Azáya 26

Osówo o/chi o-chi Banet Emen ba-kpógê

1Dyicí ndyi dyi-bâ ńdyí banet ba/chi ba-kwán okwan mún ké esí nyí Júda ba/fu,

oshê eten mu ne busa.

Osówo oyén nké mu o-ku ng kámú.

2Bâa n̂g afyi nyí oshê,

ba-mîng oshê mú o/fé dyityém ne nyǐ o-nung,

oshê mú mu o-chi i ńkyí nkyi kanong.

3Wo, ǎ Óburúkpâbí, amu a-kyâ banet ḿbé mbe ba-tî ng okabe ebe kíngkíng kiǐtí-bunyîn,

ké nǎ, mbé ba/fé dyityém ne wo.

4Fé n̂g dyityém ne Óburúkpâbí kángkáng nkéré.

Nyǐ mu o-ku ng bě kángkáng nkéré.

5Nyǐ oo/bwa ne banet kyísí ḿbé ba/mû ba-tông ng byiko,

o-bên oshê-busa mú ba/mû ba-kyú u ké mǔ,

o-bú ekpe ebe e-ba-nung ké édúkǎndú.

6Banet ḿbé mbé ba/mû ba-cít ng kámbé ba-kú ba-cen n kyíbóng-ekpe ányi kántîk,

ba-cím m kányí ké byiká.

7Óburúkpâbí, wo amu a-chi i kiǐfáng ńkyí gogégogé a-tî banet ḿbé banong.

Bukwóp ḿbú mbé mbe ba-cen n mbu taretare.

8Be byimu byi-câ ké kiǐfáng ńkyí okabe eyên,

ne byimu byi-fâ atyém eten ké wo.

Wo nké amu kángkáng ńkyí byimu byi-ryuu ng.

9Me mu n-ryuu ng ǒ ne dyityém ejí kángkáng ne buchú.

Ké nkéré mú wo a/chi a-pan banet-ejíí mpan,

mbé kángkáng ba/chi ba-nyît eringe nyí mpan

mú baa*ryí acît* mu.

10Nang ké wo a/cángê dyityém ne bambên atyém,

mbé ba*fí ba-kan n ba/fu,

mbé ba-chi i ńkyí nkyi kanong*.

Nang nyín ké esí nyí banet ḿbé mbe ba-chi i kanong,

mbé ba/tôong ba-chi i byibî.

Ba*fí ba-kúng ng ǒ ba/fu,

wo amu kiǐtí*.

11Banet-bushwôn eyên ba*fí ba-nyît ng ba/fu,

wo a-kyâ kámbé busông*.

Óburúkpâbí, fé kámbé éshwân a-mîng kámbé ba-ri busông.

Mîng kámbé ba-ri busông ḿbú aa/tî kámbé.

Tông kámbé eringe nyí banet eyên mbe ba-jê ng ǒ.

12Óburúkpâbí, wo a/chi a-kye bě kanong.

[Kángkáng byěm ḿbyí byimu byi-já ng mbyi byi-fím m ké abwô eyên.]

13Óburúkpâbí mú mu Osówo eten,

be bii/kyú ké abwô nyí banet bakíri,

nké wo kǎnchí nké amu Óburúkpâbí eten.

14Kántîk, mbé baa/kpú ne baa*ba/chi ba-chîkpen*.

Mbé baa*byí wǎ bakúsí*

ké nǎ, wo aa/kye kámbé busông, a-ju kámbé.

Onet o*fí mú o/tôong o-zîim m kámbé*.

15Óburúkpâbí, wo aa/chi oshê eten o-kán,

a-chi kámú o-nere byicê byimúmú,

ne ńkyín kii/bê ǒ ne ofê.

[ 16Óburúkpâbí, wo a/kye banet eyên busông,

ne ké bafip, mbé ba/fé nshwam ba-kye ǒ.]

17Wo, ǎ Óburúkpâbí, aa/chi bě byi-tii,

wǎ eringe nyí onyinyi mú bufwon buda ǎ enwa odatii bubân.

18Be byi/mû ké bubân ne bafip,

nké byi*da/fwon wǎn*.

[Be byi*da/kpógê ne byití ké esí eten*.

Be byi*da/chi ne chwǒm ńkyí kyinong nang kyibónge*.]

19Banet eten ḿbé baa/kpú ba/chi ba-chîkpen.

Byikwóm-enyam-byiko ebe byi/chi byi-chîbwa ké dyikpen.

Kángkáng banet ḿbé mbe ba-rê ng ké akun ebe

ba/chi ba-jwóbê ba-kwán ekwan ké bunyîn-dyityém.

Eringe nyí kyibû nkyi kyi-chi i esí e-chee,

éné to nké Óburúkpâbí o/chi o-chi banet ḿbé baa/kpú ka-bwon ba-bwa ké dyikpen.

Mpan epan ne Byěm enap

20Banet ejí, nung n̂g ké byise enen, ba-fín afyi ba-círing byiko. Rem m̂ ké kaǎnyín-nkéré, tete kafâ ńké nke ka-sa ng Osówo ka-man. 21Óburúkpâbí mu o-fím m ké kyikit emen ńkyí mu o-kyú u kyíbóng o-ba-kye banet ḿbé ké ejíí busông ké bubwô-byibî ebe. Banet eju ḿbé ba/ju ké ejíí ké kadip, kyi/chi kyi-byí kyíjí, ne esí ee*ba/chi e-chîcít banet ḿbé ba/ju kámbé*.

Currently Selected:

Azáya 26: BKY

Highlight

Copy

Compare