Jeryimáya 17
17
Kyibî ne Busông ḿbú Banet ḿbé Júda
1Óburúkpâbí o/raa ne banet ḿbé Júda o/fu, ba/yip kachí-nwet ńké kiǐré ne ba-sáng kyibî enen kyísí. Ba/yip kachí-nwet ńké kaa*shî* ba-sáng běn kánkyí ké atyém enen, ba-sáng to kánkyí ké bakô-byikit enen ḿbyí bamu ba-chi i byifen. 2Banet enen mbe ba-fâ osówo-onyinyi mú badakó Ashéra ké byikit-byifen emen echi, ké kángkáng byichí ḿbyí byi/tôong byikpó, ne kyíbóng-eku, 3ne ké eku nyí nyáám ké byikit ḿbyí mbyi wááng. Me n/chi n-chi banet-bushwôn enen ba-wuri esang enen ne byěm enen ḿbyí byinong [ké bubwô ḿbú kángkáng byibî ḿbyí baa/chi] ké esí enen kángkáng. 4Ben ba/chi ba-dim ba-mîng esí nyí n/kye běn, ne n/chi n-chi běn ba-firi ké bubwô ḿbú banet-bushwôn enen ké esí nyí ben baa*nyît* ké nǎ, busa-dyityém ejí mbu wǎ okwâ, ne bu/chi bu-mang ne banyá.
Byiraa Byikíri ḿbyí Óburúkpâbí o/raa
5Óburúkpâbí o/raa o/fu,
n/chi n-shú onet mú o/bírî mě esim
o-yip dyityém emen o-fé ne onet,
mú o/fé dyityém ké busa ḿbú onet mú o/chi o-kpú.
6Onet ámu mu wǎ kyichí ńkyí nkyi ké kyikim-dyikán,
ńkyí nkyi kyi-kán n ké kyikim-dyikán
ńkyí omu o*fí*
ńkyí nkyi kyi-kán n ké kyikit ńkyí esí ee*nwa*
nyí chwǒm kyikíri kyi*fí ké nyǐ*.
Onet ámu oo*ba/chi o-já chwǒm ńkyí kyinong*.
7Nké me n/chi n-jware onet mú o/fé dyityém ne me.
8Onet ámu mu wǎ kyichí ńkyí nkyi kyi-kán n ké bukô-kace,
ńkyí eriri emen nyi e-ribi ng ké omu.
Kyichí ánkyi kii*shî*
â burwom bu/cé*
ké nǎ, eshǎan emen e-waa ng degedege.
Nang omu o*fí o-na ng* kii*kérê*.
Kyi-zím m byirim kángkáng nkéré.
9Yeě odaman enyît dyityém ńdyí onet.
Chwǒm kyi*fí ńkyí kyidanîm onet wǎ ndyí*.
Ndyi dyi-rwôm m kyirwóm ńkyí kyi*fí ne bukye*.
10Me Óburúkpâbí n-kyé ng kafâ-onet,
n-kan atyém nyí banet.
Mu n-tî ng nang yeě nang yeě
wǎ eringe nyí mu o-kyú u dyikpen emen,
wǎ eringe nyí nyǐ mu o-chi i byěm.
11Onet mú mu o-já ng akpuga ké bukwóp ḿbú boo*nwa*
mu wǎ kanurung ńké kadacép ácě nyí ka*da/mîng*.
Esang emen e-tánê e ǎ ne bubwásíng,
ne ké nkuli kyikû, o-firi enyam-onet.
12Kiǐtí-kyise-kyifen-Osówo echi eten nkyi wǎ kiǐtí-kakyúng-butu
ńkyí nkyi kyíbóng-kaku ńké nyáám kyi-fím ké kiimkpet kyikû.
13Óburúkpâbí, wo nké Ézerel mbe ba-tî ng achi.
Kángkáng banet ḿbé ba/mîng ǒ ba/chi ba-koo éshwân.
Ba/chi ba-rím wǎ azîn nyí badasáng ké édúkǎndú,
ké nǎ, mbé baa/mîng ǒ wo mú amu Óburúkpâbí,
mú amu kace ńké kadakye dyikpen.
Jeryimáya o/bí Óburúkpâbí Ochwâp
14Óburúkpâbí, chi kyirwóm ejí kyi-man, ne me n/chi n-nyange kanong kanong. Nyii mě a-koo, ne kyibî-chwǒm kii*ta mě to*. Wo nké me nda ǒ ekye akpee.
15Banet mbe ba-bí ng mě ba/fu, byěm ḿbyí Óburúkpâbí o/pám o/fu, nyǐ o-chi i bě, mbyi nyá. Ochi bě kámbyí kántîk.
16Nké me n*da ǒ etírîng n/fu, [kye kámbé busông*] ǎ Óburúkpâbí*. N*da/ryuu n/fu, kyibî-nkéré kyikâm kámbé*. Óburúkpâbí, wo amu a-nyît ng ńkyín. Wo amu a-nyît ng ńkyí me nn/raa. 17*Da mě echi n-kû ǒ eshî*. Wo amu kyikit-dyirem ejí, â afaníkong a/bê. 18Wuri banet ḿbé mbe ba-kyâ mě busông éshwân, nké *da mě ewuri me* ǎ Óburúkpâbí*. Fé kámbé bushî, nké *da mě efé bushî*. Kye kámbé busông, a-ját kámbé boǒcê boǒcê.
Eringe nyí badatî Dyicí-Ékwâbashi
19Óburúkpâbí o/raa ne me o/fu, Jeryimáya, ca ké dyifyi-oshê ńdyí badakó Dyifyi-Banet, ńdyí batu ḿbé Júda mbe ba-cen n ké ndyí ba-nung ng ké oshê ba-byí i, a-da-sét kyitwóm ejí. Ca to ké afyi nyí áku to amúmú nyí nyi ké Jerúsélem. 20Sét batu ne kángkáng banet ḿbé Júda ne nang yeě nang yeě mú mu o-kyú u ké Jerúsélem ne mú mu o-cen n ké afyi ńnyín a/fu, ofwôo atông o-jwo ńkyí mu n-sét ng. 21Sét kámbé a/fu, â akpen ebe nyi a-jê ng kámbé, ba*dachi ba-tû dyitû ké dyicí-ékwâbashi*. Ba*dachi ba-tû chwǒm ba-shwôm ne nkyí ké afyi nyí Jerúsélem*. 22Nang chwǒm ké byise ebe ba*dachi ba-yip ba-byí ne nkyí kyíjí ké dyicí-ékwâbashi*. Ba*dachi ba-chi bǎmkpóngé ké dyicí-ékwâbashi*. Ba-man ba-tî kándyí wǎ dyicí ńdyí dyi/já mě, wǎ eringe nyí n/sét banchí ebe ḿbé kpákpá. 23Banchí ebe ḿbé kpákpá ba*da/fwôo atông ba-jwo ńkyí n/sét kámbé*. Nké mbé ba/bwa ba-kpet eshwane ashí. Mbé ba*da/kwâa byěm ne me* ba-chi nang ńkyí n/sét kámbé*.
24Sét kámbé a/fu, ba-man ba-tî kángkáng byije ḿbyí n/fé kámbé. Baa*man ba-tû dyitû nang dyibónge ba-shwôm ne ndyí ké afyi nyí oshê mún* ké dyicí-ékwâbashi*. Ba-man ba-tî dyicí-ékwâbashi wǎ dyicí ńdyí dyi/já mě, ne baa*man ba-chi bǎmkpóngé ké ndyí*. 25Ne batu ebe ne banet-ashí-oshê ebe kâng ba/chi ba-nung ké afyi nyí Jerúsélem, ba-kyú ne busa ḿbú otu wǎ eringe nyí Otu Dívit o/mû ne mbú. Mbé ba/chi ba-cibi ne banet ḿbé Júda ne ḿbé Jerúsélem ba-yú ké bamútu ḿbé bubyî-orá budatut ne ké bubyî-orá, ne oshê mú Jerúsélem o/chi o-waa kángkáng nkéré ne banet súsú. 26Banet ba/chi ba-fím ké eshê nyí Júda ne ké eshê nyí e/fárâng ne Jerúsélem, ba/chi ba-fím ké esí nyí Běnjámin, ba-fím ké byikû-eku, ba-fím ké eku, ba-fím to ké kyicê-busyísen ńkyí Júda. Ba/chi ba-ba-chi byifen ké kiǐtí-kyise-kyifen echi ejí. Ba/chi ba-chi byifen ḿbyí badashí byirim-enyam ne ḿbyí esang-byichí ne ḿbyí burwan eshí ne ḿbyí asǎma ekó. 27Nké mbé ba-man ba-chi ńkyí n/sét kámbé, ba-tî dyicí-ékwâbashi wǎ dyicí ejí. Baa*man ba-tû dyitû ba-shwôm ne ndyí ké afyi nyí Jerúsélem ké dyicí ándyi* ké nǎ, â ba/tû, n/chi n-fé okwâ ké afyi nyí Jerúsélem. Okwâ o/chi o-shí byibám-batu ḿbyí ké Jerúsélem ne onet o*fí mú o/chi o-man erîp kámú*.
Currently Selected:
Jeryimáya 17: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
