Galíshan 5
5
Kyú n̂g wǎ eringe nyí bamu ké Byiko Enen
1Okyû ké byiko eten nké mu chwǒm ńkyí byimu ne nkyí. Karâs oo/chi bě byi-firi ké byiko eten. Bwom m̂ kâng wǎ banet ḿbé mbe ké byiko ebe. *Da n̂g echi ba-bírî ba-chîfiri básóng*.
2Fwôo n̂g atông ba-jwo, me Pôl nké mu n-sét ng běn ńkyín. Â ba/mîng banet ba-cên běn, ányi kyi/byí, Karâs o*da běn ebyí wǎ onet nang kaǎnyín*. 3Me mu n-chî ng ekuri nang yeě mú mu o-bángê e o/fu, bacên ǎ ekó n/fu, onet ámu o-man o-chi ńkyí kángkáng Byije-Músis byi/sét. 4Ben mú bamu ba-ryuu ng ba/fu, Osówo okét mpan o-nwa běn ké byěm echi ḿbyí Byije-Músis byi/sét, baa/fîm byiko enen ké ocibi ne Karâs. Ben baa/byí ba-mîng ochwâp mú Osówo. 5Kyi-kim ne be, achi eten etî nyi něen a/fu, Osówo o/chi o-két mpan o-nwa bě, ne ńkyín nké byimu byi-bám m ké busa ḿbú Busun-Osówo ḿbú mbu bu-chi i bǎmkpóngé ké bubwô-dyityém eten ńdyí byi/fé ne Karâs. 6Ké ebóng, â be byimu ké ocibi ne Jisos Karâs, nang byi/cên, nang byi*da/cên* kyi*da/yángê nang kaǎnyín*. Ńkyí nkyi kiǐtí, ányi dyityém efé ne Karâs ńdyí ndyi dyi-chi i bǎmkpóngé ké bubwô ḿbú kyijé.
7Ben ba/mû ba-chi i byěm kanong kanong. Yeě o/chi běn ba-mîng echi ńkyí ntûntû o/sét. Onet ámu o/cen nǎ ne o-tírîng běn. 8*Chí Osówo mú mu o-kó ng běn nké o/chi kánkyí*. 9Nkyi wǎ eringe nyí banet mbe ba-raa ng ba/fu, kaǎnyín-bukye kaǎníngéníngê nké badafé ké berêt ne ka-chi kyirim-berêt kyimúmú kyi-mut. 10Nké me n/tôong n-tî ng dyityém ne ben. Ocibi eten ne Otu Kyítá mu o-chi i mě n-tî dyityém n/fu, ben baa*ba/chi ba-yángê ba-firi ne okabe okíri* ne onet mú mu o-chi i atyém enen a-firi yógeyóge, nang mu ebóng dyizong-onet, Osówo o/chi o-kye ǎ busông.
11Nké kyi-kim ne me, ǎ bwǎn-bané ejí, ebóng banet ba/tôong ba-kyâ mě busông, â mu n-sét ng banet n-câ n/fu, kyi-nwa ng ńkyí badacên. Â ńkyín kyi/mû ké kafâ, byiraa ejí kâng ḿbyí mu n-sét ng banet kyi-kim ne kyikwap ńkyí ba/shwân Karâs ké nkyí kyi/mû kii*ba/chi kyi-bâ ne afaníkong*. 12Kyi/mû kyi/chi kyi-nyîn mě, â banet ḿbé mbe ba-chi i atyém enen a-firi yógeyóge ba/mû ba/chi ba-shwôm dyicên ńdyí mbe ba-sét ng, ba-ca kashú ba-pê byiko ebe.
13Kyi-kim ne ben, ǎ bwǎn-bané ejí, Osówo oo/kó běn o/fu, ben bakyú ké byiko enen. Nké *da n̂g ekúng búsóng ḿbú baa/fem ké mbú bu-firi mpât mú badakye byěm ḿbyí enyam-byiko enen nyi e-ryuu ng*. Nké mîng n̂g kyijé kyi-chi běn ba-firi wǎ bǎmgbán ne barî. 14Ké nǎ, kángkáng Byije-Músis byi/jêem esim ké kyije kyibónge ńkyí kyi/fu, orî-onet ojê ǒ wǎ eringe nyí enyam-byiko eyên nyi e-jê ng ǒ. 15Nké â ben bamu ba-jwóm m barî asháng ké byiko wǎ enyam, ba-némê e barî, bám m̂ byiko enen. Â kyi*fí éné* ba/chi ba-ju barî kángkáng.
Busun-Osówo ne ńkyí Byibî-Atyém Enen nyi a-ryuu ng
16Ńkyí mu n-sét ng běn nkyi něen, mîng n̂g Busun-Osówo bu-kû běn etông eringe nyí badakyú akpen enen. Nké *da n̂g echi ba-chi ńkyí byibî-atyém enen nyi a-ryuu ng*. 17Ké ebóng, ńkyí byibî-atyém eten byidaryuu kii*nyîn Busun-Osówo*. Ne ńkyí Busun-Osówo to budaryuu kii*nyîn byibî-atyém eten*. Byěm ḿbyín byifee bii*kwárê ne barî*. Ne ńkyín kyi/byí kyi/fu, ben baa*man echi ńkyí bamu ba-ryuu ng ba/fu, ba-chi i*. 18Â Busun-Osówo nké mbu bu-tông ng běn kiǐfáng, Byije-Músis bii*kám běn*.
19Ńkyí byibî-atyém eten byidachi nkyi gbúúl. Kyi-tông ng byiko emen ké byibî-byěm echi ne ne banet erí byiryibyiryi ne byibî-acáá echi 20ne bakye esháng ne ekpábé echi ne ashwôn eshwôn ne anwa enwa ne achi etî ké byěm-banet ne kafâ esa ne kanim enim ne barî-banet epap 21ne omiríng etî ké byěm-banet ne bato ebwóm ne enyam-byiryíng eryí ne azong-byěm echi to akíri wǎ ńnyín. Me mu n-kuri ng běn ekó kántîk wǎ eringe nyí m/mû nn/kuri běn n/fu, banet ḿbé mbe ba-chi i azong-byěm ńnyín baa*ba/chi ba-nung ké Butu ḿbú Osówo*.
22Nké Busun-Osówo bu-kyâ kyijé ne bunyîn-dyityém ne kanong ekyú ne barî ne ofit eryí ne dyityém ecángê ne kanong echi ne dyityém efé ne barî 23ne byiko ejwâa kyísí ne dyityém eyên eníbî. Kyije kyi*fí ńkyí kyi/ciring azong-byěm wǎ ńnyín*. 24Ne banet ḿbé ba/já Jisos Karâs baa/mîng byěm ḿbyí byibî-atyém ebe nyi a-ryuu ng, cibicibi ne kángkáng ekabe nyí nyi e-tírîng ng bě byi-chi byibî. 25Busun-Osówo boo/kye bě dyikpen. Mbú to bu-man bu-tông akpen eten kiǐfáng. 26Be bii*man byi-kûtông byiko* byi-chi nang barî-banet ba-kûsa kafâ* byi-kyú nang ne orêm ne barî*.
Currently Selected:
Galíshan 5: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
