Azáya 33
33
Nshwam-Ochwâp
1Banet-bushwôn eten ba/firi ké busông. Baa/nîm bě, ba-jii bě kajii, nang ké onet nang obónge o*da/nîm kámbé* o-jii kámbé kajii*. Nké nkéré ebe mú ba/chi ba-nîm banet, ba-jii kámbé kajii o/chi o-kúlî, ne mbé bayén ba/chi ba-bírî banet ḿbé badanîm kámbé ba-jii kámbé kajii.
2Óburúkpâbí, ri bě bafip. Be byi/tî achi eten ne wo. Ku bě ké afaníkong kángkáng dyicí a-nyii bě ké bankéré-afaníkong. 3Â wo a/nwa ké kyicê ńkyí eten, eshê e-jwo ng kyicoge-byití e-bâ e-chêe. 4Byi-bam byěm ebe byi-koo, byi-wuri byi-dim ne mbyí.
5Óburúkpâbí o/rêe kanong kanong. Kángkáng byěm mbyi ké bubwô emen. O/chi o-chi Jerúsélem o-sú ne ntûntû ne kanong echi. 6O-chi oshê o-chee beem. Kángkáng nkéré nyǐ o-ku ng banet emen ké afaníkong ne o-kyâ kámbé byinyídíng ne byěm enyît. Chwǒm ńkyí kyi/rêe kámbé kyi-shwôm ányi ofê mú bada ǎ ekye.
7Bakân-banet ba-kú ba-kó ng ba/fu, bachwáp kámbé. Banet ḿbé ba/bwom ké dyishí-oshê ba/fu, mbé ba-bâ ne bunyîn-dyityém ba-kú ba-tii ng bukyû buyén. 8Akwóp a/firi ne byibî-banet nyí banet ba*fí to ba-cen n ké nyǐ*. Byikwáré byi*fí to* ne ecím nyí ba/ryí ee/bên. Onet o*fí to mú bada ǎ echîkye ofê*. 9Baa/mîng esí e-waa dyikáá. Byizinge ḿbyí Lebánon bii/kpú, kiibet ńkyí Sháron ńkyí kyidabát byiryíng kyi/firi wǎ kyikit ńkyí omu o*fí* ne ké Báshan ne ké kaku ńké Kámel eshǎan e-kú e-roo ng ké byichí.
Óburúkpâbí o/kuri Banet-Bushwôn Emen Ekó
10Óburúkpâbí mu o-sét ng eshê o/fu, me n/chi n-chi chwǒm kántîk. Me n/chi n-tông eringe nyí me mu ne busa. 11Bamu ba-nam m byěm ḿbyí byi*da/byí chwǒm* ḿbyí byi/waa běn kyísí dyikáá. [Busun ejí mbu wǎ okwâ mú o/chi o-shí běn.] 12Ben ba/chi ba-sêe rugirugi wǎ aká nyí badasé kányí a-bírî éshíshě, ne wǎ ekwón nyí badashí e-bírî atông. 13Nang yeě mú mu fáráng ne mú mu tíbítíbí ojwo ńkyí me nn/chi, o-nyît o/fu, me mu ne busa.
14Banet-byibî ḿbé Záyon ba-kú ba-tím m banê ne bushî. Mbe ba-raa ng ba/fu, mpan mú Osówo mu wǎ okwâ mú odamang ne banyá. Onet mu kô mú odaman efem dyizong-okwâ ándyi? 15Onet o-man n efem â o/raa o-chi ńkyí nkyi ké bukwóp ḿbú bunong. *Dachi a-yip busa eyên a-ryí banet-kyikpu bampún* ne *dachi a-koo bangu*. *Dachi a-cibi ne banet ḿbé mbe ba-cibi ng ba/fu, mbé ba-ju ng banet* nang ḿbé ba/fu, mbé ba-chi i byibî-byěm*. 16Â a*da/chi éné* a/chi a-fem. Wo a/chi a-kyú afaníkong aa*chi* wǎ amu ké kyikit-dyirem ńkyí kii*nwa ebú*. Wo a/chi a-kyú ne byiryíng ḿbyí adaryí ne omu mú adajwáp.
Nkéré mú ké Kashú mú Bunyîn-Dyityém
17Ben ba/chi ba-chîri kiǐtí-otu mú mu o-tún n esí nyí e/tan abwô byicê byimúmú. 18Baa*ba/chi ba-chîzîim bushî enen ḿbú bacinbánet badakoo akpuga-dyishí* ne banet-boǒfêp-esí*. 19Baa*ri to ntông byiko-ocinónet mú odaraa oshê mú ben baa*jwo*. 20Tún n̂ Záyon mú mu oshê mú byimu byi-chi i ajî-byifen eten ba-ri. Ba-tún Jerúsélem ba-ri. O/chi o-kyú kyikit-dyirem ńkyí onet odakyú ké nkyí. O/chi o-kyú wǎ mpyep mú badabi ké byídí mú baa*zú kámú ne banyá* mú baa*zú byikwap emen* nang erí emen ee*kâa*. [ 21Óburúkpâbí o/chi o-tông bě busan emen ḿbú ragerage ányi. Be byi/chi byi-kyú ké bakô-buce ḿbú buryên, nké bǎnsukyíkang ḿbé banet-bushwôn eten baa*ba/chi ba-cen ké mbú*.] 22-23Kángkáng bubóng-bǎnsukyíkang ámbe mbu dyikáá. Byídí ebe bii*paam*. Byi/chi byi-koo kángkáng esang nyí basúja-banet-bushwôn eten ne esang ányi e/chi e-jê kanong kanong nyí nang bankwa ba/chi ba-já kyicê. Óburúkpâbí oyén o/chi o-kyú Otu eten. Nyǐ o/chi o-tún bě, o-ku bě ké afaníkong. 24Onet o*fí mú o/chi o-kyú ké esí eten* mú o/chi o-chîraa o/fu, nyǐ mu o-rwôm m* ne Osówo o/chi o-pwoo kángkáng banet ké byibî ebe.
Currently Selected:
Azáya 33: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
