Azáya 28
28
Osówo o/kuri Ézerel Ekó
1Ézerel e/firi ké busông. Busan emen ḿbú ragerage bu-kú bu-kpú u omu wǎ etam-ekong-byichí nyí bambwôm bato-banet-ashí badacít. Ashí ebe nyí badatông byiko nyi ne kyinung ńkyí kyinong, nké mbé bayén baa/myii eshwa. 2Óburúkpâbí mu ne onet mú mu o-shwane e ne busa mú oo/kpá byiko ḿbyí odakye kámbé bunwa, onet mú o/chi o-bâ wǎ abíp, wǎ omu mú oryên, wǎ kace ńké nke ka-sen n ochéé óchee, ńké kaa/sú ne busa, ne o/chi o-cít esí emúmú. 3Ba/chi ba-cím byiko etông ḿbyí bambwôm bato-banet-ashí ámbe ba-fé kyísí. 4Busan ḿbú ragerage ḿbú bu-kú bu-kpú u omu, ḿbú bantông byiko-banet-ashí ámbe bu/chi bu-rím wǎ bambwôp kashú-byirim-byichí ḿbyí â byi-bwam m byi-bâ, banet ba-bóng ba-ryí.
5Dyicí ndyi dyi-bâ ńdyí Óburúkpâbí mú o/rêe o-shwôm o/chi o-kyú etam-ekong-byichí nyí ragerage nyí banet emen ḿbé ba/chi ba-fem bukyû. 6Nyǐ o/chi o-tángê banet ḿbé mbe ba-pan n banet bampan bukwóp ḿbú baa*ryí acît* o-kye banet ḿbé mbe ba-bám m oshê busa eringe nyí baa*kye kámú bunwa*.
Azáya ne Bambwôm Bato-Bamkpábé ḿbé badasét Byiraa-Osówo ḿbé Júda
7Nang bamkpábé ḿbé badasét byiraa-Osówo ne banchi kyifen-Osówo mbe ba-bwóm m bato, ḿbé ba-kú ba-cíng ng. Baa/jwáp bato ḿbé baa/chi kámbé ba*fí to ba-nyît ng ńkyí badachi*. Bamkpábé ámbe mbe ba-jang ng ebwóm bato ḿbé ba*fí to ba-nyît ng dyishí kyi-kim ne byěm-akat ḿbyí Osówo mu o-twóm m* ne banchi kyifen-Osówo ámbe to mbe ba-jang ng ebwóm bato ḿbé ba*fí to ba-man n epan bampan ḿbé banet mbe ba-kó ng ké bushú ebe*. 8Ékpákpúrúk nyí mbe ba-kyú u e/firi éfâm éfam nang kaakit ńké nke ka-cé ng ka*fí to*.
9Mbé mbe ba-raa ng kyi-kim ne me. Mbe ba-raa ng ba/fu, onyinchéng mún o/kabe o/fu, nyǐ mu o-tángê e yeě. Yeě mu o-ryuu ng byiraa emen ḿbyí mu o-sét ng. Byiraa emen byi/kwárê ne boǒbwásíng ḿbú ba/byii kámbú abeabe. 10Nyǐ mu o-kan n o/fu, nyǐ o-tángê e bě ké ekap ké ekap, ké busáng ké busáng, ne ké kyipang ké kyipang.
11Â ben ba/fu, ben baa*jwo mě* Osówo kâng o/chi o-kúng bacinbánet ḿbé mbe ba-raa ng eshê nyí baa*jwo* ba-tángê běn dyishí. 12Osówo o/mû o/kye běn ben ashí amúmú dyijâng ne bunyîn-dyityém, nké ben ba/né ǎ ejwo. 13Nkyí nké Óburúkpâbí o/chi o-tángê běn ké ekap ké ekap, ké busáng ké busáng, ne ké kyipang ké kyipang. Ne ben kâng ba/chi ba-róng ké kyiká-bucen nang kyirá ńkyí ba/chi ba-kúng. Ba/chi ba-némê běn, ba-kám běn ba-dim ne ben wǎ básóng.
Kiǐtí-Buká ńkyí kyi/chi kyi-kyú ké Záyon
14Ben bantông byiko-banet ḿbé bamu ba-tún n oshê nyín ké Jerúsélem, fwôo n̂g atông kántîk ba-jwo ńkyí Óburúkpâbí mu o-sét ng. 15Ben bamu ba-nyîim m esim ba/fu, ben baa/ryí ocím ne bukyû ne oshê-bakúsí. Ben ba/firi dyityém dyibónge ba/fu, ké nkéré busông boo/bê, boo*ba/chi bu-ta běn* ké nǎ, ben bamu ba-jêem m esim ne byisédéng ne boǒnínǐm ba/fu, byi/chi byi-chi běn ba-fem. 16Ńkyí Óburúkpâbí mú mu Otu Kyítá mu o-raa ng kántîk nkyi něen. O/fu, nyǐ mu o-bi ng kiimkpet kyikû-ekpe ńkyí kyidashwane ké Záyon. Ké kiimkpet kyikû-ekpe ánkyi nyǐ mu o-fâ otyép-kiǐtí-buká ńkyí ba/sáng ké nkyí ba/fu, dyityém efé ne Osówo ńdyí ndyi shwanshwan dii*ju byiko*. 17Chwǒm esét dángdáng nké nyǐ mu o-kúng ng ne o-kan kyikit ńkyí ba/chi ba-bi kyikû-ekpe ánkyi, ne ntûntû nké nyǐ o/chi o-kúng ne o-bi kánkyí.
Abíp a/chi a-jwoo kángkáng byisédéng ḿbyí bamu ba-rem m ké mbyí, ne buce ḿbú budasú bu/chi bu-bên byikit-dyirem enen. 18N/chi m-bên ocím mú ben ba/ryí ne bukyû ne oshê-bakúsí. Â kyibî-busông kyi/bê, kyi/chi kyi-cít běn. 19Kyi/chi kyi-díp běn kyi-nye ng kyi-fâ kángkáng dyicófóróng. Kyi-kyú u běn ké byiko buchú ne esû. Kyitwóm ńkyí kyifyîfî ńkyí kyidafím ne Osówo nang kyirá kyi/chi kyi-bâ běn ne bushî. 20Ben ba/chi ba-kyú wǎ onet obónge mú dyitím-ekan dyi/fu, o/kan erí ké karíng ńké ka/jang ekímê ńké odanabe byiká ne ké kiǐmbim ńkyí kyi/jang esîi ńkyí kii*cít ǎ byiko*. 21Óburúkpâbí o/chi o-nwa bunwa wǎ eringe nyí o/nwa ké kaku ńké Perázim ne ké owo mú Gyíbya, eringe nyí odachi ńkyí nyǐ o/fu, nyǐ o-chi i, nang ké banet ba*fí ba-nyît ng kyi-kim ne ńkyí mu o-chi i*. Nyǐ o/chi o-man akat-bǎmkpóngé emen.
22*Da n̂g ejwó ekó nyí mu o-kuri ng běn*. Â ba/jwó, kyi/chi kyi-sóng běn kyi-shwôm ne ba-fem. Me nn/jwo okabe mú Óburúkpâbí mú mu Otu Kyítá mú o/rêe o-shwôm, mú o/fu, nyǐ o-bên n oshê omúmú.
Bubong ḿbú Osówo
23Jwo n̂g ńkyí me mu n-sét ng. Tî n̂g atông ba-jwo ńkyí me mu n-sét ng běn. 24Mkpang kyifát o*fí mú odawaa ké kyifát nkyí nkyi ekpang* o-bwât ng kánkyí eringe nyí odakwón byěm. 25Â o/man o-kpang kánkyí, o-kwón n byíkwôn ké nkyí wǎ ḿbyí badakó dîl ne kúmin. O-kwón n to byíkwôn byikíri wǎ wît ne bályi ne byikíri to ké otáng-bukô. 26Nyǐ mu o-nyît ng eringe nyí odachi bǎmkpóngé emen, ké nǎ, Osówo oo/tángê ǎ. 27Oo*man ekúng ochí mú oryên o-kim biintaa-esang-byichí o-fîm esang* o-kúng ng ochí mú oo*ró* mú o/kwárê. 28Oo*kim esang-byichí eringe nyí edabên* ne o-nyît ng eringe nyí odakim kányí, oo*bên esang eyén*. 29Byinyídíng ḿbyín kángkáng byi/fím ne Óburúkpâbí mú o/rêe o-shwôm. Osówo o-kabe ng byěm-bubong, ne kángkáng nkéré byi-câ kanong.
Currently Selected:
Azáya 28: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
