Jeryimáya 14
14
Kiǐtí-Omu mú o/kin ena
1Óburúkpâbí o/raa ne me kyi-kim ne omu mú o*fí o-na ng* o/fu,
oshê mú Júda o/firi ké dyikán eta,
eshê emen e-kú e-kpú u.
2Banet emen ba-kú ba-rí i ké ecing ké bafip,
ne oshê mú Jerúsélem mu o-tii ng o/fu, bachwáp kámú.
3Banfang-banet mbe ba-twóm m bǎmgbán ebe ba/fu, bada-tó omu.
Bǎmgbán ámbe ba-dim ba-wâa ké buce,
nké ba*da/ri omu*.
Ba-bwa esim ne butí kafâ dyikáá.
Ké nkéré mú ba*fí to ba-nyît ng ńkyí badachîchi*
ba-rôo bashú ebe.
4Ké nǎ, omu o*fí to o-na ng*
ne esí ee/jwóm,
kyirwóm-kafâ kyi-kú kyi-nwa ng bamkpang byifát,
ne ba-kú ba-rôo ng bashú ebe.
5Ké dyikán, enyam nyí e/fwon wǎn e/dim e-mîng kámú ányi,
ké nǎ, biǐbyâa byi*fí ḿbyí edaryí*.
6Enyam nyi e-bwom m kyíbóng-eku,
e-nwa ng ne kiǐnjáng eshû wǎ boǒbyî.
E*fí to e-rángê e*
ké ebóng, e*fí to ne byiryíng ḿbyí edaryí*.
7Banet ejí ba-kú ba-tii ng bukyû ba-kó ng mě ba/fu,
nang ké byibî eten mbyi byi-tông ng bě be bayén wááng,
chwáp bě, ǎ Óburúkpâbí,
wǎ eringe nyí wo aa/ryí bě ocím.
Be bii/bírî ǒ esim kampén chwóó.
Be bii/chi byibî ké bushú eyên.
8Wo kǎnchí nké Ézerel badatî dyityém.
Wo nké amu a-nyii ng bě ké afaníkong.
Ebóng wo amu wǎ ocinónet ké esí eten,
wǎ ocinónet mú odarí dyicí dyibónge.
9Ebóng wo amu wǎ onet mú ba/byí ǎ kiǐmút,
wǎ onet-súja mú o*fí to ne busa ḿbú odachwáp*.
Ké ntûntû, ǎ Óburúkpâbí,
wo amu ne be.
Be byi-chi i banet eyên,
*da bě emîng*.
10Óburúkpâbí o/raa kyi-kim ne banet ḿbén o/fu, kyi-nyîn n kámbé echêe ba-mîng mě, ne baa*man eníbî byiko ebe*. Ké bubwô ḿbún, me kyi*fí kyi-nyîn n mě ne mbé*. N/chi n-zîim byibî-byěm ḿbyí baa/chi, n-kye kámbé busông ké bubwô-byibî ebe.
11Óburúkpâbí o/raa ne me o/fu, *dachi a-bí mě a/fu, me nchwáp banet ḿbén*. 12Nang ba-bwa ba-cíp esong, mm*ba/chi n-fwôo atông ké bukyû ebe ḿbú mbe ba-tii ng ba/fu, me nchwáp kámbé*. Nang ba-bwa ba-chi byifen ké byitú ne ké byiryíng ba-kye mě, kii*ba/chi kyi-nyîn mě ne mbé*. Nké n/chi n-ju kámbé ké byití ne ké esong ne ké byirwóm.
13Ne me n-raa kâng n/fu, Óburúkpâbí mú mu Otu Kyítá, wo amu a-nyît ng a/fu, bamkpábé ḿbé badasét byiraa eyên mbe ba-sét ng banet ba/fu, byití ne esong bii*ba/chi byi-chîchi* ké nǎ, wo aa/ryí ocím a/fu, bii*chi to*. Mbe ba-sét ng ba/fu, bunyîn-dyityém nké nke nké bu/chi bu-firi ké esí eten.
14Nké Óburúkpâbí o/faa mě o/fu, bamkpábé ḿbé badasét byiraa ejí mbe ba-sét ng byisédéng ké dyizîn ejí. Me n*da/twóm kámbé*. Nang busa n*da/kye kámbé* nang kyiraa nang kyibónge n*da/sét kámbé*. Byěm-akat ḿbyí mbe ba-sét ng byi*da/fím ne me*. Byěm ḿbyí mbe ba-sét ng ba/fu, byi/chi byi-chi mbyi byěm ḿbyí byi*fí ké kafâ* ḿbyí mbé bayén ba/kabe. 15Me Óburúkpâbí mu n-sét ng ǒ ńkyí n/chi n-chi bamkpábé ḿbé badasét byiraa ejí ámbe, ḿbé n*da/twóm kámbé* ne mbe ba-sét ng ké dyizîn ejí ba/fu, byití ne esong bii*nung ké esí ńnyín*. N/chi n-ju kámbé ké byití ne esong. 16N/chi n-kúng bukwóp ḿbún bubónge to n-ju banet ḿbé mbé mbe ba-sét ng kámbé byěm ḿbyín. N/chi m-pwó byikwóm-enyam-byiko ebe ké byiká-oshê mú Jerúsélem, ne onet oo*ba/chi o-kyú mú o/chi o-ryii kámbé*. Ńkyín kyi/chi kyi-chi kámbé kángkáng, cibicibi ne banyi ebe ne bwǎn ebe. N/chi n-chi kámbé ba-ré dyifwá ńdyí atyém ebe nyí ba/bên.
17Óburúkpâbí o/kye mě busa o/fu, me nsét banet kyi-kim ne bafip ejí n/fu,
kyi/bát achi ejí akûsuri batíí buchú ne esû.
N*dachi m-mîng bukyû etii*
ké nǎ, baa/némê banet ejí kanong kanong
ne nkyi kyi-bán n kámbé chwóó.
18Â n/ce ké dyikán,
mu n-ri ng byikwóm-banet ḿbyí ba/ju ké byití.
 n/ce ké eshê,
n-ri banet ḿbé mbe ba-kpú u esong.
[Bamkpábé ḿbé badasét byiraa-Osówo
ne banchi kyifen-Osówo mbe ba-chi i bǎmkpóngé ebe,
nké ba*fí ba-nyît ng ńkyí mbe ba-chi i*.]
Banet ba/tîm Óburúkpâbí Arông
19Óburúkpâbí, wo aa/né banet ḿbé Júda a-zú dyityém?
Banet ḿbé Záyon mbe ba-sa ng ǒ kafâ?
Ebóng wo aa/kye bě kiimbâng-onéme
mú baa*man bě to esoo kyibáp kyi-kpú*.
Be byi/kyé bunyîn-dyityém,
nké chwǒm ńkyí kyinong kyi*da/chi*.
Be byi/tî achi byi/fu,
byi/chi byi-nyange,
nké byi/bwa byi-ri biinkaa-byiko-byěm.
20Óburúkpâbí, be bii/chi kyibî ké bushú eyên.
Byi-kú byi-sét ng byibî eten
ne ḿbyí banchí eten ḿbé kpákpá.
21Zîim byěm ḿbyí a/ryí bě ocím,
a*dachi a-né bě*.
*Dachi a-fé Jerúsélem mú mu ne kiǐtí-kakyúng-butu eyên éshwân*.
*Dachi a-bên ocím mú a/ryí ne be ne a-sem byiko eyên*.
22Orím-bukye mú ké ejíí o*fí nang obónge
mú odaman echi omu o-na*.
Bubóng ké byiko emen boo*man echi omu o-na*.
Be bii/yip atyém eten byi-fé ne wo,
ǎ Osówo Óburúkpâbí eten,
ké nǎ, wo nké amu a-chi i byěm ḿbyín.
Currently Selected:
Jeryimáya 14: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
