Azáya 21
21
Chwǒm-Akat kyi-kim ne Orông mú Bábyílon
1Nyín kyitwóm ńkyí Óburúkpâbí o/twóm mě kyi-kim ne Bábyílon.
Busông bu/chi bu-fím ké kyibî-esí bu-bâ wǎ bufú ḿbú budawáp kerékeré ké kyikim-dyikán. 2Me nn/ri chwǒm-akat kyi-kim ne byibî-byěm, chwǒm-akat kyi-kim ne banet enîm ne byěm ebên.
Basúja ḿbé Élam, kye n̂g bunwa. Basúja ḿbé Médya, wâng n̂g eshê ba-fé ké kafâ. Osówo o/chi o-man ne busông ḿbú Bábyílon o/bê ne mbú.
3Ńkyí me n/ri ne n-jwo to ké akat ányi kii/fé mě byishî ké byiko ne bubân, bubân wǎ ḿbú onyinyi mú bufwon mbu bu-nwa ng ǎ. 4Dyishí ejí dyi/firi mě byiryibyiryi, ne mu n-tím m banê ké bushî. Me m/mû mu n-tî ng achi n/fu, dyikurúku dyifyi, nké dyi*da mě ebê ne chwǒm kyikíri* kyi-cibi ne bushî*.
5Ké akat ányi, ba/tî byiryíng ḿbyí dyijî ḿbyí baa/rám, ba-tî byikit ḿbyí banet ḿbé ba/kó kámbé ké dyijî badakyú me. Banet mbe ba-ryí i byiryíng, ba-jwáp ng bato. Ké abe ányi, ejá e-kye busa e/fu, banet-ashí-basúja, kpá n̂g byiko ne édem enen.
6Ne Óburúkpâbí o-raa kâng ne me o/fu, ca a-da-tî onet-mbâm, a-sét ǎ o-kûsét ńkyí o/ri. 7Â onet ámu o/ri banet mbe ba-yú u bubyî-orá ba-bâ ashí afee afee ne banet to ḿbé mbe ba-yú u ké boonyam-atû, okpúrî kámbé kanong kanong.
8Onet-mbâm ámu o-kó mě o/fu, bonchí, me mu m-bám m ké kyikit ńkyí a/tî mě buchú ne esû.
9Kántîk, banet ḿbé ba/yú ké bubyî-orá ashí afee afee ba-kú ba-bâ. Onet-mbâm ámu o-raa o-sét o/fu, Bábyílon oo/róng. Kángkáng erím-bakye nyí ba/mû ba-sháng ng, baa/shiryi kányí kyísí.
10Banet ejí ḿbé Ézerel, ben baa/cím běn wǎ eringe nyí badacím esang-byichí ba-fîm esang emen, nké kántîk, me nn/sét běn bǎmpém ḿbé banong ḿbé me nn/jwo ne Óburúkpâbí mú o/rêe o-shwôm, mú mu Osówo mú Ézerel.
Kyitwóm kyi-kim ne Édom
11Nyín kyitwóm ńkyí Óburúkpâbí o/twóm mě kyi-kim ne Édom.
Onet obónge o/bwom ké Édom o-kó mě o/fu, onet-mbâm, ka-chî ng ebwon nǎ ne dyicófóróng dyi-cé. Sét mě nkéré mú dyi/chi dyi-cé.
12Me n-faa n-fu, dyicófóróng dyi-kú dyi-bâ, nké buchú bu/chi bu-chîjí. Â amu a-ryuu ng a/fu, a-chî ng ebí, bwa esim a-ba-bí.
Kyitwóm kyi-kim ne Arébya
13Nyín kyitwóm ńkyí Óburúkpâbí o/twóm mě kyi-kim ne Arébya.
Ben banet ḿbé Dyídan, ḿbé bancen ne boonyam-atû enen, ḿbé badabi boompyep ké esí nyí Arébya nyí ee*bát byiryíng*. 14Kye n̂g banet ḿbé omu mu o-jê ng kámbé ba-jwáp, ḿbé mbe ba-bâ ba-kâm běn. Ben banet ḿbé ké esí nyí Téma, kye n̂g banet ḿbé ba/chêe ké byití byiryíng. 15Banet mbe ba-chêe ng eringe nyí badafem bushwám ḿbú bu/fu, mbú bu-ju ng kámbé, ba-chêe ng abán nyí aa/kpá byiko ḿbyí adaché, ba-chêe ng kángkáng afaníkong nyí byití.
16Ne Óburúkpâbí o-sét mě kâng o/fu, ké dyije dyibónge kerededet, busa ḿbú banet ḿbé Kéda bu/chi bu-man. 17Banet ḿbé mbe ba-châ abán nké mbe banet ḿbé mbe ba-kán n ba-shwôm ké Kéda, nké boǒnyín-banet ké burwám ebe nké ba/chi ba-waa. Me Osówo Óburúkpâbí mú Ézerel nké n/raa.
Currently Selected:
Azáya 21: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
