Azáya 7
7
Osówo o/twóm Kyitwóm kyi-kâm Otu Éhaz
1Byití byi/róng ké nkéré mú Otu Éhaz mú wǎn-Jótam, mú bonchí emen mú kánkán, mú o/mû o-bángê e Otu Ozáya, o/mû otu mú Júda. Otu Rézen mú o/mû otu mú Syírya, ne Otu Péka mú wǎn-Remalyâ mú o/mû otu mú Ézerel ba/kye bunwa ké Jerúsélem, nké ba*da/man ekoo kámú*.
2Ké nkéré otu mú Júda o/jwo ba/fu, basúja ḿbé Syírya baa/nung ké esí nyí Ézerel, bushî bu/róng ǎ ne banet emen kángkáng ḿbú bu/chi kámbé ba-kpet etím banê wǎ byichí ḿbyí afú nyi a-náng ng kámbyí.
3Óburúkpâbí o-raa ne Azáya o/fu, kpî wǎn eyên mú odabángê Shâ-Jáshup ba-ca ba-kâm Otu Éhaz. A/chi a-ri ǎ ké bukwóp ḿbú banchi byídí mbe ba-chi i bǎmkpóngé ebe, ké dyishí-owo mú kiǐdé ńkyí bushûyû nkyi kyi-sen n ké mǔ. 4Sét ǎ a/fu, okûbám kanong kanong, o-chee byiko. O*dachi o-shî* o-kye byiko emen afaníkong*. Busa-dyityém ḿbú Otu Rézen ne basúja emen ḿbé Syírya ne ḿbú Otu Péka bu*da/bên bu-shwôm arúkwâ nyí adabyí ké biǐshíshí-ekwón byifee*. 5Oshê mú Syírya cibicibi ne Ézerel ne otu ebe baa/nam chwǒm. 6Mbe ne okabe mú ba/chi ba-nwa ne Júda, ba-fé banet bushî ba-chêe ba-jâ ké kyicê ńkyí ebe, ba-kúng butu ba-kye wǎn-Tábyil.
7Nké me Óburúkpâbí mú mu Otu Kyítá n/sét n/fu, ńkyín kii*ba/chi kyi-man echi*. 8Ké nǎ, Syírya o*fí o-shwane e o-shwôm Damásákus mú mu dyityém-oshê emen* ne Damásákus to o*fí o-shwane e o-shwôm Otu Rézen*. Kyi-kim ne Ézerel, ké bajam-aje bachât esim atánge, ba/chi ba-bên kányí ba-shwôm mú ee*man to ekyú wǎ oshê*. 9Oshê mú Ézerel o*fí o-shwane e o-shwôm Samérya mú mu dyityém-oshê emen* ne Samérya to o*fí o-shwane e o-shwôm Otu Péka*.
 dyityém eyên ńdyí a/fé ne Osówo dyi*fí dyi-shwane e* wo oyén to aa*ba/chi a-kyú shwanshwan*.
Ekap nyí e/kim ne Wǎn mú ba/chi ba-kó ǎ Émánwel
10Óburúkpâbí o/chîtwóm kyitwóm kyikíri kyi-kâm Otu Éhaz, o/fu, 11bí Osówo Óburúkpâbí eyên o-tông ǒ ekap. Ekap ányi e-man n efím kyísí kyísí ké oshê-bakúsí nang kyíbóng kyíbóng ké bubóng.
12Otu Éhaz o-faa o/fu, me mm*man ebí n/fu, Osówo otông mě ekap*. Mm*man ekan Óburúkpâbí*.
13Azáya o-faa Otu Éhaz ké ńkyí o/raa éné o/fu, fwôo atông a-jwo kántîk, ǎ wǎn-kyikû-banet ńkyí Otu Dívit. Kyi/bên ńkyí wo adachi banet ba-kyee ké ofit eryí. Wo a-man a-chi to Osówo o-kyee ké ofit eryí dí. 14Kántîk kâng Óburúkpâbí oyén o/chi o-tông ǒ ekap. Búsé ḿbú mbu ne dyifít bu/chi bu-fwon wǎn, ne ba/chi ba-fé wǎn ámu dyizîn ńdyí badakó Émánwel, ányi kyi/byí, Osówo mu ne be. 15Ké nkéré wǎn ámu o/chi o-kán mú odakûman eraa ké kakim emen, banet ba/chi ba-kûjwáp abî-mpong, ba-kûrû bakút-bukwan. 16Nang ne nkéré ámu o-kûfyi, esí nyí batu ámbe bafee, ḿbé mbe ba-kyâ ǒ afaníkong, banet ba/chi ba-jaa ké nyǐ.
17Óburúkpâbí o/chi o-yip ací-afaníkong nyí a/rêe a-shwôm nang ará nyí a/mû aa/bê kyi-fím ké nkéré mú banet ḿbé Ézerel ba/pap ne banet ḿbé Júda, o-tû ǒ ké dyishí ne banet eyên ne kángkáng kyikû-butu eyên. O/chi o-bâ ne otu mú Asyírya.
18Ké nkéré mú nkéré ámu oo/fyi, Óburúkpâbí o/chi o-tông ekap nyí e/chi e-chi banet ḿbé Éjip ba-fím ké byiká-kace ńké badakó Nâl, ḿbyí tíbítíbí ba-bâ wǎ ecincing, ne nyǐ e/chi e-chi to banet ḿbé Asyírya ba-fím ké esí ebe ba-bâ wǎ bakwan. 19Mbé ba/chi ba-bâ ké dyizu ké biǐbîbî-ewo-eku ne ké bacim, ne ba/chi ba-cít akán amúmú ne kángkáng biǐbyâa.
20Ké nkéré mú nkéré ámu oo/fyi, Óburúkpâbí o/chi o-yámê nchi ashí mú o/chi o-fím ké esim-kace ńké badakó Yuférétyis, mú o/chi o-kwárê běn byiti ne eji nyí nyi běn ké ashí, ne eríp nyí nyi běn ké byiko. Ányi otu mú Asyírya.
21Ké nkéré mú nkéré ámu oo/fyi, â nang mkpang kyifát nké o/man etî wǎn-mpong obónge nké nke ne ebû efee, 22byitú ámbyi byi/chi byi-man ǎ ekye kángkáng bujê-abî-mpong ḿbú mu o-ryuu ng. Ké ntûntû, boǒnyín-banet ḿbú bu/chi bu-kpen ké esí ányi bu/chi bu-já abî-mpong ne bakút-bukwan ḿbyí badaryí.
23Ké nkéré mú nkéré ámu oo/fyi, biǐbyâa ne nnyamefám byi/chi byi-byí ké biǐnyínǒng-byifát ḿbyí kyichí kyibónge kyidazím égot-byirim-byichí etánge ḿbyí badashee ba-koo akpuga chwóó. 24Banet ba/chi ba-kûyip báre ne abán ba-da ng eryuu akán ké mbyí. Ké ntûntû, oshê omúmú o/chi o-bírî dyikán-byiwong. 25Kángkáng eku nyí ba/mû ba-kpang ng byiryíng e/chi e-bírî dyikán-byiwong ńdyí onet oo*man to ece ké ndyí*. Kyi/chi kyi-firi kyikit-baryî ńkyí bampong ne ebû.
Currently Selected:
Azáya 7: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
