Ekyilyizátes 6
6
1Me nn/ri ké ejíí ńnyín n/fu, baa/chi kiǐtí-kyibî. 2Osówo mu o-kyâ onet okíri esang ne ofê ne byěm ne kángkáng byěm ḿbyí mu o-ryuu ng, nké oo*mîng ǎ o-ryí kámbyí*. Ocinónet okíri nké o/chi o-bwa o-ryí kámbyí. Ńkyín kyi*da/byí chwǒm* ne kyi*fí dángdáng*. 3Onet o-man n ekyú ne bajam-bwǎn batánge o-kpen chwóó, nké nang o-bwa o-kpen ka-rí nǎ, â o*da/já bunyîn-dyityém ḿbú emen* ne ba*da ǎ echi bukyû kanong kanong* me n-fu ng n/fu, kyi/nwa ne wǎn-ojújwô mú ba/fwon ǎ o-kpú kyi-shwôm. 4Kii*chwáp wǎn ámu* ńkyí bada ǎ efwon*. O-rím ké kyifip ké kyikit ńkyí baa*zîim ǎ to*. 5Oo*ri kiinwángé ńkyí esû* o-nyît nang eringe nyí dyikpen ndyi* nké nang nkyi éné, oo/já kyikit-dyijâng 6o-shwôm onet mú o*da/ri ne bunyîn-dyityém ké dyikpen emen* nang o/rí égot-aje*. Ké nǎ, mbé mbe ba-jâ kyikit kyibónge.
7Onet mu o-chi i bǎmkpóngé emen kángkáng eringe nyí odajá chwǒm ńkyí odaryí, nké oo*já kyi-kwárê ǎ*. 8Onet mú mu ne bubong o/shwôm enyam-onet ké ebóng. Onet-kyikpu o-ri ng ebóng kanong â o/nyît eringe nyí odakyú ké dyikpen. 9Ńkyín kyi*da/byí chwǒm*. Nkyi wǎ amu a-nwa ng ne bufú ekám. Kyi-nwa ng ńkyí chwǒm ńkyí amu ne nkyí kyida ǒ ekwárê kyi-shwôm ńkyí kángkáng nkéré adaryuu chwǒm.
10Nang ebóng ńkyí nkyi kyi-chi i, Osówo o/mû oo/tî ké aje nyí a/shwôm ké esim o/fu, kyichi, [ne be kángkáng byimu byi-nyît ng byi/fu, onet] oo*man ekán ké dyishí ne onet mú mu o-shwane e o-shwôm ǎ*. 11Okân ké dyishí eyên oo*byí chwǒm* â amu a-kán n ké dyishí a-câ kashú* ne kii*bwa kyi-nwa ne wo kyi-shwôm*. 12Onet o-cen n nǎ ne o-nyît ńkyí kyi/nwa ne onet kyi-shwôm ké kaǎkím-dyikpen ńdyín ńdyí dyi*da/byí chwǒm* dyikpen ńdyí ndyi dyi-rím m wǎ kiǐríribí. Onet o-cen n nǎ ne o-nyît ńkyí kyi/chi kyi-chi ké ejíí ké nkéré nyǐ oo/kpú.
Currently Selected:
Ekyilyizátes 6: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
