Azáya 9
9
1Bukwóp bu*fí kámbé ḿbú badafem ké nkéré mún mú afaníkong*.
Otu mú Nkéré mú mu o-bâ ké Kashú
Ké nkéré obónge, ba/wuri esí nyí byikim-banet ḿbyí Zébélon ne Nafatályi éshwân, nké ofê o/chi o-bâ ké nkéré mú mu o-bâ ké kashú o-kâm esí ńnyín, kyi-fím ké baya ḿbé badakó Medeterényan, kyi-ribi ké kyicê ńkyí esû edabyí, ké esí nyí bukô-kace ńké badakó Jódan ḿbú áku, tete kyi-ribi Gályílyi oyén mú bacinbánet mbe ba-kyú u.
2Banet ḿbé ba/cen ké kyifip baa/ri kiǐtí-kiinwángé.
Mbé ba/kyú ké esí nyí biǐríribí,
nké kántîk kiinwángé kyi-kú kyi-san n kámbé ké byiko.
3Óburúkpâbí, [wo aa/kye kámbé kiǐtí-bunyîn-dyityém.]
Aa/chi kámbé ba-firi ké bunyîn-dyityém.
Mbé mbe ba-jêe ng ké ńkyí wo aa/chi
wǎ eringe banet badajêe ké nkéré ba-kú ba-fuu ng byiryíng
nang ké nkéré mú ba-kú ba-kyii ng esang nyí baa/bam banet ba-koo.
4Ké nǎ, wo aa/koo dyitû ńdyí dyi/mû dyi-ró ng kámbé
ne ochí mú o/mû o-díp ng kámbé ké byikem.
Aa/kpógê oshê mú o/mû o-cít ng o-kyâ banet eyên busông,
wǎ eringe nyí a/kpógê basúja ḿbé Médyan
ké nkéré mú oo/shwôm ké esim.
5Okwâ o/chi o-shí ékpúkput nyí basúja ḿbé mbe ba-bâ ne byití
ne byídí ebe to ḿbyí byi/firi baróng bárong.
6Ké nǎ, baa/fwon bě wǎn.
Baa/kye bě wǎn-onyinchéng,
ne nyǐ o/chi o-kyú bě otu.
Ba/chi ba-kû ǎ ekó [Kiǐtí-]Nkye Bacê,
ne Osówo mú o/rêe o-shwôm,
ne Bonchí mú ne Banyá,
ne Wǎn-Otu mú Bunyîn-Dyityém.
7Busa ḿbú butu emen bu/chi bu-kán bu-ca kashú.
Butu emen bu-waa ng kángkáng nkéré ké bunyîn-dyityém.
Nyǐ o/chi o-kyú otu wǎ onet mú o/chi o-kúng kyikit ńkyí Otu Dívit.
O-kúng busa emen o-tî ké byěm ḿbyí byinong
ne ḿbyí ntûntû echi,
kyi-fím kántîk ne ne banyá.
Óburúkpâbí mú o/rêe o-shwôm o/fu,
nyǐ o-man o-chi ḿbyín kángkáng.
Óburúkpâbí o/chi o-kye Ézerel Busông
8Óburúkpâbí oo/két mpan o-bên Ézerel, o-bên kyikû-banet ńkyí Jekôp. 9Kángkáng banet ḿbé Ézerel, nang yeě mú mu o-kyú u ké oshê mú Samérya o/chi o-nyît o/fu, oo/két mpan o-bên Ézerel. Kántîk, mbé mbe ba-tông ng byiko. Mbe ba-raa ng ba/fu, 10byise ḿbyí byi/bi ké ekpí-ecing bii/bûu, nké byi/chi byi-bwât kámbyí byi-bi ké aká. Byikim-byichí ḿbyí byi/mû byi-shwane e, ḿbyí byi/bi byise ké mbyí baa/bên kámbyí, nké byi/chi byi-két byikíri ké kyichí ńkyí kyi/nwa kyi-shwôm kángkáng byichí byi-fé.
11Óburúkpâbí oo/tírîng [banet-bushwôn ebe] o/fu bakye kámbé bunwa. 12Syírya o/bwom ké kyicê ńkyí esû nyi e-byí i, Fyilíta o-bwom ké ńkyí esû nyi e-ríbî ng, ne baa/bâa ocím mú badaryí Ézerel. Nké nang ké nkyi éné, kafâ ńké nke ka-sa ng Óburúkpâbí ka*da/man ne*. Mu o-chî ng etan bubwô ḿbú odakye kámbé busông.
13Banet ḿbé Ézerel ba*da/saa ne byiko* ba-mîng byibî echi*. Nang ké Óburúkpâbí oo/kye kámbé busông, mbé ba*da/bwa ne esim ba-kâm ǎ*. 14Óburúkpâbí o/chi o-kúng dyicí dyibónge nké nke o-kye banet-ashí ḿbé Ézerel ne banet ebe busông. O/chi o-két kámbé dyishí ne byiká. 15Bakâa-banet ne biǐtí-banet nké mbe dyishí, ne bamkpábé ḿbé badasét byiraa-Osówo ḿbé mbe ba-sét ng byisédéng nké mbe byiká. 16Banet-ashí-banet ḿbén baa/nîm kámbé, ne baa/chi kámbé ba-firi yógeyóge. 17Ne ké bubwô ámbu, Óburúkpâbí oo*ba/chi o-mîng kyisat nang kyibónge kyi-fem* ne oo*ba/chi o-ri onyǐnkú nang wǎn-kyibén obónge bafip* ké nǎ, kángkáng banet-Ézerel baa*nyît Osówo* ne ba/bên to atyém, ne kángkáng byěm ḿbyí mbe ba-chi i mbyi kyibî. Nké nang ké nkyi éné, kafâ ńké nke ka-sa ng Óburúkpâbí kaa*ba/chi ka-man* o-chî ng etan bubwô emen ḿbú odakye kámbé busông.
18Dyityém ebên ńdyí banet ḿbé Ézerel ndyi dyi-mang ng wǎ okwâ mú odashí bukpâng. Ndyi dyi-mang ng wǎ okwâ-kyizinge mú odabyí biimbâng-arúkwâ. 19Ké nǎ, kafâ nke ka-sa ng Óburúkpâbí mú o/rêe o-shwôm, busông emen mbu bu-mang ng wǎ okwâ ké esí emúmú, ne mbu bu-ju ng banet, onet o*fí mú mu o-chwáp ng orî*. 20Ké oshê omúmú, banet mbe ba-jii ng ba-ryí i nang ebóng chwǒm ńkyí ba/ri, nké esong ebe e*fí e-man n*. Mbe ba-ryí i nang bwǎn ḿbé ebe mbé bayén. 21Banet ḿbé Manáse ne ḿbé Éferem mbe ba-kyâ barî bunwa, ne baa/cibi kyikit kyibónge mbe ba-kyâ Júda bunwa. Nké nang ké nkyi éné, kafâ ńké nke ka-sa ng Óburúkpâbí ka*da/man ne* o-chî ng etan bubwô emen o-kye kámbé busông.
Currently Selected:
Azáya 9: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
