Kolóshan 4
4
1Banchí-básóng, kû n̂g etî básóng enen ké bukwóp ḿbú bunong. Zîim m̂ ba/fu, ben to bamu ne Bonchí kyíbóng.
Bacê
2Kû n̂g efé nshwam kángkáng nkéré, ne bám m̂ byiko enen ké nkéré mú ba-kú ba-fâ nshwam ba-kó ng Osówo asǎma. 3Fé n̂g nshwam ba-kye Osówo ké bubwô eten to eringe nyí oda bě ekye mpât mú onong mú byidasét kyitwóm emen, byi-sét ntûntû kyi-kim ne Karâs, mú o/mû ké kafâ-dyityém-Osówo. Ké nǎ, ké bubwô ámbu nké me mu ké mgbokobá. 4Fé n̂g nshwam kâng, eringe nyí adaraa ké bukwóp ḿbú ndachi kánkyí kyi-kyú wááng wǎ eringe nyí m/mû n/chi n-raa.
5Kyú n̂g ne bubong ké édúú enen ne banet ḿbé ba*fí banet ḿbé ba/bángê ké Karâs* ba*dabên mpât nang orá mú bamu ne mǔ*. 6Byiraa enen ḿbyí bamu ba-sét ng byikyú kanong ne bunyîn-ejá ne ben ba-man ba-nyît eringe nyí badafaa nang yeě ḿbím ké bukwóp ḿbú ntûntû.
Nkuli Kyikû-Kyiraa eta
7Tyíkyíkus mú wǎn-boné eten mú dyityém ne óten-ḿgbán mú o/fé dyityém ké bǎmkpóngé ḿbé Otu Kyítá o/chi o-sét běn kángkáng bǎmpém kyi-kim ne me. 8Ké bubwô ámbu nké mu n-twóm m ǎ o-kâm běn, o-sét běn eringe nyí be kángkáng kwán byimu, eringe odachi dyityém dyi-nyîn běn. 9Onézyímus mú wǎn-boné eten mú dyityém, mú mu ne ofê-onet ne mú mu ké burwám eten mu o-bâ ne nyǐ ké kyikû. Mbé ba/chi ba-sét běn kyi-kim ne kángkáng byěm ḿbyí mbyi byi-chi i kwán.
10Aryisatákus mú mu ké mgbokobá ne me o/ta běn kyiraa. Mâk mú wǎn-boné-Bánábas o/ta běn to kyiraa. Ben baa/kye běn bacê kyi-kim ne nyǐ, eringe nyí ben ba/chi ba-koo ǎ kanong, â o/bê o-kâm běn. 11Jóshwa mú mu o-bángê e Júsútus o/ta běn kyiraa to. Banet-Jûs ḿbén ashí achât nké nke baa/yángê ba-nung ké ékwâbashi nyí Karâs, ne mbe ba-chi i bǎmkpóngé ḿbé Butu ḿbú Osówo ne me, ne baa/chwáp mě kanong kanong.
12Épafaras mú mu běn to ké burwám, ne mu to ḿgbán-Jisos Karâs o/ta běn kyiraa. Nyǐ mu o-fâ nshwam shwaneshwane kángkáng nkéré ké bubwô enen o-bí ng Osówo o/fu, ochi běn ba-bwom shwaneshwane, ba-kán ké byěm echi kángkáng ḿbyí Osówo mu o-ryuu ng. 13Me oyén m-man n esét wááng kyi-kim ne bǎmkpóngé emen ḿbé mu o-chi i kanong kanong ké bubwô enen ne ké bubwô-banet ḿbé mbe ké Lehodyisáya ne ké Hyirópólyis. 14Lûk mú nchi bakye eten mú dyityém ne Dyímas ba/ta běn kyiraa.
15Ta n̂g barî-banet eten ḿbé mbe ké Lehodyisáya ne onyinyi mú odabángê Nyímafa ne banet-ékwâbashi nyí Karâs ḿbé mbe ba-cibi ng ké kyise emen kyiraa. 16Ké nkéré mú baa/kó léta mún, ri n̂g ba/fu, batwóm kámú ba-kó to ké kyise-ékwâbashi nyí Karâs nyí nyi ké Lehodyisáya. Kó n̂g to léta mú n/sáng n-kye banet-ékwâbashi nyí Karâs ḿbé mbe ké Lehodyisáya. 17Ne sét n̂g Ákyipus ba/fu, onyît o/fu, nyǐ oman o-man bǎmkpóngé ḿbé ba/kye ǎ ké bǎmkpóngé-Otu Kyítá.
18Kyi/bát ochwâp mú Osówo okyú ne ben. *Da n̂g eráp kyi-kim ne bamgbokobá ejí*. N/yip bubwô ejí n-sáng ńkyín n/fu, me Pôl n/ta běn kyiraa.
Currently Selected:
Kolóshan 4: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
