Jeryimáya 15
15
Bafip ḿbé Banet ḿbé Júda ba/chi ba-ri
1Óburúkpâbí o/raa kâng ne me o/fu, nang Músis ne Sámwel nké ba/mû ba/bwom nyín mbe ba-tîm m mě arông, mm*ba/chi n-ri banet ḿbén bafip*. Ró kámbé ba-dim. Ró kámbé ba-dim mě ké bushú. 2Â mbé ba/bí ǒ kyikit ńkyí mbé ba/chi ba-jâ, sét kámbé a/fu, me n/sét něen n/fu, kyicê ba/chi ba-kpú bukyû-kyirwóm. Ányi nké mbé ba/chi ba-jâ. Bakíri ba/chi ba-kpú ké byití. Ányi nké mbé ba/chi ba-jâ. Kyicê ba/chi ba-kpú esong. Ányi nké mbé ba/chi ba-jâ. Bakíri ba/chi ba-kám kámbé wǎ básóng. Ányi nké mbé ba/chi ba-jâ. 3Me Óburúkpâbí nn/kabe n-sét n/fu, byěm ḿbyí byi/bên byi-shwôm byinyii byi/chi byi-chi kámbé. Ba/chi ba-ju kámbé ké byití. Bubyî bu/chi bu-tut byikwóm-enyam-byiko ebe. Bunurung bu/chi bu-ryí kámbé, ne enyam e/chi e-ryí kyicê ńkyí kyidawaa. 4N/chi n-chi kángkáng banet ḿbé ké ejíí ba-waa ocím ké dyishí fúú kyi-kim ne mbé, ké bubwô ḿbú ńkyí Otu Manáse mú wǎn-Otu Hezekyâ o/chi ké Jerúsélem ké nkéré o/mû otu mú Júda.
5Óburúkpâbí o/raa o/fu,
yeě oda běn eri bafip,
ǎ banet ḿbé Jerúsélem.
Yeě oda běn etii.
Yeě odaman ebwom ka-bwon o-bí běn eringe nyí ben bamu.
6Ben baa/né mě, baa/bírî mě esim.
Ké bubwô ámbu, n/tan bubwô ejí n-ju [běn,
ké nǎ, nn/kyee ekám kafâ ejí
ńké nke ka-sa ng mě.]
7Me n/yip běn m-pwó ké bufú wǎ biǐbyâa
ké oshê nang orá ké esí ńnyín.
N/ju běn, ben banet ejí.
N/ju bwǎn enen,
ké nǎ, ben ba*da/mîng byibî-akwóp enen*.
8Banyǐnkú ḿbé mbe ké esí enen ba/jê ba-shwôm éshíshě nyí nyi ké bukô-baya.
N/ju byisat enen ké nkéré ba/tôong byisat,
n-chi bané ebe ba-ri busông.
N*da/bên nkéré ne m-pwó kámbé bafip ne bushî*.
9Onyinyi mú bwǎn emen ashí káchâtkányi ba/kpú, oo/jwâa,
o-nwa ng ne kiǐnjáng eshû.
Dyicí dii/bírî ǎ buchú.
O/firi ne éshwân ne kyirwóm-kafâ.
N/chi m-mîng banet-bushwôn enen ba-ju běn ben burwám enen ḿbú ba/tôong bakpó.
Me Óburúkpâbí nké n/raa.
Jeryimáya o/sét Óburúkpâbí kyi-kim ne Bafip Emen
10Me n*fí ké bunyîn-dyityém*. Ebóng boné ejí o/bê ne me ké esí ńnyín. Me mu ké bushwôn ne okân ké dyishí ne nang yeě nang yeě ké ejíí. Me n*da/pwoo ne onet akpuga* nang onet to o*da mě epwoo ne akpuga* nké nang yeě nang yeě mu o-shú u mě. [ 11Óburúkpâbí, kyi/bát byishû ebe byikám mě â n*da/kyú ḿgbán eyên] mú onong* â n*da ǒ etîm arông ké bubwô-banet-bushwôn ejí ké nkéré ba/mû ké afaníkong ne bafip*. 12Onet o*fí mú odaman enep kiǐré o-bún* aciringaciring kiǐré ńkyí kyi/fím bushûyû ńkyí kyidajang eshwane.
13Óburúkpâbí o-raa ne me o/fu, n/chi n-twóm banet-bushwôn ba-ba-wuri akpuga ne kángkáng byěm ḿbyí banet ejí, eringe nyí ndakye kámbé busông ké byibî ḿbyí baa/chi ké kángkáng esí ńnyín. 14N/chi n-chi kámbé ba-firi básóng ḿbé banet-bushwôn ebe, ké esí nyí mbé baa*nyît chwǒm kyi-kim ne nyǐ* ké nǎ, kafâ esa ejí nke wǎ okwâ ne ka-waa ng ne banyá.
15Ne me n-raa kâng n/fu, Óburúkpâbí, wo amu a-nyît ng kyikû. Zîim mě, a-chwáp mě. Mîng mě n-só banet ḿbé mbe ba-kyâ mě busông ewa. *Dachi a-ryí ofit kyi-kim ne mbé* a-mîng kámbé ba-ju mě*. Zîim a/fu, ké dyishí eyên nké mbe ba-kyâ mě edángé. 16Wo a/raa ne me, ne n/fwôo atông n-jwo kángkáng ńkyí wo a/sét mě. Osówo Óburúkpâbí mú o/rêe o-shwôm, wo nké a/já mě, ne ké bubwô ámbu, byiraa eyên byi/chi dyityém ejí dyi-sú ne bunyîn-dyityém. 17Me n*da/kyú ne banet bakíri n-jwó ng éjwô* n-kyú ké bunyîn-dyityém*. Ké byěm echi ḿbyí wo amu a-sét ng mě, me n/kyú ké byiko ejí, n-firi ké kafâ esa. 18Ebóng me mu n-ri ng afaníkong n-câ kashú. Ebóng byinêm ejí byi*fí byi-kpú u*. Wo amu a-ryuu ng a/fu, a-fâ mě bushú ké kafâ wǎ kace ńké kadanúng ne kyifang dí.
19Ké byiraa ḿbyín, Óburúkpâbí o/faa ejá o/fu, â a/bwa esim, me n/chi n-chî ǒ ekoo, ne a/chi a-chîkyú ḿgbán ejí. Â wo a/mîng eraa byěm ḿbyí byi*da/byí chwǒm* a-sét banet kyitwóm ńkyí kyinong, wo a/chi a-chîkyú mkpábé mú odasét byiraa ejí. Banet ba/chi ba-bwa esim ba-kâm ǒ, ne kii*ba/chi kyi-chîchi ńkyí wo adadim a-kâm kámbé*. 20Me n/chi n-chi ǒ a-shwane wǎ ekpe-kyise nyí biǐré biire ké burwám ebe. Mbé ba/chi ba-nwa ne wo, nké baa*ba/chi ba-kpógê ǒ*. Me n/chi n-kyú ne wo, n-ku ǒ, n-chi ǒ chwǒm kii*ta ǒ*. 21Me n/chi n-nyii ǒ n-koo ké abwô nyí busa ḿbú bambên atyém-banet. Me Óburúkpâbí nké n/raa.
Currently Selected:
Jeryimáya 15: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
