Ekyilyizátes 7
7
Ekabe kyi-kim ne Dyikpen
1Dyizîn ńdyí dyinong dyi-nwa ng dyi-shwôm bakút-kyinung ḿbé badashwane kasî, ne dyicí ńdyí adakpú dyi-nwa ng dyi-shwôm dyicí ńdyí ba/fwon ǒ.
2Nkyi kanong ńkyí adajé ké kyibám ńkyí mbe ba-tii ng bukyû kyi-shwôm ńkyí adajé ké ńkyí mbe ba-chi i dyijî, ké nǎ, banet bakpó bakûzîim kángkáng nkéré ba/fu, bukyû mbu bu-bwom m bě kángkáng.
3Bafip ba-nwa ng ba-shwôm éjwô ejwó. Bafip ba-man n echi kashú eyên ka-bên, nké ba-bâa ng bubong eyên.
4Onet mú mu o-kabe ng kángkáng nkéré kyi-kim ne bunyîn-dyityém o-chi i enyam-onet. Onet mú mu ne bubong o-kabe ng kyi-kim ne bukyû.
5Kyi-nwa ng ńkyí banet ḿbé mbe ne bubong badaraa ne wo kyi-shwôm ńkyí enyam-banet bada ǒ ekwán ekwan-akpee.
6Ké nkéré enyam-onet e-kú e-jwó ng éjwô, nkyi wǎ byiwong nké mbyi byi-shí i ké okwâ. Kyi*da/byí chwǒm*.
7Ké nkéré onet-bubong oo/ryí onet mpún, nyǐ mu o-chi i wǎ enyam-onet. Â a/koo ngu, a/bên dyityém eyên.
8Nkuli kyikû-chwǒm mu kanong o-shwôm kiimkpet kyikû emen. Dyityém ecíp ndyi kanong dyi-shwôm akpee ekyé.
9Kám kiikuku eyên. Nkyi enyam ńkyí adakyú ké busa-dyityém ne onet.
10*Dachi a-bí a/fu, ebóng ńkyí byěm byi/mû kanong ké ací nyí a/shwôm ké esim*. Ḿbím mún, *chí ḿbím mú onet-bubong*.
11Kyi-nwa ng ńkyí nang yeě mú mu o-kpen n odakyú ne bubong. Kyi-nwa ng wǎ chwǒm ńkyí adaryí bukyû, 12ne kyi-chwáp ng ǒ ké byěm wǎ eringe nyí akpuga ada ǒ echwáp. Bubong boo*bángê chwǒm kyi-ta ǒ*. Kanong ńké byinyídíng něen.
13Kabe kyi-kim ne ńkyí Osówo oo/chi. Onet o-cen n nǎ ne o-nabe ńkyí Osówo o/chi kyi-kyú kwǎt. 14Kyú ké bunyîn-dyityém ké nkéré byěm byi-kú byi-câ kanong ne wo, nké zîim ké nkéré afaníkong aa/bê, a/fu, Osówo mu o-twóm m bunyîn-dyityém ne afaníkong cibicibi. [Aa*tigi a-nyît ńkyí kyi/chi kyi-chi ké nkéré mú mu o-bâ*.]
15Dyikpen ejí dii/waa dyikáá, nké nn/ri kángkáng byěm ké ndyí. Onet mú onong o-man n ekpú, onet okíri o-kpen n o-câ kashú, nang mu nchi byibî. 16Ké bubwô ámbu, *dajang ekyú kanong* nang ne bubong*. Ebóng ńkyí adaju byiko eyên. 17Nké *dajang ebên dyityém* nang enyam eróng*. Ebóng ńkyí wo adakpú ne nkéré eyên o-kûfyi. 18*Dakúng kyibî-bukwóp nang kyirá*. Â wo amu a-shî ng Osówo, kyi/chi kyi-nwa kyi-kye ǒ.
19Bubong bu-chwáp ng onet bu-shwôm ochwâp mú batu diǐkpú badakye oshê.
20Onet o*fí ké ejíí mú mu o-chi i ńkyí nkyi kanong kángkáng nkéré* oo*róng*.
21*Datî atông ké kángkáng byěm ḿbyí banet mbe ba-raa ng* ké nǎ, a-man n ejwo ḿgbán eyên ké mu o-shú u ǒ, 22ne amu a-nyît ng wo oyén a/fu, wo aa/shú banet bakíri kampén chwóó.
23Me n/kúng bubong ejí n-kan ḿbyín kángkáng. Me m/mû n/tigi ne dyityém ejí n/fu, n-kyú u ne bubong, nké kyi/shwôm mě. 24Onet o-cen n nǎ ne o-nyît kyikû ńkyí dyikpen. Kyi/tíbî bě kyi-shwôm. Kyi-sóng ng enyît kyi-shwôm. 25Me n/kúng nkéré ejí kángkáng n-tî ké bubong ne byěm ekwâa. Me m/mû n/tigi ne dyityém ejí n/fu, n-kyé ng bubong ne dyishí-bǎmbím ejí, n-kwâa to eringe nyí enyam eróng e/bên.
26Me n/ri chwǒm ńkyí kyi/bên kyi-shwôm bukyû. Chwǒm ánkyi onyinyi. Kyijé ńkyí onyinyi oda ǒ etông kyi-kám m ǒ wǎ kaǎtám, kakíri wǎ kaǎsém, ne abwô emen nyí oda ǒ ekpárê a-kám m ǒ wǎ bamgbokobá. Onet mú mu o-chi i ńkyí kyidanyîn Osówo o-fem m, nké mú onyinyi o-kám m nchi byibî. 27Onet mú o/kwâa byiraa-bubong o/fu, me n/kyé ńkyín n-ri kaǎnyín kaǎnyín, ké nkéré mu n-kyé ng bukwóp ḿbú ndafaa bǎmbím ejí. 28Me nn/kyé ojá okíri mú ndafaa, nké n*da/ri nang obónge*. Me n/ri onyinchéng obónge ké égot-banet etánge mú nda ǎ eman ekye ofê, nké *chí onyinyi*. 29Ḿbyí me nn/kwâa kángkáng mbyi něen n/fu, Osówo o/chi onet ne dyityém wááng, nké bii/chi kándyí dyi-firi yógeyóge.
Currently Selected:
Ekyilyizátes 7: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
