Âak 12
12
Banet-Ékwâbashi nyí Karâs ba/chîri Busông Chwóó
1Ké nkéré byěm ḿbyín mbyi byi-chi i, Otu Hérot o/kpet banet-ékwâbashi nyí Karâs busông ekye. 2O/kye busa ba-ju Jêmsyi mú wǎn-boné-Jǒn ké kashwám. 3Ké nkéré mú Otu Hérot o/ri o/fu, ńkyí nyǐ o/chi něen kyi/nyîn bujê-banet-Jûs, nyǐ o/ce kashú ne nkyí, ne o-kye busa o/fu, bakám Pyíta. Ńkyín kyi/chi ké nkéré mú mbe ba-ryí i dyijî-kyifen ńkyí Berêt. 4Ké nkéré mú ba/kám Pyíta, ba/kúng ǎ ba-fé ké mgbokobá. Ké kyikit ńkyí ba/tî basúja ashí anyii anyii ké byikit byinyii ba/fu, bakû ǎ ebám. Otu Hérot o/tî okabe o/fu, nyǐ o-byí i ne Pyíta wááng ba-pan ǎ mpan ké nkéré mú dyijî dii/man. 5Ne ba-tî Pyíta kâng ké mgbokobá, nké banet ḿbé ba/bángê ké Jisos ba/mû mbe ba-fâ nshwam kanong kanong ba-kyâ Osówo ké bubwô ḿbú Pyíta.
Orím mú Onong o/fîm Pyíta ké Mgbokobá
6Ké buchú ḿbú dyicófóróng dyi/chi dyi-cé ne Otu Hérot o-fîm Pyíta o-kye banet-oshê, Pyíta o/mû mu o-rê ng ké otyém mú basúja ashí afee ḿbé ba/mû ba-bám m ǎ. Ba/fé ǎ bamgbokobá bafee ké abwô, ne basúja ba/mû mbe ba-bám m dyifyi ńdyí ké kyibám-mgbokobá ánkyi. 7Ké abe ányi, orím mú onong mú Otu Kyítá o-byí o-bwom ányi, ne kiinwángé kyi-róng ké kaase-mgbokobá ánke. Orím mú onong ámu o-ninge Pyíta ké kiǐkwâ-kyikem o-jwóbê ǎ, ne o-raa ne nyǐ o/fu, bûu nensang ochéé óchee. Ké abe ányi, bamgbokobá ḿbé ba/mû ba/fé Pyíta ké abwô ba-kédê ba-róng kyísí. 8Ne orím mú onong ámu o-raa ne nyǐ o/fu, sît emâp eyên, a-yip abe eyên a-fé. Pyíta o-chi éné, ne orím ámu o-raa ne nyǐ o/fu, kúng nkyû eyên a-fé, a-bâ ne me ké kyikû. 9Pyíta o-dim ǎ ké kyikû ba-byí ké kyibám-mgbokobá. Pyíta o*da/nyît kâng o/fu, ńkyí orím mú onong mu o-chi i nkyi ntûntû*. Nyǐ o/mû mu o-kabe ng o/fu, nyǐ mu o-ri ng chwǒm-akat ké burê. 10Mbé ba/cen ba-shwôm ké kyikit ńkyí mbwôp kashú-kyikit-mbâm, ba-shwôm ké nnyinyěng, ne ké nkuli kyikû ba-ba-ribi ké dyifyi ńdyí ba/chi ké kiǐré, ńdyí badashwôm ne ba-ribi ké oshê. Dyifyi ándyi dyi-bâa ndyí dyiyén dyi-tî kámbé, ne ba-shwôm ba-byí kyíjí. Ba-cen n ba-câ ké kyiká-oshê, ne orím mú onong o-waa ké abe ányi o-rím o-mîng Pyíta.
11Ne Pyíta o-nyît kâng o/fu, nyǐ oo/byí ké mgbokobá ntûntû ne o-raa o/fu, kántîk, nn/nyît n/fu, nkyi ntûntû. Otu Kyítá o/twóm orím emen mú onong, ne oo/chi mě n-fem ké abwô nyí Otu Hérot ne ké kángkáng byěm ḿbyí banet-Jûs bakíri ba/mû ba/kabe ba/fu, mbé ba-chi i.
12Pyíta o-nyît ng byiko emen o-bâ, o-dim o-wâa ké kyise ńkyí Méryi mú boné-Jǒn-Mâk. Bujê-banet chwóó ba/mû kyikit kyibónge ké kyise ánkyi mbe ba-fâ nshwam. 13Pyíta o-kíbî dyifyi ńdyí kyíjí, ne wǎn-onyinyi mú mu ḿgbán, mú odabángê Rúda o-bûu o-bâ ebari onet mú mu o-kíbî ng. 14Mú wǎn-onyinyi ámu o-cêe Pyíta ké ejá, o-ráp dyifyi ekuu, o-zóngê o-bwa esim ké kafâ-kyise, o-da-sét banet ḿbé áku o/fu, Pyíta o/bwom áku kyíjí. 15Banet ámbe ba-sét ǎ ba/fu, amu a-fún n. Nké mú wǎn-onyinyi ámu o/sét kámbé o-nye ng o-fâ o/fu, nkyi ntûntû. Ne mbé ba-faa ba/fu, éné orím emen nké o/babwom.
16Ké kyikim-nkéré ánkyi, Pyíta mu o-kíbî ng ké dyifyi, o-nye ng o-fâ. Ne mbé ba-kuu kâng dyifyi, ne ké nkéré ba/ri ǎ, kyi/chi kámbé wǎ chwǒm-akat. 17Pyíta o-nye bubwô ké ocím o/fu, bacíbî pyêp ne o-sét kámbé eringe nyí Otu Kyítá o/fîm ǎ ké mgbokobá. O-sét kámbé o/fu, sét n̂g Jêmsyi ne barî-banet eten ḿbé áku. Ne o-byí o-dim kyicê kyikíri.
18Ké nkéré mú dyicófóróng dyi/cé basúja ḿbé ba/mû ba-bám m Pyíta ba*fí to ba-nyît ng ńkyí badachi*. Ba-kpet ebí barî ba/fu, ebóng chwǒm kii/chi Pyíta. 19Otu Hérot o-kye busa o/fu, bakyé ǎ, nké ba*da ǎ eri*. Ne o-kó kâng basúja ḿbé ba/mû ba-bám m ǎ, o-bí kámbé bǎmbím, ne o-kye busa o/fu, baju kámbé.
Ké nkéré mú chwǒm ńkyín kyi/chi, Otu Hérot o/dim ké Judyâ o-ca Sizaryâ o-da-rí áku ké kyikim-nkéré.
Eringe nyí Otu Hérot o/kpú
20Kafâ ka/mû ka-sa ng Otu Hérot kanong kanong ne banet ḿbé Táya ne Sádon. Ne banet-eshê ányi kâng ba-dim ké dyizu ba/fu, mbé ba-da ng eri Otu Hérot. Ké mbwôp kashú, ba/chi Balásátus mú o/mû onet-dyishí-kyibám-butu ńkyí Otu Hérot o-bwom ne mbé ké kyikû. Ne ba-dim kâng ba-kâm Otu Hérot ba/fu, mbé mbe ba-ryuu ng ba/fu, mú mǔ ofiri ké bunyîn-dyityém ne mbé, ké ebóng, mbé ba/mû mbe ba-ré ng byiryíng ne banet-oshê mú Otu Hérot.
21Ké dyicí ńdyí Otu Hérot o/fé kámbé, Otu Hérot o/bwá byídí-butu emen, o-kyú ké kyichí-butu, ne o-pem o-sét banet ámbe. 22Banet ḿbé ba/mû ányi ba-wonge ba/fu, *chí onet nké mu o-raa ng* nké Osówo. 23Ké abe ányi, orím mú onong mú Otu Kyítá o-chi Otu Hérot o-kpet erwôm, ké ebóng, o*da/kye Osówo ofê*. Banyabang ba-sú ǎ dyifít, ba-zíp ǎ baróng, o-kpú.
24Banet ba-jê ng ba-câ kashú ḿbé mbe ba-jwo ng byiraa ḿbyí Osówo, ba-bángê e ne atyém ebe.
25Bánábas ne Sôl ba-man ńkyí ba/bê ebachi ké Jerúsélem, ne ba-bwa esím, ba-kpî Jǒn-Mâk o-dim ne mbé ké kyikû.
Currently Selected:
Âak 12: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
