâ, banet emen ba/chi ba-nyît kanong kanong kyi-kim ne nkyí.
Currently Selected:
Jeryimáya 30: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
