Âak 11
11
Pyíta o/sét Banet-Ékwâbashi nyí Karâs ḿbé ké Jerúsélem ńkyí kyi/chi
1Banet-kyitwóm-Jisos ne kángkáng barî-banet ḿbé ba/bángê ké Jisos ké Judyâ omúmú ba/jwo ba/fu, banet ḿbé ba*fí banet-Jûs* baa/bángê ké byiraa ḿbyí Osówo ne atyém ebe. 2Ké nkéré mú Pyíta o/bwa esim ké Jerúsélem, banet ḿbé ba/bángê ba/fu, ba-man ba-cên kpá banet ḿbé ba*fí banet-Jûs* ne ba-kûnung ké ékwâbashi nyí Karâs, ba-bîn ǎ ba/fu, 3wo a/danung banet ocinónet ḿbé ba*fí banet-Jûs* ḿbé ba*da/cên kámbé*. Ne a-bwa a-ryí to ne byiryíng ne mbé. 4Ne Pyíta o-sét kâng kámbé kángkáng ńkyí kyi/chi, kyi-fím ké ochíchí-kiimkpet kyikû.
5O/fu, me m/mû mu n-fâ nshwam ké oshê mú badakó Jópa, ne n-ri chwǒm-akat. Me n/ri chwǒm éné wǎ kiǐkpáré ńkyí kyiryên kyiryên ké kyi/fím kyíbóng nkyi kyi-shû ng kyi-bâ kyísí, éné wǎ ba/níbî kánkyí ké byicê byimúmú byinyii, ne kyi-ba-bwom fáráng ne me. 6M-kpúrî achi ké kafâ dííng ne n-ri enyam ne byitú ne enyam nyí edatut bukim kyísí ne bunurung ḿbú ké akán. 7Ne n-jwo kâng ejá nyí e/raa ne me e/fu, Pyíta, bûu nensang a-ju a-ryí. 8Nké me n/raa n/fu, aa*wááng* ǎ Otu Kyítá*. Byiryíng-ociring byi*fí nang byibónge* ḿbyí bii/nung ké ocím ejí*. 9Ejá ányi e-fím kyíbóng e-chîraa e/fu, *dachi a-kúng chwǒm ńkyí Osówo o/fu, nkyi kyinong wǎ chwǒm-ociring*. 10Ńkyín kyi/chi kampén jangjang kachât, ne ké nkuli kyikû ba-tut chwǒm ánkyi kyimúmú kyi-bwa esim kyíbóng. 11Ké ochíchí-nkéré ámu, banyinchéng ashí achât ḿbé ba/fím Sizaryâ ḿbé ba/mû ba/twóm kámbé, ba/baribi ké kyise ńkyí m/mû n-kyú u. 12Busun-Osówo bu-sét mě bu/fu, me n*dachi n-né edim ne mbé ké kyikû*. Barî-banet eten ḿbén ashí nyâchât ḿbé ba/fím Jópa ba/mû ba/ce to Sizaryâ ne me ké kyikû. Ne be ashí kángkáng byi-da-nung ké kyise ńkyí Konélus. 13Konélus o-sét bě eringe nyí nyǐ o/ri orím mú onong mú o/babwom ké kafâ-kyise emen o-sét ǎ o/fu, twóm onet o-ca Jópa, o-da-kó onyinchéng obónge mú odabángê Sámon-Pyíta. 14Nyǐ o/chi o-pem běn bǎmpém ḿbé ba/chi ba-chi Osówo o-nyii ǒ ne kyikû-banet eyên. 15Ne ké nkéré mú me mm/kpet epem kámbé bǎmpém, Busun-Osówo bu-shû bu-kâm kámbé, wǎ eringe nyí bu/shû bu-kâm bě ké kiimkpet kyikû. 16Ne n-zîim kâng ńkyí Otu Kyítá o/mû o/sét o/fu, Jǒn o/yip omu o-kye banet osoo mú Osówo, nké ben Osówo o/chi o-yip Busun-Osówo o-kye běn osoo mú Osówo. 17Kyi/tông wááng kyi/fu, Osówo o/kye banet ámbe ḿbé ba*fí banet-Jûs* dyizong-eyáré dyibónge ńdyí o/kye bě ké nkéré be byi/bángê ne atyém eten ké Jisos Karâs, Otu Kyítá. Me ebóng dyizong-onet kâng mú ndaman eníbî Osówo n/fu, o*dachi ńkyí o/fu, nyǐ o-chi i*.
18Ké nkéré mú mbé ba/jwo ńkyín, ba-mîng dyibîn ńdyí ba/mû ba-bîn n Pyíta, ba-kpet ekpee Osówo ba/fu, Osówo oo/kye kâng banet ḿbé ba*fí banet-Jûs* bukwóp ḿbú badasaa byiko ba-mîng byibî ebe, ba-kpen.
Banet-Ékwâbashi nyí Karâs ḿbé mbe ké Ántyok
19Banet ḿbé ba/bángê ké Karâs ba/pwôo byiryibyiryi ké bubwô-busông ḿbú ba/mû ba-kyâ kámbé, ké nkéré mú ba/ju Sityífin. Kyicê ba/cen ba-ribi eshê nyí Fonésha ne Sápurus ne Ántyok, nyí ké esí nyí Syírya ba-sét ng banet-Jûs nké nke Bǎmpém ḿbé Banong. 20Nké kyicê-banet bakíri ḿbé ba/bángê ké Karâs, ḿbé ba/fím Sápurus ne Saryínyi ba/ce Ántyok ké esí nyí Syírya ba-da-sét banet Bǎmpém ḿbé Banong, cibicibi ne banet ḿbé ba*fí banet-Jûs*. Ba/sét kámbé Bǎmpém ḿbé Banong kyi-kim ne Jisos, Otu Kyítá. 21Busa ḿbú Otu Kyítá bu/mû ne mbé, ne bujê-banet chwóó ba-bángê ne atyém ebe, ba-bírî ba-firi ké kyicê ńkyí Otu Kyítá.
22Bǎmpém kyi-kim ne bǎmkpóngé ḿbé ba/chi něen ké Ántyok ba-ribi ba-kâm banet-ékwâbashi nyí Karâs ḿbé mbe ké Jerúsélem, ne mbé ba-twóm kâng Bánábas o-ca Ántyok. 23Ké nkéré mú Bánábas o/ribi áku, ne o-ri eringe nyí Osówo oo/jware banet ámbe, dyityém dyi-nyîn ǎ, ne o-fé kámbé busa o/fu, bafé dyityém ne Otu Kyítá ne atyém ebe kángkáng. 24Bánábas o/mû onet mú onong mú o/mû ne busa ḿbú Busun-Osówo ké byiko, ne dyityém ńdyí o/fé ne Jisos. Bujê-banet chwóó ba-bángê ké Otu Kyítá ne atyém ebe.
25Ne Bánábas o-dim o-wâa Tásus, o/fu, nyǐ o-da ng ekyé Sôl. 26Ké nkéré mú o/ri ǎ, o-kpî ǎ ba-bwa esim ké Ántyok. Ké kyirim-dyije kyimúmú, banyinchéng ḿbén ashí afee ba/kyú ne banet-ékwâbashi nyí Karâs ámbe, ba-tángê bujê-banet. Kyi/mû ké Ántyok nké ba/bwóp kashú ba-kpet ekó bǎmgbán-Jisos, Kyirísíten, ányi kyi/byí, banet ḿbé ba/koo Karâs wǎ Otu ebe.
27Ké nkéré ámu, kyicê-bamkpábé ḿbé badasét byiraa-Osówo ba/dim ké Jerúsélem ba-ca Ántyok nyí ké esí nyí Syírya. 28Obónge ké burwám ebe mú odabángê Ágábus o-bûu nensang ne ké busa ḿbú Busun-Osówo o-sét o/fu, kyibî-esong kyi-kú kyi-bâ eróng ké ejíí emúmú. Esong ányi e/róng ké nkéré mú Kaládyus o/mû otu mú Rûm. 29Bǎmgbán-Jisos ba-kabe ba/fu, nang yeě nang yeě ké burwám ebe okye ńkyí odaman ekye, eringe nyí badachwáp barî-banet ebe ḿbé mbe ba-kyú u ké Judyâ. 30Mbé ba-chi éné, ne ba-yip kâng akpuga ányi ba-twóm Bánábas ne Sôl ba-da-kye banet-ashí-ékwâbashi nyí Karâs ḿbé ké Judyâ.
Currently Selected:
Âak 11: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
