Jeryimáya 18
18
Jeryimáya o/ce ké Kyise ńkyí Nchi Butí
1Óburúkpâbí o-raa ne me o/fu, 2ca ké kyise ńkyí nchi butí, áku nké n/chi n-sét ǒ kyitwom ejí. 3Ne me n-dim kâng ké kyise ńkyí onet mú mu o-chi i butí, ne n-ri nchi butí ámu ké oo/kyú ké bǎmkpóngé emen. 4Â nchi butí ámu o/nyît o/fu, katí ńké nyǐ o/chi ka*fí ka-nwa ng* o-bên n katí ánke, o-kúng ecing ányi o-chi chwǒm kyikíri.
5Ne Óburúkpâbí o-raa kâng ne me o/fu, 6me n*fí ne busa ḿbú ndachi ńkyí kyi/nyîn mě ne banet ḿbé Ézerel wǎ eringe nyí nchi butí mún mu o-chi i ne ecing nyí mu o-kúng ng o-chi i butí dí. Banet-Ézerel mbe ké bubwô ejí wǎ eringe nyí ecing nyi ké abwô nyí nchi butí. 7Nang nkéré orá nké n/raa n/fu, n-kú m-bâ ezú nang m-bú nang m-bên oshê nang butu nang burá, 8nké â oshê ámu kâng o/mîng byibî-akwóp emen, mm*ba/chi n-chîchi ńkyí m/mû n/fu, n-chi i*. 9Nké â n/fu to n/fu, n/chi m-bi oshê nang butu nang burá, 10nké â oshê ámu o/né ńkyí n/sét kámú, o-chi ńkyí kii*nwa* mm*ba/chi n-chîchi ńkyí m/mû n/kabe n/fu, n-chi i*. 11Kántîk kâng, sét banet ḿbé Júda ne Jerúsélem a/fu, me mu n-kabe ng kyibî kyi-kim ne mbé, ne mu m-kpá ng byiko ḿbyí n/chi n-kye kámbé busông. Sét kámbé ba-mîng byibî-akpen ekyú, ba-yángê akwóp ebe ne byěm ḿbyí mbe ba-chi i. 12Nké mbé ba/chi ba-faa ǒ ba/fu, aa*wááng* bukwóp bu*fí*. Be byi-chi i okabe mú eten, nang yeě nang yeě o-chi i nang ebóng kyibî ńkyí kyi/nyîn ǎ.
Banet-Ézerel ba/né Óburúkpâbí
13Óburúkpâbí o/raa o/fu,
bí oshê nang orá â dyizong-chwǒm ándyi dyi/mû dii/chi nang kabónge.
Banet ḿbé Ézerel baa/chi chwǒm ńkyí kii*nwa esét*.
14Ashí-eku nyí ké Lebánon nyi a-kaa ng abíp dí.
Buce ḿbú mbu ké eku ányi mbu bu-núng ng dí.
15Nké banet ejí baa/ráp mě.
Mbe ba-shí i burwan ba-kyâ erím-bakye.
Baa/tánê ké bukwóp ḿbú ba/mû ba/chi ba-ca.
Ba*fí to ba-chi i byěm ḿbyí kpákpá*.
Ba-kú ba-cen n ké byikit ḿbyí biǐfáng byi*fí*.
16Baa/chi esí ńnyín e/firi chwǒm ńkyí kii*nwa achi etún*
ńkyí banet badané kánkyí ne banyá.
Byiko byi/chi byi-kaa kángkáng banet
ḿbé ba/chi ba-shwôm ké nyǐ ké byěm ḿbyí ba/chi ba-ri.
Ba/chi ba-kûninge ashí áshi.
17N/chi n-chi banet ejí ba-pwôo byiryibyiryi
ké bushú-banet-bushwôn ebe
wǎ édúkǎndú nyí bufú budatugi kányí.
N/chi m-bírî kámbé esim.
Mm*ba/chi n-chwáp kámbé*
ké nkéré afaníkong aa/bê*.
Banet-Ézerel ba/nam Jeryimáya Dyiju
18Banet-Ézerel ba-raa ba/fu, bâ n̂g byi-chi Jeryimáya mún chwǒm. Be byi-já ng banchi kyifen-Osówo ḿbé bada bě etángê, ne banet-bubong ḿbé bada bě ekye bacê, ne bamkpábé ḿbé bada bě ekûsét byiraa-Osówo. Bâ n̂g byi-bât ǎ byiraa, byi-mîng ejwo ńkyí mu o-sét ng.
19Ne Jeryimáya o-fé kâng nshwam o/fu, Óburúkpâbí, jwo ńkyí mu n-sét ng ǒ, a-fwôo atông a-jwo ńkyí banet-bushwôn ejí mbe ba-raa ng kyi-kim ne me. 20Ba-yip ng kyibî ba-ré kanong dyifwá dí. Nké mbé baa/sím dyibíng ba/fu, me nróng ké ndyí. Zîim eringe nyí me m/bê n-kâm ǒ, n-tîm ǒ arông ké bubwô ebe, eringe nyí aa*chi kámbé chwǒm ké busa-dyityém*. 21Nké kántîk, ǎ Óburúkpâbí, mîng bwǎn ebe ba-kpú esong. Mîng ba-ju kámbé ké byití. Batyép ne bwǎn bakpú kámbé. Banyinchéng bakpú byirwóm, ba-ju byisat ké byití. 22Twóm dyizu-banet-busa-dyityém ba-byí kámbé kiǐmút, ba-bên byise ebe. Chi kámbé ba-tii ké bushî. Mbé baa/sím dyibíng ba-tî ba/fu, me nróng, ba-kuu boǒtám ba/fu, bukám mě. 23Nké, ǎ Óburúkpâbí, wo amu a-nyît ng kángkáng ocibi ebe mú ba/fu, mbé ba-ju ng mě. *Dachi a-pwoo kámbé ké byibî ebe*. Yip busa-dyityém a-kpógê kámbé, a-fé kámbé kiinfwa ké dyichi.
Currently Selected:
Jeryimáya 18: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
