Kolóshan 3
3
1Osówo oo/jwóbê běn ne Karâs. Tî n̂g kâng atyém enen ké byěm ḿbyí mbyi kyíbóng, ké kyikit ńkyí Karâs mu o-kyú u, ké kakyúng-butu emen, ké kyicê ńkyí bubwô-etyebéng-Osówo. 2Tî n̂g atyém enen ké byěm ḿbyí mbyi áku, *chí ké byěm ḿbyí mbyi nyín ké ejíí*. 3Ké ebóng, ben baa/kpú ne Karâs, ne akpen enen nyi rôorôo ké Karâs ne Osówo. 4Ochíchí-dyikpen enen, ányi Karâs, ne ké nkéré mú nyǐ o/chi o-byí, ben kâng ba/chi ba-byí ne nyǐ ba-nung to ké busan emen ḿbú ragerage.
Ba/firi ne Dyikpen ńdyí Dyifyîfî
5Ben ba-man ba-mîng kâng dyikpen enen ńdyí bamu ba-kyú u wǎ eringe nyí byibî-atyém enen nyi a-sét ng běn, wǎ byibî-byěm echi ne karíng erí ne banet byiryibyiryi ne babép ebép ne dyityém etî ké byěm-ociring ne byěm eshwam. Ké ebóng, byěm eshwam mbyi wǎ bakye esháng. 6Ké nǎ, ké bubwô ḿbú azong-byěm ányi nké busa-dyityém ḿbú Osówo bu/chi bu-shû bu-kâm banet. 7Ne ben to ba/mû ba-kyú u ké dyizong-dyikpen ándyi ké nkéré mú ekabe ányi e/mû e/cít atyém enen.
8Nké kántîk, ben ba-man ba-zú abwô ké kángkáng byěm ḿbyín, wǎ kafâ esa ne kafâ ebuu ne byěm eróng ké dyityém. Edángé ne byibî-byiraa eraa bii*man byi-kû běn ebyí ké ocím*. 9*Da n̂g echi ba-sét orî-onet chwǒm ńkyí kyi*fí ntûntû*. Ké ebóng, ben baa/pii kyibî-dyikpen enen ne kyibî-édúú enen ba-twóp. 10Ne ba/firi ne dyikpen ńdyí dyifyîfî. Osówo mú o/chi dyikpen ńdyí dyifyîfî ńdyín mu o-bírî ng kándyí dyi-bwa ng dyifyîfî kángkáng nkéré ké obî mú emen, eringe nyí oda běn echi ba-nyît ǎ kanong kanong. 11Ké bubwô ámbu kâng, banet ba*fí ké bushú ḿbú Osówo* ḿbé ba*fí banet-Jûs* nang ḿbé mbe banet-Jûs* nang ḿbé baa/cên nang ḿbé ba*da/cên* nang bacinbánet nang ḿbé ba/tôong wǎ enyam* nang ḿbé mbe básóng nang ḿbé ba*fí básóng*. Nké Karâs kǎnchí nké o/shwôm kángkáng byěm, ne nyǐ to mu ké kángkáng byěm.
12Ben ba-chi i banet ḿbé Osówo. Ben bamu ba-jê ng ǎ, ne o/cá běn o/fu, ben bakyú ḿbé emen. Ké bubwô ámbu kâng, ben ba-man ba-ri banet bafip, ba-kyú ne dyityém ecángê ne dyityém degere ne byiko efé ne dyityém chee. 13Kû n̂g echwáp barî-banet. Pwoo n̂g to barî nang nkéré orá nké orî-onet mu ne kyiraa ne onet okíri. Ba-man ba-kûpwoo barî-banet ké dyizong-bukwóp bubónge ḿbú Otu Kyítá oo/pwoo běn. 14Ne ké kángkáng byěm ḿbyín, fé n̂g kyijé ńkyí kyidacibi kángkáng byěm kyikit kyibónge ké ocibi oyén óyenê. 15Bunyîn-dyityém ḿbú Karâs mu o-kyâ nké bukyú běn nkêt mpan ké atyém enen. Ké nǎ, ké bunyîn-dyityém ḿbún nké Osówo oo/kó běn kyikit kyibónge ké enyam-byiko ebónge. Kó n̂g ǎ asǎma. 16Kyitwóm ńkyí Karâs kyi-man kyi-kyú běn ké atyém kanong kanong. Tángê ê ba-sét ng barî-banet byěm ne bubong enen kángkáng. Kû n̂g ekwán ekwan nyí nyi ké Nwet-Ekwan-Osówo mú badakó Sâm ne kángkáng azong-ekwan-ékwâbashi nyí Karâs ne ekwan nyí ké atyém, ba-kye Osówo ne asǎma ké atyém enen. 17Nang ebóng chwǒm kâng ńkyí bamu ba-chi i, nang bamu ba-raa ng, chi n̂g kánkyí ké dyizîn ńdyí Jisos Otu Kyítá wǎ eringe nyí bamu ba-kó ng Osówo Bonchí eten asǎma ké bubwô emen.
Édúú nyí Enen kyi-kim ne Dyikpen ńdyí Dyifyîfî
18Banyi, kye n̂g batyép enen ofê, ké nǎ, nkyí nké badachi wǎ banet ḿbé ba/bángê ké Karâs.
19Batyép, banyi enen bajê běn. Abwô a*da běn ekûwá ne mbé*.
20Bwǎn, nkyi bǎmkpóngé enen wǎ banet ḿbé ba/bángê ké Karâs ńkyí badakye banchí ne bané enen ofê kángkáng nkéré. Ké nǎ, nkyí nké nkyi kyi-nyîn n Osówo.
21Banchí ne bané-bwǎn, *da n̂g echi ńkyí kyidasa bwǎn enen* asa a-jwâa kámbé*.
22Básóng, kye n̂g banet ḿbé mbe banchí enen ofê ké kángkáng byěm. *Da n̂g ekye kámbé ofê ámu ké nkéré mú mbé mbe ba-ri ng běn nké nke* eringe nyí mbé ba/chi ba-kpee běn*. Nké kye n̂g kámbé kámú ne dyityém ńdyí ntûntû ké bubwô ḿbú bamu ba-kyâ Otu Kyítá ofê. 23Nang ebóng nké bamu ba-chi i, chi n̂g kánkyí ne dyityém enen kángkáng, éné wǎ bamu ba-chi i bǎmkpóngé ḿbé Otu Kyítá, *chí ḿbé banet*. 24Zîim m̂ ba/fu, Otu Kyítá o/chi o-kye běn eyáré. Ben ba/chi ba-koo ńkyí nyǐ oo/tî banet emen. Ké nǎ, Karâs nké mu ochíchí-Bonchí mú ben bamu ba-chi i ǎ bǎmkpóngé. 25Ne nang yeě mú mu nchi byibî-byěm, Osówo o/chi o-só ǎ ké byibî-byěm ḿbyí onet ámu mu o-chi i. Ké nǎ, Osówo mu o-pan n nang yeě mpan ké dyizong-bukwóp bubónge.
Currently Selected:
Kolóshan 3: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
