Ézódos 15
15
Okwan mú Músis o/kwán
1Ne Músis ne banet ḿbé Ézerel kâng ba-kwán okwan mún ba-kye Óburúkpâbí ba/fu,
me n/chi n-kwán okwan n-kye Óburúkpâbí,
ké nǎ, oo/kpógê kiǐtí-dyikpóge.
Oo/yip bubyî-orá ne banet ḿbé mbe ba-yú u kámbú o-twóp ké kafâ-baya.
2Óburúkpâbí o-chi i okân-onet-onyii ejí.
Nyǐ nké oo/nyii mě.
Nyǐ o-chi i Osówo ejí, ne n/chi n-kye ǎ akpee.
O-chi i Osówo mú bonchí ejí,
ne n/chi n-kwán kyi-kim ne eringe nyí nyǐ mu kiǐtí.
3Óburúkpâbí o-kán n byití.
Dyizîn emen dyi-bángê e Óburúkpâbí.
4O/yip basúja ḿbé Éjip ne bamútu ebe ḿbé bubyî-orá budatut o-twóp ké kafâ-baya.
Banet-ashí-basúja ḿbé badakán byití ba-shwôm ké Éjip ba/jé ké baya ḿbé Rêt.
5Kiǐríbíríbí-baya kyi/cít kámbé,
ba-shû ba-jâ kyísí wǎ buká.
6Busa ḿbú bubwô-etyebéng eyên,
ǎ Óburúkpâbí, mbu bu-chi i bushî.
Mbu bu-sé ng banet-bushwôn eyên rugirugi.
7Wo a-yip ng busa ḿbú otu odakpógê banet a-kpógê banet-bushwôn eyên.
Busa-dyityém eyên mbu bu-mang ng wǎ okwâ,
bu-shí i kámbé wǎ biǐbyâa.
8Wo a/tuu bufú ké baya ne kace ba-bwom dyibwôm.
Ka-bûu ka-bwom kyíbóng wǎ ekpe-kyise,
kyikit-kace ńkyí kyi/ríbî kyi-shwôm kyi-jwóm.
9Onet-bushwôn eten o-raa o/fu, n-rim m ne mbé ké kyikû, n-kám kámbé.
N/chi n-kyii esang ebe, n-koo ńkyí mu n-ryuu ng.
N/chi n-zú kashwám ejí n-koo kángkáng byěm ḿbyí mbe ne mbyí.
10Nké wo a/shû kiǐnjáng kabónge, ǎ Óburúkpâbí,
banet ḿbé Éjip ba-jâ ké kace.
Ba/ríbî ba-jâ ké kyibî-kace wǎ kiǐré.
11Óburúkpâbí, Osówo o*fí mú mu wǎ wo*.
Onet o*fí mú mu kanong wǎ wo*.
Onet o*fí mú odachi akat ne biǐtí-byěm wǎ ḿbyí eyên*.
12Wo a/nabe bubwô-etyebéng eyên esí e-kúng banet-bushwôn eten e-myii.
13Wo a/tî ocím eyên mú a/ryí a-sí banet ḿbé aa/nyii kámbé.
Aa/kúng busa eyên a-bám kámbé ba-ribi ké esí-ociring eyên.
14Eshê ee/jwo, ne e-kú e-tím m banê ké bushî.
Bushî boo/róng banet ḿbé Fyilíta.
15Banet-ashí ḿbé Édom ba-kú ba-shî ng.
Biǐtí-banet ḿbyí Mówep byi-kú byi-tím m banê.
Busa boo/man banet ḿbé Kínan.
16Bushî boo/róng kámbé ké byiko.
Mbe ba-ri ng busa eyên, ǎ Óburúkpâbí,
ne bushî boo/róng kámbé ba*fí to ba-nyît ng ńkyí badachi*
tete banet eyên ba-cen ba-shwôm kámbé,
banet ḿbé wo a/fîm kámbé ké búsóng.
17Wo amu a-bâ ne mbé a-ba-tî kámbé ké kaku eyên,
ké kyikit ńkyí wo, ǎ Óburúkpâbí, aa/cá a/fu, kyikyú oshê eyên,
kiǐtí-kyise-kyifen echi ńkyí wo oyén aa/bi.
18Wo, ǎ Óburúkpâbí, nké a/chi a-kyú Otu mú o/chi o-waa ne banyá.
Okwan mú Myíryam o/kwán
19Banet ḿbé Ézerel ba/nyáng baya ké esí nyí jwómjwóm. Nké ké nkéré mú bamútu ḿbé Éjip, ḿbé bubyî-orá budatut ne bubyî-orá ebe ne banet ḿbé mbe ba-tut ng kámbé ba/nung ké baya, Óburúkpâbí o/bwa ne kace esim ka-cít kámbé.
20Myíryam mú wǎn-boné-Éron mú onyinyi, mú o/mû mkpábé mú odasét byiraa-Osówo o/kúng byícícágé emen ne kángkáng banyinyi ba-dim ne nyǐ ké kyikû, ba-kim m byícícágé ba-ne ng ane. 21Myíryam o/kwán kámbé okwan o/fu,
kwán n̂ okwan ba-kye Óburúkpâbí, ké nǎ, oo/kpógê kiǐtí-kyikpóge.
Oo/yip bubyî-orá ne banet ḿbé mbe ba-yú u kámbú o-twóp ké baya.
Omu mú mu o-ruu ng
22Ne Músis o-dim ké baya ḿbé Rêt, o-tông banet ḿbé Ézerel kiǐfáng ba-ribi ké kyikim-dyikán ńkyí Shû. Ba/cen ké kyikim-dyikán ándyi ké ací achât, ba*da/ri omu*. 23Ne ba-ba-ribi ké kyikit ńkyí badakó Mára, nké omu mú o/mû ké kyikit ánkyi o/mû o-jang ng eruu mú o*fí o-nwa ng ejwáp*. Nkyí nké ba/mû ba-kó ng kyikit ánkyi Mára. 24Banet ḿbé Ézerel ba-kûshwôn ne Músis, ba-bí ǎ ba/fu, be byi-jwáp ng ebóng. 25Músis o/fé nshwam o-tii o-kó Óburúkpâbí, ne Óburúkpâbí o-tông ǎ kaǎcê-kyichí ńké o/yip o-twóp ké kafâ-kace, ne omu ámu o-firi mú badajwáp.
Ké kyikit ánkyi nké Óburúkpâbí o/kye kámbé byije ḿbyí badakûbám byiko ebe, ne ányi to nké o/kan kámbé 26o/fu, â ben ba/chi ba-chi kángkáng byěm ḿbyí me n/kabe n/fu, mbyi kanong, ba-tî to byije ejí, mm*ba/chi n-kye běn busông nang bubónge* ḿbú n/kye banet ḿbé Éjip*. Me n-chi i Óburúkpâbí mú mu o-chi i byirwóm enen byi-man.
27Ne ba-dim ányi ba-ribi ké Élim, ké kyikit ńkyí kyi/mû ne ajwáng diǐkpú ne afee ne bajam-bayêp bachât esim diǐkpú. Ányi nké ba/bi oshê ebe.
Currently Selected:
Ézódos 15: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
